Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 116: Epanọ Ma Sae Rọ Ria Bẹdẹbẹdẹ

Ikuigbe avọ 116: Epanọ Ma Sae Rọ Ria Bẹdẹbẹdẹ

WHỌ sae ta oware nọ ọmọtẹ ọsese na avọ egbẹnyusu riẹ a bi se na? Ẹhẹ, obe onana nọ who bi se na—Obe Ikuigbe Ebaibol Mẹ. Yọ iku nọ a bi se na eyevo na whọ rọ na—“Epanọ Ma Sae Rọ Ria Bẹdẹbẹdẹ.”

Ọmọzae nọ o bi se obe

Kọ whọ riẹ oware nọ a bi wuhrẹ na? Orọsosuọ, ufo re ma riẹ kpahe Jihova gbe Jesu Ọmọ riẹ otẹrọnọ ma gwọlọ ria bẹdẹbẹdẹ. Ebaibol na eta nọ: ‘Onana họ edhere nọ arọ ria bẹdẹbẹdẹ. Wuhrẹ kpahe Ọghẹnẹ uzẹme ọvuọvo na, gbe Ọmọ nọ o vi ze akpọ na, Jesu Kristi.’

Ẹvẹ ma rẹ sai ro wuhrẹ kpahe Jihova Ọghẹnẹ gbe Jesu Ọmọ riẹ? Edhere jọ họ isase Obe Ikuigbe Ebaibol Mẹ no emuhọ te ekuhọ. Ota eware buobu kpahe Jihova gbe Jesu, u gbe ru ere? Otẹ jẹ ta kpahe eware buobu nọ a ru vrẹ no jegbe eware nọ a bi ti ru. Rekọ ufore ma ru vi obe onana ọvo nọ ma re se.

Ebaibol

Kọ whọ ruẹ obe odekọ nọ orọ otuwou na? Oye họ Ebaibol na. Jọ ohwo jọ ose eria Ebaibol nọ ikuigbe obe onana inoze kẹ owhẹ. Ebaibol ekẹ omai eriariẹ egbagba no ma gwọlọ re mai kpobi a sae gọ Jihova eva uvi edhere je wo uzuazọ ebẹdẹbẹdẹ. Fikiere kọ Ebaibol iwuhrẹ ma re zihe ruọ uruemu kẹse kẹse.

Rekọ ewuhrẹ kpahe Jihova Ọghẹnẹ gbe Jesu Kristi ọvo o te he. Ma rẹ sai wo eriariẹ buobu buobu kpahae jegbe iwuhrẹ rai, ababọ uzuazọ ebẹdẹbẹdẹ u wo. Kọ whọ riẹ oware ofa nọ a gbẹ gwọlọ?

Ufo re ma yeri uzuazọ nọ orọwo kugbe eware nọ ma wuhrẹ na re. Kọ whọ kareghẹhọ Judas Iskariọt? Ọ jọ omọvo 12 nọ Jesu ọ salọ re a jọ ikọ riẹ. Judas o wo eriariẹ buobu kpahe Jihova gbe Jesu. Rekọ eme ọvia kẹe? Nọ oke jọ ovrẹ no o te wo oriobọ, o te vivie Jesu kẹ ewegrẹ riẹ ewẹ idọlọ efuafo 30. Fikiere Judas o re ti wo uzuazọ ebẹdẹbẹdẹ hẹ.

Kọ whọ kareghẹhọ Gehazi, ọzae nọ ma wuhrẹ kpahe evaọ Ikuigbe Avọ 69? Ọ gwọlọ wo iwu jọ gbe igho nọ erọ eriẹ hẹ. Fikiere ọ tẹ ta ọrue re ọ ruẹse wo eware enana. Rekọ Jihova ọ kẹ riẹ uye. Yọ ọ rẹ te kẹ omai uye re otẹrọnọ ma gbe yo ẹme kẹ izi riẹ hẹ.

Rekọ ahwo iwoma buobu a rọ enọ egọ Jihova gbagba ẹsikpobi. Ma gwọlọ jọ wọhọ ae, ma gwọlọ ere? Samuẹle ọsese yọ emamọ oriruo nọ a re lele. Kareghẹhọ, wọhọ epanọ ma ruẹ evaọ Ikuigbe Avọ 55, ikpe ene hayo isoi ọvo ọkpako te okenọ o mu Jihova họ ẹgọ evaọ uwoudhu egagọ riẹ. Fikiere epanọ whọ maha te kpobi, whọ maha hrọ kẹ Jihova ọ gọ họ.

Dede na, ohwo nọ mai kpobi a gwọlọ lele họ Jesu Kristi. Tubọ oke nọ ọ gbẹ jọ ọmaha, wọhọ epanọ Ikuigbe Avọ 87 idhesẹ, ọjọ evaọ tẹmple jẹ tẹme kẹ amọfa kpahe Ọsẹ riẹ obọ odhiwu. J’oma lele oriruo riẹ. J’oma ta kẹ ahwo buobu epanọ ma rẹ sae ta te kpahe Ọghẹnẹ ogbunu mai Jihova avọ Ọmọ riẹ, Jesu Kristi. Otẹrọnọ ma ru eware enana, kọ ẹsiẹe ma rẹ te sae ria bẹdẹbẹdẹ evaọ aparadase ọkpokpọ Ọghẹnẹ evaọ otọakpọ.

Jọn 17:3; Olezi 145:1-21.



Enọ

  • Eme u fo nọ ma rẹ riẹ ma tẹ gwọlọ rria bẹdẹ bẹdẹ?
  • Ẹvẹ ma sai ro wuhrẹ kpahe Jihova Ọghẹnẹ gbe Jesu, wọhọ epanọ ọmọtẹ ọboba avọ egbẹnyusu riẹ nọ e rrọ uwoho na a bi ru na?
  • Obe ofa vẹ whọ be jọ uwoho na ruẹ na, kọ fikieme ma je sei kẹse kẹse?
  • U te no ewuhrẹ kpahe Jihova gbe Jesu no, eme ọfa o gwọlọ re a sai wo uzuazọ ebẹdẹ bẹdẹ?
  • Eme ma wuhrẹ rono Ikuigbe avọ 69 na ze?
  • Eme emamọ oriruo ọrọ Samuẹle ọmaha na evaọ Ikuigbe avọ 55 u dhesẹ?
  • Ẹvẹ ma sai ro lele oriruo Jesu Kristi, yọ ma te ru ere, eme ma te sai ru evaọ obaro?

Enọ efa

  • Se Jọn 17:3.

    Ẹvẹ Ikereakere na i ro dhesẹ nọ ewuhrẹ eriariẹ Jihova Ọghẹnẹ gbe Jesu Kristi o gwọlọ vi uzẹme na nọ ma re se fihọ uzou ọvo? (Mat. 7:21; Jem. 2:18-20; 1 Jọn 2:17)

  • Se Olezi 145:1-21.

    Evẹ jọ họ usu ẹjiroro buobu nọ ma re ro jiri Jihova? (Ol. 145:8-11; Evia. 4:11)

    Ẹvẹ Jihova o ro “woma kẹ ahwo kpobi,” kọ ẹvẹ onana u re ro si omai kẹle iẹe viere? (Ol. 145:9; Mat. 5:43-45)

    Ma te ghine you Jihova ziezi evaọ udu mai, eme oma o rẹ wọ omai ru? (Ol. 119:171, 172, 175; 145:11, 12, 21)