Kpohọ eme nọ e riẹ eva

Kpohọ oria izoẹme

 Uwuhrẹ 9

Ẹvẹ Uviuwou Ra O Sai ro Wo Evawere?

Ẹvẹ Uviuwou Ra O Sai ro Wo Evawere?

1. Fikieme orọo u re ro fiba evawere uviuwou?

Emamọ usi na u no obọ Jihova Ọghẹnẹ evawere na ze, ọnọ ọ gwọlọ nọ iviuwou kpobi a wo evawere. (1 Timoti 1:11) Jihova họ ọnọ ọ to orọo họ. Nọ imava a tẹ ginẹ rọo lele uzi, uviuwou na u re wo evawere keme u re ru nọ a jẹ sae rẹrote emọ rai ziezi.

Ẹvẹ Jihova o rri orọo? Ọ gwọlọ nọ orọo o rẹ whẹ ọzae avọ aye kugbe ribri. U fo nọ Ileleikristi a re ru lele izi ẹwho rai kpahe obe-orọo ukere. (Luk 2:1, 4, 5) Jihova ọ gwọlọ nọ ọzae-avọ-aye a re fievahọ ohwohwo. (Ahwo Hibru 13:4) Jihova o mukpahe orọo-ofa. (Malakae 2:16) Rekọ ọ kuvẹ kẹ Oleleikristi re ọ fa orọo jẹ wariẹ rọo otẹrọnọ ọrivẹ-orọo riẹ o bru-enwae.​—Se Matiu 19:3-6, 9.

2. Ẹvẹ u fo nọ ọzae-avọ-aye a re yeri kugbe ohwohwo?

Jihova ọ ma ọzae-avọ-aye evaọ edhere nọ a re ro ru ẹgwọlọ ohwohwo gba evaọ orọo. (Emuhọ 2:18) Ọzae nọ o wuzou uviuwou na o wo owha-iruo nọ ọ rẹ rọ ko uviuwou na je wuhrẹ ai kpahe Ọghẹnẹ. O re wo uyoyou udidi kẹ aye riẹ. Ọzae-avọ-aye a re wo uyoyou gbe adhẹẹ kẹ ohwohwo. Nọ ọzae-avọ-aye a gba ha na, a tẹ be daoma rọ vrẹ ohwohwo ẹsiẹe evawere e rẹ rọ jọ orọo na.​—Se Ahwo Ẹfẹsọs 4:31, 32; 5:22-25, 33; 1 Pita 3:7.

3. Kọ u fo re whọ dhẹ siọ ọrivẹ-orọo ra ba nọ wha te bi wo ebẹbẹ?

Nọ wha te bi wo ebẹbẹ evaọ orọo rai, u fo nọ whai imava na wha rẹ daoma rọ uyoyou lele ohwohwo yeri. (1 Ahwo Kọrint 13:4, 5) Ebaibol na ọ ta ha inọ  ọzae-avọ-aye a rẹ hẹriẹ nọ a te wo ebẹbẹ orọo.​—Se 1 Ahwo Kọrint 7:10-13.

4. Emọ, eme họ ẹjiroro Ọghẹnẹ kẹ owhai?

Jihova ọ gwọlọ nọ wha wo evawere. Ọ kẹ owhai ehrẹ nọ e mai woma nọ i re fi obọ họ kẹ owhai reawere oke uzoge rai. Ọ gwọlọ nọ wha wo erere no areghẹ esẹgbini rai ze gbe eware nọ a rọ ẹro ruẹ no. (Ahwo Kọlọsi 3:20) Jihova ọ tẹ jẹ gwọlọ nọ wha wo oghọghọ ẹkwoma eware ezi nọ wha re ru kẹe avọ Ọmọ riẹ.​—Se Ọtausiuwoma Na 11:9–12:1; Matiu 19:13-15; 21:15, 16.

5. Esẹgbini, ẹvẹ emọ rai a sai ro wo evawere?

Wha rẹ daoma gaga re emọ rai a ruẹsi wo emuore, uwou nọ a rẹ rria gbe iwu nọ a re kuhọ. (1 Timoti 5:8) Rekọ re emọ rai a sai wo evawere, who re je wuhrẹ ai Ẹme Ọghẹnẹ re a you Ọghẹnẹ je koko izi riẹ. (Ahwo Ẹfẹsọs 6:4) Emamọ oriruo ọrọ uyoyou nọ who wo kẹ Ọghẹnẹ o rẹ sae lẹliẹ emọ na rọ aro kele owhẹ you Ọghẹnẹ. Nọ whọ tẹ be rehọ ekpọvio ra no Ẹme Ọghẹnẹ ze, o rẹ sae kpọ udu ọmọ ra fihọ emamọ edhere.​—Se Iziewariẹ 6:4-7; Itẹ 22:6.

U re fi obọ họ kẹ emọ nọ whọ tẹ be hae tuduhọ ae awọ je yere ai nọ a te ru eware ezi. Emọ a tẹ jẹ gwọlọ ọkpọvio gbe ọwhọkuo. Ere oruo o rẹ thọ ae no iruemu nọ e rẹ sae whaha ae evawere ewo. (Itẹ 22:15) Rekọ u fo nọ ọwhọkuo ọ rẹ ga hrọ họ.​—Se Ahwo Kọlọsi 3:21.

Isẹri Jihova a kere ebe buobu no re i fi obọ họ kẹ esẹgbini gbe emọ. Ebaibol na a rehọ iwuhrẹ nọ e rrọ ebe nana no ze.​—Se Olezi 19:7, 11.