Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eme Ebaibol na O Gine Wuhrẹ?

Kọ Oware nọ Ọghẹnẹ Ọ Jiroro Riẹ Ona?

Kọ Oware nọ Ọghẹnẹ Ọ Jiroro Riẹ Ona?

SE OBE-USI kpobi. Rri etẹlivisiọne, hayo gaviezọ kẹ iredio. Iku buobu e vọ riẹ kpahe ethube, ẹmo, gbe ozighi-ọkparesuọ! Roro kpahe idhọvẹ omobọ ra. Ẹsejọhọ ẹyao hayo uwhu ohwo nọ who you o be kẹ owhẹ idhọvẹ gaga. O sae jọ owhẹ oma wọhọ epanọ o jọ kẹ Job, ọzae owoma na, ọnọ ọ ta nọ “oma o be vuomẹ, me te riwi uye nọ o rọ omẹ oma.”—Job 10:15.

Nọ oma ra nọ:

  • Kọ ona họ ẹjiroro Ọghẹnẹ kẹ omẹ avọ ahwo-akpọ nọ a kiọkọ kpobi?

  • Diẹse mẹ sai jo duku obufihọ nọ me re ro thihakọ hayo ku ebẹbẹ mẹ họ?

  • Kọ ẹruore jọ ọ riẹ inọ ma te ruẹ udhedhẹ ẹdẹjọ eva otọakpọ na?

Ebaibol na ọ kẹ iyo nọ e rẹ veva kpahe enọ nana.

 EBAIBOL NA O WUHRẸ NNỌ ỌGHẸNẸ O TI RU INWENE NANA EVAỌ OTỌAKPỌ.

“Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.”—Eviavia 21:4

“Ọmo o veti duola wọhọ uyo.”—Isaiah 35:6.

“Aro enọ itu i veti rovie.”—Aizaya 35:5.

 ‘Enọ e rrọ uki ekareghẹhọ kpobi a vẹ te nya via.’—John 5:28, 29.

“Ohwo ọvo nọ ọ be ria eva riẹ nọ ọ rẹte ta nọ, ‘Mẹ be mọ,’ ọ rọ họ.”—Aizaya 33:24.

‘Ibi i re ti vihọ eva otọ na.’—Olezi 72:16.

 WO ERERE NO OWARE NỌ EBAIBOL NA O WUHRẸ ZE

Whọ nwani gbolo aro kẹ eware nọ a dhesẹ eva ewẹ-obe nọ e vrẹ na wọhọ irẹro ifofe jọ gheghe he. Ọghẹnẹ ọ yeyaa nọ o re ti ru eware nana, yọ Ebaibol na o dhesẹ epanọ o ti ro ru ai.

Rekọ Ebaibol na e rẹ jẹ kẹ omai erere evaọ idhere efa. U dhesẹ oghẹrẹ nọ whọ rẹ rọ reawere uzuazọ evevọwẹ makọ enẹna. Dai roro kpahe awa-ọruọ gbe ebẹbẹ ra. Ẹsejọhọ o kẹre te ẹbẹbẹ ugho, ebẹbẹ uviuwou, ẹyao, hayo uwhu ohwo nọ who you. Ebaibol na e rẹ sai fi obọ họ kẹ owhẹ yeri kugbe ebẹbẹ inẹnẹ na, yọ e rẹ sai ru udu dhẹ owhẹ ẹkwoma uyo nọ o kẹ kpahe enọ wọhọ:

  • Fikieme ma jẹ be ruẹ uye?

  • Ẹvẹ ma sai ro thihakọ awa-ọruọ uzuazọ?

  • Ẹvẹ ma sai ro ru uzuazọ uviuwou mai vọ avọ evawere ziezi?

  • Eme ọ rẹ via kẹ omai okenọ ma te whu?

  • Kọ ma te sae wariẹ ruẹ iyoyou mai nọ i whu no na?

  • Ẹvẹ o sai ro mu omai ẹro nọ Ọghẹnẹ o ti ru eyaa nọ ọ ya kpahe obaro na gba?

 Ese nọ who bi se obe nana u dhesẹ nọ whọ gwọlọ riẹ kpahe oware nọ Ebaibol na o wuhrẹ. Obe nana u ti fi obọ họ kẹ owhẹ. Muẹrohọ inọ idhe-eme na i wo enọ eva obotọ ewẹ-obe na. Ima ahwo buobu a reawere ona orọ enọ-gbe-iyo na no okenọ Isẹri Jihova a te bi wuhrẹ Ebaibol na kugbe ae. Ma rẹro nọ o te were owhẹ re. Jọ Ọghẹnẹ ọ ghale owhẹ nọ whọ be reawere omosasa avọ evevọwẹ orọ ewuhrẹ kpahe oware nọ Ebaibol na o gine wuhrẹ na!