Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eme Ebaibol na O Gine Wuhrẹ?

 EME-OFIBA

Evuhumu “Babilọn Ologbo Na”

Evuhumu “Babilọn Ologbo Na”

OBE Eviavia u wo eme buobu nọ a ta evaọ edhere ẹwoho. (Eviavia 1:1) Wọhọ oriruo, a jariẹ fodẹ aye jọ nọ a kere odẹ na “Babilọn ologbo” fihọ aruezo riẹ. A ta inọ aye nana ọ keria ehru ‘ogbotu gbe erẹwho.’ (Eviavia 17:1, 5, 15) Nọ uvumọ aye gheghe ọ rẹ sai ru onana ha na, Babilọn Ologbo na o dikihẹ kẹ oware jọ. Nọ o rrọ ere na, eme ogberẹ ẹwoho nana o dikihẹ kẹ?

A jọ Eviavia 17:18 dhesẹ aye ẹwoho ọvona wọhọ “okpẹwho ologbo na nọ o wo ogaga vi ivie akpọ na.” Ẹme na “okpẹwho” u dhesẹ ukoko ahwo. Nọ o rọnọ “okpẹwho ologbo” nọ a jọ etenẹ fodẹ na o bi su “ivie akpọ na,”  koyehọ aye nọ a se Babilọn Ologbo na ọ be te jọ ukoko nọ u wo udu nọ o kẹre te akpọ na soso. A sai se ei gbagba nọ uvie-ulogbo akpọ-soso. Oghẹrẹ uvie-ulogbo vẹ? Orọ egagọ. Muẹrohọ oghẹrẹ nọ eria efa erọ obe Eviavia i ro fi obọ họ kẹ omai riẹ onana.

Uvie-ulogbo o sae jọ orọ esuo, ekiọthuọ, hayo egagọ. Aye nọ a se Babilọn Ologbo na orọnikọ uvie-ulogbo orọ esuo ho keme Ẹme Ọghẹnẹ ọ ta nọ “ivie akpọ na kpobi,” hayo ahwo nọ a wo ọkwa isuẹsu akpọ na a “bruẹnwae” kugbei. Ẹnwae-obro riẹ na họ usu nọ o mu kugbe isu akpọ nana yọ onana u dhesẹ oware nọ a ro sei “ogberẹ ologbo na.”—Eviavia 17:1, 2; Jemis 4:4.

Babilọn Ologbo na ọ sae jọ uvie-ulogbo ekiọthuọ họ keme “otu ihreki akpọ na,” enọ i dikihẹ kẹ abọ sa-sa ọrọ ekiọthuọ akpọ na i ti weri eva oke ọraha riẹ. Ẹhẹ, a dhesẹ ivie gbe otu ihreki na wọhọ nọ a bi rri Babilọn Ologbo na evaọ “ugbo uthabọ.” (Eviavia 18:3, 9, 10, 15-17) Fikiere, o rrọ oware iroro re a ta nọ Babilọn Ologbo na yọ uvie-ulogbo orọ egagọ, orọnikọ orọ esuo hayo ekiọthuọ họ.

Oware nọ o kẹ imuẹro nọ Babilọn Ologbo na o dikihẹ kẹ egagọ o wariẹ dhesẹ oma via vevẹ ẹkwoma ẹme nọ a ta inọ ọ be rehọ ẹkwoma “uruemu imizi” riẹ ro su erẹwho na kpobi thọ. (Eviavia 18:23, NW) Nọ o rọnọ idhivẹri e rẹ wha oghẹrẹ iruemu-imizi kpobi ze na, u re gbunu hu inọ Ebaibol na o se Babilọn Ologbo na “oria nọ izigbegbe e be ria.” (Eviavia 18:2; Iziewariẹ 18:10-12) A te je dhesẹ uvie-ulogbo nana inọ o wọso egagọ uzẹme kekeke, bi kpokpo “eruẹaro gbe erezi na.” (Eviavia 18:24) Uzẹme, egrẹ nọ Babilọn Ologbo na o wo kẹ egagọ uzẹme o ga te epanọ ọ be rọ rehọ ukpokpoma ogaga te ‘enọ i bi se isẹri kẹ Jesu,’ je bi kpe ai dede. (Eviavia 17:6) Fikiere, aye nana nọ a se Babilọn Ologbo na o dikihẹ kẹ uvie-ulogbo egagọ erue akpọ-soso, onọ o kẹre te egagọ kpobi nọ e wọso Jihova Ọghẹnẹ.