Kpohọ eme nọ e riẹ eva

Kpohọ oria izoẹme

Ikuigbe avọ 4: Oware nọ Osoriẹ nọ A je Ku Uwou Rai Kufiẹ

Ikuigbe avọ 4: Oware nọ Osoriẹ nọ A je Ku Uwou Rai Kufiẹ

WHO riwi oware nọ o be via enẹna. A bi le Adamu avọ Ivi no ogege Idẹn owowoma na. Whọ riẹ oware nọ osoriẹ?

Adamu avọ Ivi nọ a bi le no ọgbọ Idẹn

Fiki nọ a ru oware jọ nọ u yoma gaga. Fikiere Jihova ọ tẹ be kae uye. Whọ riẹ oware uyoma nọ Adamu avọ Ivi a ru?

A ru oware jọ nọ Ọghẹnẹ ọ ta kae nọ a re ruẹ hẹ. Ọghẹnẹ ọ ta kae nọ a sae re emu no ire nọ e jọ ogege na. Rekọ ure jọ Ọghẹnẹ ọ ta nọ a rẹ jọ ria ha, ogbẹrọ-erehe a re whuẹ. Ọ sẹro ure oyena wọhọ orobọ riẹ. Yọ ma riẹ nọ othọ re ohwo ọ rehọ oware omọfa, ma riẹ ere? Kọ, eme ọvia?

Ẹdẹ jọ nọ Ivi ọvo ọ jọ eva ogege na, araumuomu ọ tẹ ta ẹme kẹe. Who roro oyena! Ọ ta kẹ Ivi nọ ọ re ubi ure nọ Ọghẹnẹ ọ ta kẹ ae nọ a ria ha na. Whaọ, nọ Jihova o ru eraumuemu, o ru rai re a sae tẹme he. Fikiere onana u dhesẹ nọ omọfa jọ o ru nọ araumuemu na ọ jẹ tẹme na. Ono họ ọyena?

Adamu hu. Fikiere orẹ jọ nọ omọvo ahwo nọ Jihova o ru kri no tao re o te ru otọakpọ na. Ahwo ọyena enjẹle, ma rẹ sae ruerae he. Ẹnjẹle ọnana o ti ri omariẹ rro gaga. O te muhọ eroro nọ ufo re ọye osu wọhọ Ọghẹnẹ. Ọ tẹ gwọlọ nọ ahwo a yo ẹme kẹe ukpenọ a yo ẹme kẹ Jihova. Ọyehọ ẹnjẹle nọ o ru araumuemu na tẹme.

Ẹnjẹle ọnana ọ tẹ sae viẹ Ivi họ. Nọ ọ ta kẹe nọ ọye ọ rẹ te jọ wọhọ Ọghẹnẹ okenọ ọ re ubi-ure na no, o te ghine fievahọ ẹme na. Fikiere ọ tẹ re, Adamu ọ tẹ jẹ re re. Adamu avọ Ivi a ghọẹmeeyo kẹ Ọghẹnẹ, kọ oye osoriẹ ze nọ a je ku uwou ogege owowoma rai na kufiẹ.

Rekọ, eva ẹdẹ jọ Ọghẹnẹ ọ te ruẹ nọ a ru otọakpọ na kpobi wowoma wọhọ ogege Idẹn na. Oke ofa ma ti wuhrẹ epanọ whọ sai ro wo obọ kugbe ruei fihọ edhere otiọye. Rekọ enẹna, ma gwọlọ oware nọ o via kẹ Adamu avọ Ivi.

Emuhọ 2:16, 17; 3:1-13, 24; Eviavia 12:9.



Enọ

  • Evaọ uwoho na, eme ọ be via kẹ Adamu avọ Ivi na?
  • Fikieme Jihova ọ rọ kẹ ae uye?
  • Eme araomuomu jọ ọ ta kẹ Ivi?
  • Ono o ru araomuomu na ta ẹme kẹ Ivi?
  • Fikieme Adamu avọ Ivi a ro ku uwou Aparadase rai fiẹ?

Enọ efa

  • Se Emuhọ 2:16, 17 gbe 3:1-13,24.

    Oghẹrẹ vẹ onọ nọ araomuomu na ọ nọ Ivi o rọ kẹ Jihova ekpehre odẹ? (Emu. 3:1-5; 1 Jọn 5:3)

    Ẹvẹ Ivi ọ rọ rrọ oriruo unuovẹvẹ k’omai? (Fil. 4: 8; Jem. 1:14, 15; 1 Jọn 2:16)

    Edhere vẹ Adamu avọ Ivi a je ro gu oware nọ a ru na no uzou? (Emu. 3:12, 13)

    Ẹvẹ ijẹle nọ a fihọ ovatha-ọre ogba Idẹn na a ro kru esuo-ehrugbakpọ Jihova kpehru? (Emu. 3:24)

  • Se Eviavia 12:9.

    Ẹvẹ Setan ọ kparobọ te no evaọ ahwo-akpọ ọrẹriẹ siọ esuo Ọghẹnẹ ba? (1 Jọn 5:19)