Kpohọ eme nọ e riẹ eva

Kpohọ oria izoẹme

Ileta nọ Utu Ẹruorote na U Kere Ze

Ileta nọ Utu Ẹruorote na U Kere Ze

Inievo Eghaghae nọ I You Jihova:

O jọ ukpe 1971. Ahwo nọ a kpohọ Okokohọ Ologbo nọ uzoẹme riẹ o jọ, “Divine Name” evaọ ukpe yena, eva e were rai gaga nọ a ghale ebe ekpokpọ sa-sa kẹ ae. Inievo na e ta kpahe ebe na nọ, “ohwo ọvo o rẹro rai hi.” Oniọvo-ọmọzae jọ ọ ta kpahe ọjọ evaọ usu ebe na nọ: “Mẹ re ruẹ obe nọ o were omẹ te enẹ hẹ, onọ o ta kpahe eware nọ e te via evaọ obaro ho.” Obe vẹ ọ jẹ ta kpahe na? Obe nọ uzoẹme riẹ o ta nọ “The Nations Shall Know That I Am Jehovah”​—How? Kọ fikieme obe nana o rọ were ahwo tere? A jọ eva riẹ ta kpahe oruvẹ ekpokpọ ọrọ eruẹaruẹ nọ e rrọ obe Izikiẹl, eruẹaruẹ nọ i kiekpahe obaro ahwo-akpọ kpobi.

Anwẹnọ a ro siobọno obe ‘Know Jehovah’ na rite enẹna, ahwo Ọghẹnẹ a bu gaga no, a bu vrẹ ima ọvo gbe idu egba isoi (1,500,000) nọ a jọ no, a vrẹ ima eree (8,000,000) no enẹna. (Aiz. 60:22) Idibo Jihova nana nọ i bu te ima buobu na a be ta evẹrẹ nọ i bu vrẹ egba izii (900). (Zẹk. 8:23) Ibuobu rai a ri ti wo uvẹ nọ a ro wuhrẹ obe nọ a jọ romatotọ fa otọ eruẹaruẹ nọ Izikiẹl ọruẹaro na o kere na ha.

U te no ere no, anwọ 1971 ze na, otoriẹ nọ ma wo kpahe iwuhrẹ Ebaibol buobu u vẹ gaga vi epanọ o jọ no nọ elo na o bi dhe evevẹ na. (Itẹ 4:18) Evaọ ukpe 1985, ma te mu otoriẹ uvevẹ họ ewo kpahe epanọ a ro ku enu kẹ “igodẹ efa” na inọ a kiẹrẹe nọ a rẹ rọ jọ egbẹnyusu Ọghẹnẹ. (Jọn 10:16; Rom 5:18; Jem. 2:23) Kẹsena evaọ ukpe 1995, ma te wo otoriẹ evaọ orọ ọsosuọ kpobi inọ oke “uye ulogbo” nọ o be tha na a ti ro gu “igodẹ” gbe “ewe” na ẹdhọ urere. (Mat. 24:21; 25:31, 32) Otoriẹ ekpokpọ nana kpobi i ru omai riẹ otọ obe Izikiẹl ziezi no.

“Ọmọ ohwo, rri ziezi, gaviezọ ziezi, je muẹrohọ oware kpobi nọ me ti dhesẹ kẹ owhẹ, keme fikioye a rọ rehọ owhẹ ziọ etenẹ na.”​—IZIKIẸL 40:4

Anwọ ikpe jọ ze na, elo na o gbe bi dhe evevẹ. Roro kpahe eware nọ ma wuhrẹ no evaọ etadhesẹ Jesu. Ma wo otoriẹ ibuobu etadhesẹ yena gaga no enẹna, yọ e rrọ vevẹ. Etadhesẹ yena jọ i kiekpahe eware nọ e te via kẹle na evaọ uye ulogbo nọ o be tha kpata kpata na. Ere ọvona re, a ru otoriẹ nọ ma wo evaọ eruẹaruẹ jọ nọ e rrọ obe Izikiẹl na vẹ no. Ejọ rai họ, eruẹaruẹ kpahe Gọg obọ Magọg (uzou avọ 38 gbe 39), iruo ọzae nọ ame-ugbẹ okere-obe o rrọ eku riẹ na (uzou avọ 9), ukiekpotọ igbenwa nọ e ya fia, gbe imire ivẹ nọ a ti kugbe evaọ edhere ẹwoho na (uzou avọ 37). Eware nana kpobi nọ a ru vẹ na, i nwene eware nọ ma kere evaọ ikpe buobu nọ e vrẹ no na evaọ obe ‘Know Jehovah’ na.

