Kpohọ eme nọ e riẹ eva

Kpohọ oria izoẹme

 ẸKPẸTI UWUHRẸ 14A

Eware nọ Ma re Wuhrẹ no Eruẹaruẹ Etẹmpol Izikiẹl na Ze

Eware nọ Ma re Wuhrẹ no Eruẹaruẹ Etẹmpol Izikiẹl na Ze
ỌRUẸRẸHỌ

A Kpare Egagọ Efuafo Kpehru je Ru Epanọ A gbe ro Gbei Ku Hu

A kpare etẹmpol nọ Izikiẹl ọ ruẹ na kpehru fihọ “ehru ugbehru jọ nọ u kpehru gaga” (1). Kọ ma kpare egagọ efuafo kpehru no re, bi fi ei họ oria ọsosuọ evaọ uzuazọ mai?

Ogba nọ a ma wariẹ etẹmpol na họ na (2), onọ u ru nọ oria jọ lelele o rọ wariẹ etẹmpol na họ (3), o rẹ kareghẹhọ omai inọ ma rẹ kuvẹ vievie he re oware jọ u gbe egagọ mai ku. Obe Izikiẹl 42:20 o ta nọ ugbẹhẹ na, koyehọ ogba nọ a ma wariẹ etẹmpol na họ na u fi ohẹriẹ họ “oria nọ o rrọ ọrẹri” avọ oria nọ “o rrọ kẹ ahwo kpobi.” Oria hayo oware nọ “o rrọ kẹ ahwo kpobi” na u dikihẹ kẹ iruẹru hayo eware nọ e roja kẹ uzuazọ ikẹdẹ kẹdẹ mai, rekọ nọ i wobọ kugbe egagọ họ. Otẹrọnọ a kuvẹ re eware itieye na dede i fo kẹle oria egagọ efuafo ho, u gbe dhesẹ epanọ u wuzou te re ohwo nọ ọ be gọ Jihova nẹnẹ ọ whaha iruemu ogbekuo hayo ọfariẹ?

Eghale Ebẹdẹ Bẹdẹ

Ame nọ o bi su ẹmẹrera no aruẹri etẹmpol na ze, bẹsenọ u ro zihe ruọ ethẹ nọ o bi ru oware kpobi nọ o rrọ etẹe wo uzuazọ je bi ru otọ na wou eware (4). Ma te ta kpahe eghale nana evaọ Uzou avọ 19 obe nana.

Itee Evona Rọkẹ Ahwo Kpobi

Inuethẹ ikpekpehru otafe na (5) avọ inuethẹ obeva na (9) e rẹ kareghẹhọ omai inọ itee nọ Jihova o fihọ kẹ ahwo kpobi nọ a be gọ egagọ efuafo e rrọ kpekpehru. Muẹrohọ nọ epọvo na inuethẹ otafe avọ inuethẹ obeva na e kẹre je kpehru te, e jọ ẹrẹrẹe. U kiehọ ere, keme izi ikiẹrẹe evona Jihova o fihọ kẹ idibo riẹ kpobi, ghelọ owha-iruo nọ a wo evaọ ukoko na kẹhẹ.

Emuọriọ Evaọ Emẹjẹ Jihova

Ibriwou emuọriọ na (8) e rẹ kareghẹhọ omai inọ evaọ oke anwae, ahwo na a rẹ sae jọ emu idhe ọriẹyeri nọ a wha ze etẹmpol na re. Nọ a be re emu nana na, yọ Jihova Ọghẹnẹ a bi lele re emu na, wọhọ odẹme. Rekọ ere o rrọ evaọ etẹmpol ẹwoho nọ mai Ileleikristi ma be jọ gọ nẹnẹ na ha, keme a dhe “idhe ẹsiẹvo” kẹ omai no. (Hib. 10:12) O make rrọ ere na, ma bi dhe idhe ujiro.​—Hib. 13:15.

Imuẹro nọ Ọghẹnẹ Ọ Kẹ Omai

Eware nọ a ma evaọ eruẹaruẹ na i bu te epanọ e sai ro fou eho. Rekọ i wuhrẹ omai obọdẹ oware jọ: I ru omai wo imuẹro inọ ẹjiroro Jihova kpahe ezihe ze egagọ efuafo u muẹro, yọ u re nwene he, nwane wọhọ epanọ eware nọ a ma na i re nwene he na. Dede nọ Izikiẹl ọ ruẹ ohwo ọvo evaọ eruẹaruẹ na ha, o kere kpahe ọwhọkuo ọgaga nọ Jihova ọ kẹ izerẹ na, isu na, gbe ahwo na. O gbahọ nọ idibo Ọghẹnẹ kpobi a re lele itee ikiẹrẹe riẹ.