Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Emamọ Usi nọ U No Obọ Ọghẹnẹ Ze!

 Uwuhrẹ 15

Fikieme Who re ro gbe Wuhrẹ?

Fikieme Who re ro gbe Wuhrẹ?

1. Ẹvẹ uwuhrẹ Ebaibol nọ whọ rẹ ruabọhọ o te rọ kẹ owhẹ erere?

U muẹro inọ igogo iwuhrẹ nọ e rrọ Ebaibol na nọ ma ta kpahe no na i ru uyoyou nọ who wo kẹ Jihova ga ziezi. Whọ rẹ daoma gaga re who ru uyoyou nana ga ziezi. (1 Pita 2:2) Re whọ sai wo uzuazọ ebẹdẹ bẹdẹ, who re gbe si kẹle Ọghẹnẹ ẹkwoma Ẹme riẹ nọ who re wuhrẹ.​—Se Jọn 17:3; Jud 21.

Nọ eriariẹ ra kpahe Ọghẹnẹ i bi diwi viere na, ẹrọwọ ra ọ vẹ te ga ziezi. Ẹrọwọ o ti fi obọ họ kẹ owhẹ ru Ọghẹnẹ eva were. (Ahwo Hibru 11:1, 6) Ẹrọwọ o ti ru owhẹ kurẹriẹ je ru inwene evaọ uzuazọ ra.​—Se Iruẹru Ikọ Na 3:19.

2. Ẹvẹ eriariẹ nọ who wo kpahe Ọghẹnẹ e sae rọ kẹ amọfa erere?

Whọ rẹ sai wo usu okpekpe kugbe Jihova

O te were owhẹ re whọ vuẹ amọfa kpahe eware nọ who wuhrẹ no, keme o rẹ were ohwo kpobi re ọ vuẹ amọfa emamọ usi. Nọ whọ be ruabọhọ uwuhrẹ Ebaibol na, who ti wuhrẹ epanọ whọ rẹ rọ rehọ Ebaibol na ta kẹ amọfa kpahe ẹrọwọ nọ who wo fihọ Jihova gbe emamọ usi na.​—Se Ahwo Rom 10:13-15.

Ahwo buobu a rẹ kake ta usiuwoma na kẹ egbẹnyusu gbe imoni rai. Rọ areghẹ ru onana. Ukpenọ whọ rẹ ta kẹ ae nọ eware nọ egagọ rai i bi wuhrẹ ai e thọ, u ti woma re whọ ta kẹ ae kpahe eyaa Ọghẹnẹ. Ofariẹ, kareghẹhọ inọ emamọ uruemu ra u re kpomahọ ahwo vi eme nọ whọ ta.​—Se 2 Timoti 2:24, 25.

3. Oghẹrẹ usu vẹ who ti wo kugbe Ọghẹnẹ?

Nọ who te bi wuhrẹ Ebaibol na, u ti fi obọ họ kẹ owhẹ si kẹle Ọghẹnẹ. Nọ oke o be nyaharo na, who ve ti wo usu  okpekpe kugbe Jihova. Whọ rẹ sae jọ omọvo ahwo uviuwou Ọghẹnẹ.​—Se 2 Ahwo Kọrint 6:18.

4. Ẹvẹ whọ sai gbe ro wo ẹnyaharo?

Whọ sai wo ẹnyaharo evaọ ukoko na ẹkwoma Ebaibol na nọ who re gbe wuhrẹ. (Ahwo Hibru 5:13, 14) Ta kẹ Osẹri Jihova jọ re ọ rehọ obe na, Eme Ebaibol na O Gine Wuhrẹ? fi obọ họ kẹ owhẹ wuhrẹ Ebaibol. Epanọ who wuhrẹ Ebaibol te, ere uzuazọ ra u ti woma te.​—Se Olezi 1:1-3; 73:27, 28.

Obọ Jihova, Ọghẹnẹ evawere na emamọ usi na u no ze. Whọ rẹ sai si kẹle Ọghẹnẹ ẹkwoma idibo riẹ nọ who re si kẹle. (Ahwo Hibru 10:24, 25) Nọ whọ tẹ be hae daoma ru Jihova eva were, yọ who bi ru re uvi uzuazọ na u te owhẹ obọ, oyehọ uzuazọ ebẹdẹ bẹdẹ. Ọghẹnẹ nọ who re si kẹle họ oware nọ o mai woma nọ who re ru.​—Se 1 Timoti 1:11; 6:19.