Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Emamọ Usi nọ U No Obọ Ọghẹnẹ Ze!

 Uwuhrẹ 11

Ẹvẹ Izi Ọghẹnẹ E rẹ rọ Kẹ Omai Erere?

Ẹvẹ Izi Ọghẹnẹ E rẹ rọ Kẹ Omai Erere?

1. Fikieme ma rọ gwọlọ ọkpọvio?

Ẹvẹ izi Ebaibol e sai ro fi obọ họ kẹ omai yọroma re ma whaha oware kpobi nọ o rẹ sae wha omonwa ze?​—OLEZI 36:9.

Ọnọ ọ ma omai na o wo areghẹ vi omai. Wọhọ Ọsẹ oyoyou, o wo ọdawẹ kẹ omai. Ofariẹ, ọ ma omai re ma su omobọ mai hi. (Jerimaya 10:23) Fikiere, wọhọ epanọ emọ e gwọlọ ọkpọvio ọsẹgboni rai na, ere mai kpobi ma gwọlọ ọkpọvio Ọghẹnẹ. (Aizaya 48:17, 18) Izi Ebaibol e rẹ kẹ ọkpọvio, onana yọ okẹ oghaghae nọ u no obọ Ọghẹnẹ ze.​—Se 2 Timoti 3:16.

Izi Jihova i re wuhrẹ omai epanọ ma sai ro wo emamọ uzuazọ enẹna, gbe epanọ ma sai ro wo uzuazọ ebẹdẹ bẹdẹ evaọ obaro. Nọ orọnọ Ọghẹnẹ ọ ma omai na, u fo nọ ma re wo edẹro kẹ ọkpọvio nọ o no obọ riẹ ze je koko izi riẹ.​—Se Olezi 19:7, 11; Eviavia 4:11.

2. Ẹvẹ Ẹme Ọghẹnẹ ọ be rọ kpọ omai?

Izi jọ e rrọ Ebaibol na nọ ma rẹ sai fihọ iruo nọ ma tẹ rẹriẹ ovao ku iroro-ejẹ sa-sa. Izi efa e riẹ nọ i kiekpahe uzedhe oware nọ Ọghẹnẹ ọ gwọlọ nọ ma ru nọ ma tẹ rẹriẹ ovao ku iroro-ejẹ. (Iziewariẹ 22:8) O gwọlọ nọ ma re roro didi re ma sai wo otoriẹ oware nọ uzi Ebaibol jọ o be vuẹ omai gbe oware nọ u fo nọ ma re ru. (Itẹ 2:10-12) Wọhọ oriruo, Ebaibol ọ ta kẹ omai nọ uzuazọ yọ okẹ nọ u no obọ Ọghẹnẹ ze. Uzẹme nana o rẹ sae kpọ omai evaọ iruo mai, nọ ma tẹ rrọ obọ uwou, gbe oke nọ ma te bi kpohọ erẹ. O rẹ lẹliẹ omai yọroma re ma whaha oware kpobi nọ o rẹ sae wha omonwa ze.​—Se Iruẹru Ikọ Na 17:28.

3. Izi ivẹ vẹ e mai wuzou?

Jesu ọ ta kpahe izi ivẹ jọ nọ i wuzou gaga. Orọ ọsosuọ o ta kpahe ẹjiroro nọ ma rọ rrọ  uzuazọ, koyehọ re ma riẹ Ọghẹnẹ, you rie, jẹ rọ eva kpobi gọe. O gwọlọ nọ uzi ọsosuọ nana o rẹ kpọ omai evaọ iroro-ejẹ mai kpobi. (Itẹ 3:6) Ahwo nọ a bi koko uzi nana a re wo emamọ usu kugbe Ọghẹnẹ, wo uvi evawere, gbe uzuazọ ebẹdẹ bẹdẹ.​—Se Matiu 22:36-38.

Uzi avivẹ na o rẹ sai fi obọ họ kẹ omai rria dhedhẹ kugbe amọfa. (1 Ahwo Kọrint 13:4-7) Uzi avivẹ na nọ ma re fihọ iruo u re ru omai yeri kugbe ahwo wọhọ epanọ Ọghẹnẹ o bi yeri kugbe ai.​—Se Matiu 7:12; 22:39, 40.

4. Ẹvẹ izi Ọghẹnẹ e rẹ rọ kẹ omai erere?

Izi Ọghẹnẹ i re wuhrẹ iviuwou epanọ a sae rọ rehọ uyoyou yeri kugbe ohwohwo. (Ahwo Kọlọsi 3:12-14) Ẹme Ọghẹnẹ ọ be jẹ thọ iviuwou keme o bi wuhrẹ omai uzẹme jọ nọ o rẹ kpọ omai, inọ orọo yọ ọruẹrẹfihotọ nọ ọ rẹ jọ ribri.​—Se Emuhọ 2:24.

Nọ ma te bi lele iwuhrẹ Ebaibol na o rẹ sai fi obọ họ kẹ omai evaọ ofẹ iruo, gbe uruemu mai. Wọhọ oriruo, ega-iruo a rẹ gwọlọ rehọ ahwo nọ a bi koko izi Ebaibol nọ e ta kpahe uruemu oruọzewọ gbe obọ-ukruga. (Itẹ 10:4, 26; Ahwo Hibru 13:18) Ẹme Ọghẹnẹ o te bi je wuhrẹ omai inọ jọ umutho eware nọ ma wo e da omai ẹro, re ma je rri usu mai kugbe Ọghẹnẹ ghare vi ekwakwa efe.​—Se Matiu 6:24, 25, 33; 1 Timoti 6:8-10.

Nọ ma te bi koko izi Ebaibol o rẹ sai fi obọ họ kẹ omai whaha eware nọ e rẹ wha ẹyao se omai. (Itẹ 14:30; 22:24, 25) Wọhọ oriruo, nọ ma te bi koko uzi Ọghẹnẹ nọ o ta nọ ma da idi thomawa ha, u re fi obọ họ kẹ omai whaha eyao sa-sa gbe omonwa. (Itẹ 23:20) Jihova ọ kẹ uvẹ inọ ma rẹ sae da udi ogaga, rekọ ma rẹ da thomawa ha. (Olezi 104:15; 1 Ahwo Kọrint 6:10) Izi Ọghẹnẹ e rẹ kẹ omai erere keme i bi wuhrẹ omai epanọ ma sae rọ kpọ iroro gbe iruẹru mai. (Olezi 119:97-100) Ghele na, orọnikọ erere nọ o re noi ze ọvo ọ be lẹliẹ uvi Ileleikristi koko izi Ọghẹnẹ hẹ. A bi koko izi Jihova re a wha orro sei.​—Se Matiu 5:14-16.