Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe 1: Ọghẹnẹ Ote Mu Eware Họ Eruo

Ikuigbe 1: Ọghẹnẹ Ote Mu Eware Họ Eruo

EWARE iwoma nọ ma wo kpobi, obọ Ọghẹnẹ i no ze. Ọye o ru ọre na re ọ kẹ omai elo eva uvo, gbe ọvẹre avọ isi re ma sae wo emelo jọ eva aso. Yọ Ọghẹnẹ o ru otọakpọ na re ma ria e.

Rekọ ọre, ọvẹre, gbe isi avọ otọakpọ na họ eware ọsosuọ nọ Ọghẹnẹ o ru hu. Kọ whọ riẹ eware ọsosuọ? Ọghẹnẹ ọ kaki ru ahwo wọhọ oma riẹ. Ma sae ruẹ ahwo ọnana ha, epanọ ma sae ruẹ Ọghẹnẹ hẹ na. Eva Ebaibol a se ahwo ọnana enjẹle. Ọghẹnẹ o ru enjẹle na re a ria kugbei eva obọ odhiwu.

Ẹnjẹle ọsosuọ nọ Ọghẹnẹ o ru ọ jọ oghẹrẹ sa. Ọye họ Ọmọ ọsosuọ Ọghẹnẹ, yọ o lele Ọsẹ riẹ je ru iruo. O fiobọhọ kẹ Ọghẹnẹ ru eware nọ i kiọkọ kpobi, O fiobọhọ kẹ Ọghẹnẹ ru ọre, ọvẹre, gbe isi avọ otọakpọ mai.

Ẹvẹ otọakpọ na o jọ eva oke oyena? Eva emuhọ ohwo ọvuọvo ọ sae ria otọakpọ na ha. Oware ovuovo o jariẹ hẹ ajokpa abade ologbo ọvo nọ ọ jọ otọ na. Rekọ Ọghẹnẹ ọ gwọlọ ahwo re a ria otọakpọ na. Fikiere o te mu eware họ ẹruẹrẹ fihọ k’omai. Eme o ru?

Whaọ, orọ ọsosuọ u fo re otọakpọ na u wo elo. Fikiere Ọghẹnẹ ọ tẹ ma elo rono ọre ze re o lo fihọ akpọ na. Ọ ma onana re oke-aso gbe oke-uvo o jọ. Uno ere no, Ọghẹnẹ o te ru re otọ o rehọ oma via kpehru vi abade ologbo na.

Oke ọsosuọ oware ovo o jọ otọ na ha. O jọ wọhọ ifoto nọ whọ be ruẹ na. Idodo, ire gbe erao e jariẹ hẹ. Tobọ eri ọvuọvo ọ jọ ebade ilogbo na ha. Iruo buobu e gbẹ jọ nọ Ọghẹnẹ o re ruẹ tao re otọakpọ na o tẹ te jọ ziezi rọ kẹ erao gbe ahwo nọ a rẹ ria.

Jerimaya 10: 12; Ahwo Kọlọsi 1: 15-17; Emuhọ 1: 1- 10.

Otọ ufofe


Enọ

  • Bovẹ eware iwoma kpobi i no ze, kọ whọ sae kẹ oriruo jọ?
  • Eme họ oware ọsosuọ nọ Ọghẹnẹ ọ ma?
  • Fikieme ẹnjẹle ọsosuọ na ọ rọ rrọ obọdẹ?
  • Dhesẹ epanọ otọakpọ na o jọ evaọ emuhọ. (Rri uwoho na.)
  • Ẹvẹ Ọghẹnẹ o ro muọ otọakpọ na họ ẹruẹrẹhọ kẹ erao gbe ahwo?

Enọ efa

  • Se Jerimaya 10: 12.

    Ekwakwa Ọghẹnẹ vẹ i dhesẹ oma via evaọ emama riẹ? (Aiz. 40:26; Rom 11: 33)

  • Se Ahwo Kọlọsi 1: 15-17.

    Didi abọ Jesu o wo evaọ emama, kọ ẹvẹ onana u re kpomahọ oghẹrẹ nọ ma re rri rie? (Kọl. 1:15-17)

  • Se Emuhọ 1:1-10.

    Ẹvẹ otọakpọ na o rọ nyaze? (Emu. 1:1)

    Eme ọ via evaọ ẹdẹ ọsosuọ emama? (Emu. 1:3-5)

    Dhesẹ oware nọ o via evaọ ẹdẹ avivẹ emama. (Emu. 1:7, 8)