Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 7: Ọzae Udu

Ikuigbe avọ 7: Ọzae Udu
Enọk

NỌ UNU ahwo u ti bu gaga no evaọ otọakpọ, ibuobu rai i je ru eware iyoma wọhọ Keni. Rekọ ọzae ọvo jọ o wo ohẹriẹ. Ọye họ ọzae ọnana nọ a re se Enọk. Enọk yọ ọzae udu. Ahwo nọ a ware riẹ họ kpobi a je ru eware nọ iyoma gaga, rekọ Enọk yọ ọ gbẹ be gọ Ọghẹnẹ ghele.

Kọ whọ riẹ oware nọ osoriẹ nọ ahwo oke oyena a je je ru eware iyoma buobu? Whaọ, who roro, ono ọ soriẹ nọ Adamu avọ Ivi a je ghọẹmeeyo kẹ Ọghẹnẹ, jẹ re ubi ure nọ Ọghẹnẹ ọ ta nọ a ria ha? Ẹhẹ, ẹnjẹle oyoma jọ. Ebaibol o se riei Setan. Yọ ọ be daoma re o ru ahwo kpobi fihọ eyoma.

Ujitho gbe ohwo-okpe

Ẹdẹjọ Jihova Ọghẹnẹ ọ tẹ rehọ Enọk t’ẹme kẹ ahwo na, nọ, a gwọlọ yo ho. Ẹme na ọna: ‘Ọghẹnẹ ọ te raha ahwo oyoma kpobi ẹdẹjọ.’ Owọhọ nọ ẹme ọnana ọ dha ahwo na eva gaga. A tubẹ gwọlọ nọ ae a he kpe Enọk whu. Fikiere o tẹ gwọlọ nọ Enọk o re wo udu gaga re ọ tẹ sae vuẹ ahwo na kpahe oware nọ Ọghẹnẹ o bi ti ruẹ.

Ọghẹnẹ ọ kẹ uvẹ nọ Enọk ọ ria krẹki eva udevie ahwo oyoma ọyena ha. Enọk ọ ria kri te ikpe 365 ọvo. Fikieme ma jẹ ta nọ “ikpe 365 ọvo”? Fiki nọ ahwo oke oyena a ga egbẹ gaga vi ahwo oke onana, yọ a jẹ tọ gaga. Binọ Mẹthusẹla ọmọzae Enọk ọ ria ikpe 969 soso!

Ahwo nọ a bi ru eware iyoma

Whaọ, nọ Enọk o whu no, ahwo na kọ a je yoma họ aro. Ebaibol ọ ta nọ ‘oware kpobi nọ a je roro kpahe kọ uyoma ọvo,’ gbe nnọ ‘otọakpọ na o tẹ vọ avọ ozighi.’

Kọ whọ riẹ oware ovo jọ nọ o soriẹ nọ ukpokpoma o jẹ vọ otọakpọ na eva edẹ eyena? Fiki nọ Setan o wo edhere ọkpokpọ nọ o re ro ru ahwo re a ru eware iyoma. Ma te wariẹ wuhrẹ kpahe onana.

Emuhọ 5:21-24, 27; 6: 5; Ahwo Hibru 11:5; Jud 14, 15.



Enọ

  • Ẹvẹ Enọk o ro wo ohẹriẹ?
  • Fikieme ahwo evaọ edẹ Enọk a ro ru eware iyoma buobu?
  • Eware iyoma vẹ ahwo a je ru? (Rri uwoho na.)
  • Fikieme o jẹ gwọlọ nnọ Enọk o re wo udu?
  • Ẹvẹ ahwo a jẹ rria kri te evaọ oke yena, rekọ ẹvẹ Enọk ọ rria kri te?
  • Eme ọ via nọ Enọk o whu no?

Enọ efa

  • Se Emuhọ 5:21-24, 27.

    Didi oghẹrẹ usu Enọk o wo kugbe Jihova? (Emu. 5:24)

    Wọhọ epanọ Ebaibol na e ta, ono ọ mae rria tọ kpobi evaọ otọakpọ na, kọ bro ikpe ọ rria re o te whu? (Emu. 5:27)

  • Se Emuhọ 6:5.

    Ẹvẹ eware i yoma te evaọ otọakpọ nọ Enọk o whu no, kọ ẹvẹ whọ sae rọ rehọ onana wawo edẹ mai nẹnẹ? (2 Tim. 3:13)

  • Se Ahwo Hibru 11:5.

    Uruemu Enọk vẹ o “were Ọghẹnẹ,” kọ eme o no rie ze? (Emu. 5:22)

  • Se Jud 14, 15.

    Ẹvẹ Ileleikristi nẹnẹ a sae rọ raro kele aruọwha Enọk nọ a tẹ be vẹvẹ ahwo unu kpahe ẹmo Amagẹdọn nọ ọ be tha na? (2 Tim. 4:2; Hib. 13:6)