Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 9: Noa Ọ Bọ Ak

Ikuigbe avọ 9: Noa Ọ Bọ Ak
Ahwo nọ a be hwẹ Noa

NOA o wo aye gbe emezae esa. Edẹ emezae riẹ họ Shẹm, Ham gbe Jefẹt. Yọ omomọvo emezae enana o wo aye. Fikiere ahwo eree e jọ uviuwou Noa.

Ọghẹnẹ ọ tẹ rehọ iruo oghẹrẹ sa jọ kẹ Noa. Ọ ta kẹe nọ ọ bọ ak ologbo jọ. Ak ọnana ọ jọ ruaro wọhọ okọ-oyibo, rekọ o mae whoma họ etehe ologbo othethei. ‘Ruei kpehru te ituwou esa’ Ọghẹnẹ ọ ta, ‘re who fi ibruwou hiẹe.’ Ibruwou na e rọ kẹ Noa avọ ekru riẹ, gbe erao na, avọ emuore nọ a rẹ gwọlọ.

Ọghẹnẹ ọ ta kẹe re nọ o ru ak na epanọ ame o gbe fi ruẹe eva ha. Ọghẹnẹ ọ ta nọ; ‘Me ti vi owhe ame ologbo tha te raha akpọ na kpobi. Ohwo kpobi nọ ọ rọ eva ak na ha o re whuẹ.’

Noa avọ emezae riẹ a te yoẹme kẹ Jihova koyehọ a muhọ ẹbọ. Rekọ ahwo nọ i kiọkọ a tẹ hwẹ ọvo. A tẹ ruẹabọhọ eyoma rai. Ohwo ọvuọvo o fievahọ Noa ha nọ ọ ta oware nọ Ọghẹnẹ o bi ti ruẹ kae.

Uviuwou Noa nọ u bi su erao jẹ be kwa emu fihọ ak na

Ebabọ ak na o rehọ oke krẹkri keme o jọ ruaro gaga. Urere riẹ, nọ ikpe buobu e vrẹ no, o te re. Enẹna Ọghẹnẹ ọ tẹ ta kẹ Noa nọ ọ rehọ erao na fihọ ak na. Ọghẹnẹ nọ ọ rehọ ivivẹ eghẹrẹ erao jọ, te ọrọzae te ọraye. Rekọ erọ eghẹrẹ erao efa jọ, Ọghẹnẹ ọ ta kẹ Noa nọ ọ rehọ ihrẹ rai. Ọghẹnẹ ọ ta kẹ Noa re nọ ọ rehọ oghoghẹrẹ evra na kpobi ruọ eva. Noa o te ru nwanọ epanọ Ọghẹnẹ ọ ta.

Uwhremuna, Noa avọ ekru riẹ a tẹ ruọ eva ak na re. Ọghẹnẹ o te wuhu ẹthẹ na. Eva obeva, Noa avọ ekru riẹ a tẹ jẹ hẹrẹ. Dao roro nọ whọ rọ eva ak na kugbae, be hẹrẹ. Kọ ghinọ owhe ọ te jọ epanọ Ọghẹnẹ ọ ta na?

Emuhọ 6:9-22; 7:1-9.



Enọ

  • Bro ahwo a jọ uviuwou Noa, kọ didi odẹ emezae esa riẹ?
  • Oware aghẹruẹ vẹ Ọghẹnẹ ọ ta kẹ Noa nọ o ru, kọ fikieme?
  • Eme erivẹ Noa a ru nọ ọ ta kẹ ae kpahe okọ na?
  • Eme Ọghẹnẹ ọ ta kẹ Noa nọ o ru kpahe erao na?
  • Nọ Ọghẹnẹ ọ kare ẹthẹ okọ na no, eme Noa avọ uviuwou riẹ a re ru?

Enọ efa

  • Se Emuhọ 6:9-22.

    Eme o ru Noa fihọ obọdẹ ọgegagọ ọrọ Ọghẹnẹ uzẹme na? (Emu. 6:9, 22)

    Ẹvẹ Jihova o rri ozighi, kọ ẹvẹ onana u re kpomahọ oghẹrẹ eware ẹkeriotọ omawere nọ ma rẹ salọ? (Emu. 6:11, 12; Ol. 11:5)

    Ẹvẹ ma sae rọ raro kele Noa okenọ ukoko Jihova o tẹ kẹ omai ọkpọvio oware nọ ma re ru? (Emu. 6:22; 1 Jọn 5:3)

  • Se Emuhọ 7:1-9.

    Ẹvẹ uzẹme na nnọ Jihova o rri Noa ọzae sebaẹgba na wọhọ ohwo okiẹrẹe o rẹ rọ ta udu họ omai awọ nẹnẹ? (Emu. 7:1; Itẹ 10:16; Aiz. 26:7)