Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Emamọ Usi nọ U No Obọ Ọghẹnẹ Ze!

 Uwuhrẹ 5

Eme Họ Ẹjiroro Ọghẹnẹ kẹ Otọakpọ Na?

Eme Họ Ẹjiroro Ọghẹnẹ kẹ Otọakpọ Na?

1. Fikieme Ọghẹnẹ ọ rọ ma otọakpọ na?

Jihova ọ ma otọakpọ na kẹ ahwo-akpọ. Otọakpọ na họ uwou mai. Fikiere, ọ ma ọzae avọ aye ọsosuọ, Adamu avọ Ivi, re a yẹ emọ fihọ odhiwu hu keme Ọghẹnẹ ọ ma ijẹle fihọ obọ odhiwu no. (Job 38:4, 7) Ukpoye, Ọghẹnẹ ọ ma ọzae ọsosuọ fihọ aparadase owoma nọ ọ ruẹrẹhọ, onọ a je se ọgbọ Idẹn. (Emuhọ 2:15-17) Jihova ọ kẹ riẹ avọ emọ nọ o ti yẹ ẹruore uzuazọ omaweromẹ ebẹdẹ bẹdẹ evaọ otọakpọ.​—Se Olezi 37:29; 115:16.

Ọgbọ Idẹn na ọvo Ọghẹnẹ o ru fihọ aparadase. Ọ tẹ ta kẹ ọzae avọ aye ọsosuọ na inọ jọ a yẹ akpọ na vọ. Nọ oke o be nyaharo na, a hae te vaha ruọ akpọ na kpobi je ru ei zihe ruọ aparadase. (Emuhọ 1:28) A te raha akpọ na vievie he. Ahwo-akpọ a te rriae bẹdẹ bẹdẹ.​—Se Olezi 104:5.

2. Fikieme akpọ na ọ gbẹ rrọ aparadase enẹna ha?

Adamu avọ Ivi a yoẹme kẹ Ọghẹnẹ hẹ, fikiere Jihova o te le ai no ọgbọ na. A te ku aparadase fiẹ, yọ ohwo-akpọ ọvo ọ re sai zihe iei ze he. Ebaibol na ọ ta nọ: “Ọ rehọ akpọ na họ obọ ahwo omuomu.”—Job 9:24.​—Se Emuhọ 3:23, 24.

Kọ Jihova ọ kpairoro vrẹ ẹjiroro ọsosuọ riẹ kẹ ohwo-akpọ no? Ijo. Ọye họ Ọghẹnẹ Erumeru. Ẹjiroro riẹ ọ rẹ seba erugba ha. (Aizaya 45:18) O ti zihe ohwo-akpọ kpohọ epanọ ọ jiroro riẹ vẹre.​—Se Olezi 37:11, 34.

3. Ẹvẹ a ti ro zihe Aparadase ze?

Aparadase o ti zihe ziọ otọakpọ okenọ Jesu, Ovie nọ Ọghẹnẹ o ro mu o te muhọ esu no. Evaọ ẹmo nọ a re se Amagẹdọn, Jesu avọ ikọ-odhiwu efa a te raha ahwo kpobi nọ e wọso Ọghẹnẹ. Kẹsena Jesu o ve ti fi Setan họ uwou-odi  evaọ ikpe odu ọvo (1,000). Idibo Ọghẹnẹ a te zọ evaọ ẹmo ọyena keme Jesu ọ te thọ ae. A te reawere uzuazọ ebẹdẹ bẹdẹ evaọ Aparadase otọakpọ.​—Se Eviavia 20:1-3; 21:3, 4.

4. Oke vẹ uye-oruẹ u ti ro kuhọ?

Oke vẹ Ọghẹnẹ o ti ro si umuomu no otọakpọ na? Jesu ọ kẹ “oka” jọ nọ u ti dhesẹ nọ urere na o kẹle no. Eware nọ e rrọ akpọ na via nẹnẹ i bi fi uzuazọ ohwo-akpọ họ ọza, yọ i dhesẹ nọ ma be rria etoke “urere akpọ na.”​—Se Matiu 24:3, 7-14, 21, 22.

Evaọ etoke ikpe odu ọvo (1,000) nọ Jesu o ti su no odhiwu ziọ otọakpọ na, o ti si uye-oruẹ kpobi n’otọ. (Aizaya 9:6, 7; 11:9) U te no Ovie nọ ọ te jọ no, Jesu ọ te jẹ jọ Ozerẹ Okpehru, o ve ti ru nọ a te rọ rehọ izieraha ahwo nọ a you Ọghẹnẹ rọ vrẹ rae. Ọghẹnẹ ọ vẹ te rọ ẹkwoma Jesu si ẹyao, owho, gbe uwhu n’otọ.​—Se Aizaya 25:8; 33:24.

5. Amono a te rria Aparadase nọ ma bi rẹro riẹ na?

Whọ te jọ obọ Ọgwa Uvie ruẹ ahwo nọ a you Ọghẹnẹ jẹ be gwọlọ wuhrẹ epanọ a re ro ru ei eva were

Ahwo nọ a yoẹme kẹ Ọghẹnẹ a te rria Aparadase. (1 Jọn 2:17) Jesu o vi ilele riẹ inọ a nyae gwọlọ ahwo nọ a wo omaurokpotọ re a wuhrẹ ai eware nọ a re ru re Ọghẹnẹ ọ sae jẹ ae rehọ. Nẹnẹ, Jihova ọ be ruẹrẹ ima ahwo buobu kpahe kẹ uzuazọ evaọ Aparadase otọakpọ nọ ọ be tha na. (Zefanaya 2:3) Evaọ Egwa Uvie Isẹri Jihova, ahwo a re wuhrẹ epanọ a sae rọ jọ emamọ ezae uwou-orọo gbe emamọ esẹ, emamọ eyae uwou-orọo gbe emamọ ini. Esẹgbini avọ emọ rai a be gọ Ọghẹnẹ kugbe je bi wuhrẹ epanọ a ti ro wo erere no emamọ usi na ze.​—Se Maeka 4:1-4.