Agbẹta nọ idibo Jihova buobu a rọ nọ no inọ, “Oke vẹ ma ti wo obe nọ a jọ ta kpahe otoriẹ okpokpọ nọ ma wo evaọ eruẹaruẹ Izikiẹl?” Obe nana nọ a re se Egagọ Efuafo Jihova​—E Nwa Zihe Ze No! na họ obe na. Nọ who ti se izou 22 nọ e rrọ obe na je roro didi kpahe iwoho iwowoma nọ e rrọ eva riẹ na, ekiakiẹ nọ a romatotọ ru ro kere obe nana i ti gbe owhẹ unu. Ma lẹ je roro didi re ma riẹ oware nọ Jihova ọ rọ kẹ omai obe Izikiẹl nọ u re mu urirẹ na. Ma romatotọ roro kpahe enọ wọhọ: Eme a rọ obe Izikiẹl na wuhrẹ ahwo oke Izikiẹl gbe omai nẹnẹ? Eruẹaruẹ vẹ e ta kpahe eware nọ e te via evaọ obaro? Kọ u fo nọ ma rẹ jọ eruẹaruẹ Izikiẹl gwọlọ eware nọ ma rẹ jọ fodẹ oware jọ  no, ma vẹ fodẹ oware ofa nọ u dikihẹ kẹ? Iyo enọ nana i ru omai wo otoriẹ uvevẹ nọ ma wo vẹre he kpahe obe Ebaibol nana nọ o rẹ were omai ese gaga na.

Nọ who te se obe Izikiẹl no emuhọ rite ekuhọ, oghẹrẹ nọ abọ obọ odhiwu ukoko Jihova o rrọ o rẹ were owhẹ oma. Ababọ avro, u re gbe owhẹ unu re nọ who te roro kpahe izi ikpehru nọ Jihova o fihọ kẹ enọ e rrọ obọ odhiwu gbe otọakpọ na nọ e gwọlọ gọe evaọ oghẹrẹ nọ ọ rẹ jẹrehọ. Obe Egagọ Efuafo na u ti fiobọhọ kẹ owhẹ wo edẹro viere kẹ oware nọ Jihova o ru kẹ ahwo riẹ no gbe oware nọ o ti ru kẹ ae evaọ obaro kẹle na. Who ti muẹrohọ nọ a jọ obe nana ta kpahe eware ivẹ jọ gaga. Orọ ọsosuọ, re ma ruẹsi ru Jihova eva were, o gba omai họ nọ ma rẹ riẹe je vuhumu nọ ọye họ Osu Ehrugbakpọ na. Orọ avivẹ, o gba omai họ nọ ma rẹ gọe evaọ oghẹrẹ nọ ọ rẹ jẹrehọ, yọ ma re yeri uzuazọ mai rọwokugbe izi ikpehru riẹ.

Ma rẹro nọ obe nana u ti fiobọhọ kẹ owhẹ gbaemu nọ whọ rẹ gọ Jihova evaọ oghẹrẹ nọ o rẹ wha orro se odẹ ulogbo riẹ nọ o rrọ ọrẹri na. Evaọ oke ovona, jọ obe nana o tuduhọ owhẹ awọ re who gbe rẹro oke nọ erẹwho na kpobi a te rọ riẹ nọ ọye họ Jihova.​—Izik. 36:23; 38:23.

Jọ Jihova ọsẹ oyoyou mai na, ọ ghale oma nọ whọ be dawo re who wo otoriẹ obe nọ ọ rehọ ẹzi riẹ kpọ Izikiẹl ọruẹaro na kere na.

Inievo rai,

Utu Ẹruorote Iruẹru Isẹri Jihova