Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 8: Egwara eva Otọakpọ

Ikuigbe avọ 8: Egwara eva Otọakpọ

OTẸRỌNỌ ohwo jọ ọ be nya bru owhẹ tha yọ o theri te okpo uwou ra, ẹvẹ who re roro? Ohwo ọyena yọ ogwara! Oke jọ o jọ nọ egwara eghinẹ jọ otọakpọ na. Ebaibol o dhesẹ nọ esẹ rai yọ enjẹle nọ i no obọ odhiwu ze. Rekọ ẹvẹ oyena o sae rọ jọ?

Egwara egeva

Kareghẹhọ, Setan ẹnjẹle oyoma na o bi he ru ukpokpoma gaga. Ọ tubẹ jẹ gwọlọ raha injẹle Ọghẹnẹ dede. Oke u ti te, enjẹle enana jọ i te mu ezọ họ ẹgaviẹ kẹ Setan. A tẹ se iruo nọ Ọghẹnẹ ọ rọ kae eva obọ odhiwu ba. A tẹ ze obọ otọakpọ obonẹ avọ oma ahwo nọ a ru k’oma rai. Whọ riẹ oware nọ osoriẹ?

Ebaibol ọ ta nọ fiki nọ emọ Ọghẹnẹ enana e ruẹ eya iwowoma eva otọakpọ a tẹ gwọlọ nọ ae a re lelae ria. Fikiere a tẹ ze otọakpọ te rọo eya enana. Ebaibol ọ ta nọ onana o thọ, keme Ọghẹnẹ o ru enjẹle na re a ria obọ odhiwu.

Nọ enjẹle na avọ eya rai a je yẹ emọ, emọ na i te wo ohẹriẹ. Ọsosuọ o te jọ nọ e nwani wo ohẹriẹ ga hrọ họ. Rekọ a te muhọ ẹro ẹro họ, gbe ẹga ẹga h’aro bẹsenọ a ti ro zihe ruọ egwara.

Egwara enana e jọ yoyoma. Yọ fiki nnọ a jẹ ruaro, gaga, a tẹ jẹ nwa ahwo oma. A jẹ daoma gba ahwo kpobi họ re a jọ yoyoma wọhọ ae oma rai.

Yọ Enọk o whu no, rekọ ọzae ọvo jọ ọ jọ otọakpọ eva oke onana nọ owoma. Odẹ ọzae ọnana họ Noa. Ẹsikpobi o je he ru oware nọ Ọghẹnẹ ọ gwọlọ nọ o ru.

Ẹdẹ jọ Ọghẹnẹ ọ tẹ ta kẹ Noa nọ oke u te no nọ Ọye ọ te rọ raha ahwo oyoma na kpobi. Rekọ Ọghẹnẹ o bi ti siwi Noa, uviuwou riẹ gbe erao na buobu. Ma ri epanọ Ọghẹnẹ o ru onana.

Emuhọ 6:1-8; Jud 6.



Enọ

  • Eme ọ via nọ ijẹle Ọghẹnẹ jọ a gaviezọ kẹ Setan?
  • Fikieme ijẹle jọ a rọ siọ iruo rai evaọ obọ odhiwu ba jẹ ziọ otọakpọ?
  • Fikieme o jẹ thọ re ijẹle na a ziọ otọakpọ je nwene kpohọ oma ahwo-akpọ?
  • Eme ọ jọ oma emọ ijẹle na wo ohẹriẹ?
  • Wọhọ epanọ whọ rẹ sae jọ uwoho na ruẹ na, eme emọ ijẹle na a ru okenọ a zihe ruọ egwara no?
  • Nọ Enọk o whu no, ọzae owoma vẹ ọ jọ otọakpọ na, kọ fikieme ọ rọ were Ọghẹnẹ?

Enọ efa

  • Se Emuhọ 6:1-8.

    Eme Emuhọ 6:6 u dhesẹ kpahe epanọ uruemu mai o sai ro kpomahọ Jihova? (Ol. 78:40, 41; Itẹ 27:11)

  • 2. Se Jud 6.

    Ẹvẹ ijẹle “nọ e yọre ọkwa rai hi” evaọ edẹ Noa a rọ rrọ oware ekareghẹhọ kẹ omai nẹnẹ? (1 Kọr. 3:5-9; 2 Pita 2:4, 9, 10)