Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 10: Owhe Ologbo Na

Ikuigbe avọ 10: Owhe Ologbo Na

OBỌ otafe ak na, ahwo a gbe je yere uzuazọ rai vrẹ epa anwẹdẹ. A re rọwo ghele nnọ owhe na ọ te ghinẹ tha ha. O sae jọ nọ a jẹ tubẹ hwẹ vi epa anwẹdẹ kpobi. Rekọ, u ri krihi na, a tẹ seba ẹhwẹ.

Ahwo nọ ozọ u bi mu gbe erao nọ ame ọ wariẹ họ

Idudhe na, ame o te muhọ ekie tha. O je hwẹ no obọ ehru ze wọhọ epanọ a re ku ame no ubokiti tha. Uzẹme Noa ọ ta! Rekọ oke o vabọ no kẹ omọfa kpobi nọ ọ hẹ gwọlọ ruọ ak na. Jihova o wuhu ẹthẹ na gbadi no.

U ri kri hi na, otọ ukpokpotọ kpobi o tẹ te vọ no. Ame na ọ tẹ te wọhọ ithẹ ilogbo. O gele ire kie je ghelie itho ilogbo, avọ edo gaga. Ozọ u te je mu ahwo na. A tẹ jẹ gadiẹ kpohọ eria nọ i kpehru. O, epanọ orẹ jọ rai oja te nọ dodo kọ ae a gaviezọ kẹ Noa re a ruọ eva ak na oke nọ ẹthẹ na o gbe rovie kae! Rekọ enẹna oke o vabọ no.

Ame na o te muhọ ekpehru họ ekpehru. Eva edẹ 40 gbe eso 40 ame na o je hwẹ no obọ ehru ze. Ọ gadiẹ igbehru na, yọ u ri kri hi na, igbehru nọ e mai kpehru kpobi i te ruru no. Koyehọ, nwane wọhọ epanọ Ọghẹnẹ ọ ta, te ahwo te erao kpobi nọ e jọ obọ otafe ak na i te whu. Rekọ ọnọ ọ jọ obọ eva riẹ kpobi ọ tẹ zọ.

Noa avọ emezae riẹ a ru iruo ezi nọ a rọ bọ ak na. Ame na ọ jẹ kpariẹe kpehru, o te je vori eva ehru ame na. Koyehọ ẹdẹ jọ, nọ oso na ọ seba ẹrọ no, ọre na o te muhọ elo. K’ẹvẹ ughe riẹ o jọ te! Abade ọvuọvo ọ jọ oria kpobi. Yọ oware ovuovo nọ a rẹ sae ruẹ kọ ak na nọ o bi vorẹ.

Ak nọ o bi vori evaọ ehru ame

Egwara na i no rie no. A gbẹ jariẹ ofa re a nwa ahwo oma ha. Aikpobi a whu no, avọ ini rai gbe ahwo oyoma nọ i kiọkọ kpobi. Kọ, eme ọvia kẹ esẹ rai?

Esẹ egwara na e jọ uvi ahwo wọhọ omai hi. Ae yọ enjẹle nọ e ze obọ otọ obonẹ te ria wọhọ ahwo evaọ otọakpọ. Fikiere nọ owhe na ọ ze, a gbe whu kugbe ahwo nọ a kiọkọ họ. A se oma ahwo nọ a ru na ba, a te zihe kpohọ obọ odhiwu wọhọ enjẹle. Rekọ a gbẹ rọwo kae re a gbẹ jọ kugbe uviuwou enjẹle Ọghẹnẹ hẹ. Fikiere a te zihe ruọ enjẹle Setan. Eva Ebaibol a re sae nọ izi igbegbe.

Ọghẹnẹ o te ru ofou fou, ame owhe na o te muhọ ekpotọ. Nọ emera isoi e jẹ vrẹ no, ak na o te serihọ eva ehru ugbehru jọ. Edẹ efa buobu e tẹ vrẹ, koyehọ ahwo nọ a jọ eva ak na a sae ri obotafe ruẹ ehru igbehru na. Ame na o te gbe bi he kpotọ bi kpotọ.

Koyehọ Noa o te siobọno ọvra obiebi jọ nọ a re se ọkọlọbe no ak na. Ọ tẹ ra vrẹ omoke o ve zihe ze keme ọ ruẹ omamọ oria ovuovo nọ o re kiemu hu. O te ru erere yọ oke kpobi nọ o zihe ze o ve kiemu ak na.

Ọkọlọbe

Noa ọ gwọlọ ruẹ sọ ame na ọ kpọ no otọ na no, fikiere o te ti vi erueruẹ no ak na no. Rekọ erueruẹ na o te zihe ze re keme ọ ruẹ oria nọ ọ rẹ ria ha. Noa o te vie i vrẹ orọ avivẹ, ọ tẹ wha obe olivi ze eva ugbunu riẹ. Fikiere Noa ọ tẹ riẹ nọ ame na ọ kpọ no. Noa o te vie erueruẹ na orọ avesa, urere riẹ ọ tẹ ruẹ oria oyaya nọ ọ rẹ ria.

Ọghẹnẹ ọ tẹ ta eme kẹ Noa. Ọ tẹ ta nọ: ‘Nya no ak na no. Rehọ uviuwou ra kpobi gbe erao na lele oma.’ A jọ eva ak na kri vi ẹgbukpe soso. Fikiere ma sai roro epanọ eva e rẹ werai te re a jẹ wariẹ ruọ otafe yọ a rọ uzuazọ!

Emuhọ 7:10-24; 8:1-17; 1 Pita 3:19, 20.



Enọ

  • Fikieme uvumọ ohwo ọ gbẹ sae rọ rueva okọ na ha nọ oso na o muhọ ẹrọ no?
  • Bro edẹ gbe aso Jihova o ru oso rrọ, kọ ẹvẹ ame na o bu te?
  • Eme ọ via kẹ okọ na nọ ame na o muọ otọakpọ na họ ẹvọ no?
  • Kọ egwara na a zọ vrẹ Owhe na, kọ eme ọ via kẹ esẹ egwara na?
  • Eme ọ via kẹ okọ na nọ emerae isoi e vrẹ no?
  • Fikieme Noa o ro siobọno ọkọlọbe no okọ na ruọ otafe?
  • Ẹvẹ Noa ọ rọ riẹ inọ ame ọ kpọ no otọakpọ na no?
  • Eme Ọghẹnẹ ọ ta kẹ Noa nọ tei te uviuwou riẹ a jọ evaọ okọ na vrẹ ukpe ovo no?

Enọ efa

  • Se Emuhọ 7:10-24.

    Ẹvẹ ọraha nọ a ro te emama uzuazọ evaọ otọakpọ na ọ kẹre te? (Emu. 7:23)

    Ẹvẹ u kri te re ame Owhe na ọ tẹ kpọ? (Emu. 7:24)

  • Se Emuhọ 8:1-17.

    Ẹvẹ Emuhọ 8:17 u ro dhesẹ nọ ẹjiroro ọsosuọ Jihova kẹ otọakpọ na o nwene he? (Emu. 1:22)

  • Se 1 Pita 3:19, 20.

    Okenọ ijẹle aghẹmeeyo na a zihe kpohọ odhiwu, didi oziẹ a bru kpe ai? (Jud 6)

    Ẹvẹ ikuigbe Noa avọ uviuwou riẹ e rọ bọ udufihọ mai ga fihọ ẹgba Jihova nọ o re ro siwi ahwo riẹ? (2 Pita 2:9)