Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 111: Ọmọzae Nọ Okiero Owezẹ

Ikuigbe avọ 111: Ọmọzae Nọ Okiero Owezẹ

OH! OH! Eme ọ rẹ via etenẹ? Kọ ọmọzae nọ ọrọ obotọ na ọ nwa oma gaga? Rri! Omọvo ahwo nọ a bi no uwou na tha na họ Pọl! Kọ whọ jọ etenẹ ruẹ Timoti re? Kọ unwido na ọmọzae na okie no ze?

Pọl nọ ọ be nyaze te kpare Yotikọs

Ẹhẹ, nwanọ ere ovia. Pọl ọ jẹ ta ẹme kẹ ilele na evaọ Troas. Ọ riẹ nọ ọ rẹ te kake wariẹ rue rae he keme okiokiọ riẹ orọ okọ o re ti ro kpo. Fikiere ọ tẹ ta ẹme rri te udevie aso.

Whaọ, ọmọzae ọnana nọ a re se Yutikọs na yọ ọkeria unwido o te kiero owezẹ. O te kie no unwido edhe avesa ze fihọ otọ! Kọ oye osoriẹ nọ ahwo ọnana a jẹrọ awa gaga na. Okenọ ahwo akpare ọmọzae na no otọ, nwanọ epanọ aroro na. Owhu no!

Okenọ Pọl ọ ruẹ nọ ọmọzae na owhu no, o te kiẹzẹ ehru riẹ ọ tẹ gbaliẹe. Kẹsena ọ tẹ ta nọ: ‘Wha ro awa ha. Ọsasa no!’ Yọ ere orọ! Orọ oware ugbunu! Pọl ọ zoma zihiei ze uzuazọ no! Edo oghọghọ ọ tẹ vẹ ruọ udevie ogbotu na.

Aikpobi a tẹ zoma kpobọ ubruwou ehru a tẹ re emu. Pọl ọ tẹ thọrọ obọ họ ẹmeọta bẹse nọ oke orọ ke. Rekọ whọ vẹ riẹ nọ Yutikọs ọ gbẹ wezẹ ofa ha! Kẹsena Pọl, Timoti gbe enọ a gbẹ rọ erẹ na a tẹ ruọ okọ na. Kọ whọ riẹ obo nọ a rẹ nya?

Pọl ọ be nwani kuọ erẹ avesa ovuẹ-ovuẹ riẹ họ obọ na, kọ ekpo ore kpo na. Evaọ erẹ ọnana Pọl ọria okpẹwho ọ Ẹfẹsọs ọvo ikpesa. Fikiere erẹ ọnana okri viọ ọrọ avivẹ riẹ.

Nọ a no Troas, okọ na otẹ dẹji Militọs omoke jọ. Fiki nọ no etẹ te Ẹfẹsọs emaele kakao, Pọl ọ tẹ vuẹ se ekpako nọ erọ ukoko na re a nyaze obọ Militọs kpere ọ sae ta ẹme urere rọ kae. Uwhremuna, nọ oke nọ okọ na u re ro lehọ u te, ẹvẹ a weri te inọ Pọl o bi ghine kpo!

Ukuhọ riẹ okọ na u te zihe ze obọ Sisaria. Epanọ Pọl ọ be rọ ria evaọ uwou Filip olele na, Agabọs ọruẹaro na ọ tẹ vẹvẹ Pọl unu. Ọ tẹ ta nọ Pọl o ti kpohọ ọnọ amuimu okenọ o te obọ Jerusalem. Ghinọ uzẹme nnọ, onana họ onọ ovia. Koyehọ, okenọ ọ ria uwou-odi ikpe ivẹ no evaọ Sisaria, a tẹ rehọ Pọl kpobọ Rom re Siza osu Rom ọ rehiẹe gu ẹdhọ. J’oma ruẹ oware nọ oviae evaọ ẹnya kpobọ Rom.

Iruẹru izou 19 ri te 26.



Enọ

  • Evaọ uwoho na, ono họ ọmọzae nọ ọ rrọ otọ na, kọ eme ọ via kẹe?
  • Eme Pọl o ru nọ ọ ruẹ nnọ ọmọzae na o whu no?
  • Diẹse Pọl, Timoti, gbe enọ e rrọ kugbe ai na a bi kpohọ, kọ eme ọ via nọ a daji Militọs?
  • Didi unuovẹvẹ Agabọs ọruẹaro na ọ kẹ Pọl, kọ ẹvẹ o rọ nwane via wọhọ epanọ ọruẹaro na ọ ta na?

Enọ efa

  • Se Iruẹru 20:7-38.

    Ẹvẹ ‘azẹ ahwo kpobi ọ sai ro no omai uzou’ wọhọ epanọ Pọl ọ ta eva Iruẹru 20:26, 27 na? (Izik. 33:8; Iruẹru 18:6, 7)

    Fikieme ekpako a jẹ “yọrọ uzẹme ẹme” na nọ a te bi wuhrẹ? (Iruẹru 20:17, 29, 30; Tait. 1:7-9; 2 Tim. 1:13)

  • Se Iruẹru 26:24-32.

    Ẹvẹ Pọl ọ rọ rehọ udu-ọmotọ Rom nọ ọ rrọ rọ wha usiuwoma ota nọ Jesu o muhọ iẹe obọ na haro? (Iruẹru 9:15; 16:37, 38; 25:11, 12; 26:32; Luk 21:12, 13)