PITA ukọ na ọye odikihẹ etẹ na, enọ erọ emu riẹ na yọ egbẹnyusu riẹ jọ. Rekọ fikieme ọzae na ọ jẹrọ igwẹ eki kẹ Pita? Kọ ufore o ru oyena? Kọ whọ riẹ ohwo nọ ọrọ?

Pita nọ o bi weze bru Kọniliọs

Ọzae na yọ Kọniliọs. Ọ yehọ olori otuẹmo ahwo Rom. Kọniliọs ọ riẹ Pita ha rekọ ata kẹe nọ osei ze uwou riẹ. Epanọ onana orọ ze j’oma kiẹe via.

Ilele ọsosuọ Jesu họ ahwo i Ju, rekọ Kọniliọs ohwo i Ju hu. Dede na yọ oyou Ọghẹnẹ, ọ rẹ lẹ sei, o ve je ru eware iwoma buobu kẹ ahwo. Whaọ, uvo ẹdẹjọ ẹnjẹle ọ tẹ via kẹe jẹ ta nọ: ‘Eva ra ewere Ọghẹnẹ, yọ o bi ti yo elẹ ra. Vi ahwo jọ re a nyae rehọ ohwo jọ nọ a re se Pita ze. Ọrọ evaọ uwou Saimọn, ọnọ ọ be ria akotọ abade evaọ obọ Jopa.’

Whaọ, Kọniliọs ọ tẹ nwani vi ahwo jọ nyae gwọlọ Pita. Okiokiọ riẹ nọ ahwo na a be kẹle Jopa no, yọ Pita ọrọ obọ edhe ehru uwou ọ Saimọn. Etẹe Ọghẹnẹ o je ru Pita roro nọ ọye ọruerẹ ogbru-ohọ ologbo nọ o bi no ehru ze otọ. Karao karao ọrọ evaọ ogbru-ohọ na. Epanọ uzi Ọghẹnẹ orọ, nọ erao igbegbe nọ ifo ẹriọ họ, dede ghele urru ẹme otẹ ta nọ: ‘Pita, kparoma. Kpe whọ re.’

‘Ijo!’ ere Pita o yo. ‘Mẹ rre re oware ugbegbe ẹdẹvo ho!’ Rekọ urru ẹme na otẹ ta kẹ Pita nọ: ‘Oware nọ Ọghẹnẹ ọ ta nọ ofo no siẹe ba ese ugbegbe.’ Isiasa gbagba onana ovia. Epanọ Pita ọ gbẹ rọ gedegede kpahe otọ onana, ahwo nọ Kọniliọs o vi a tẹ ruọ uwou a tẹ nọ onọ Pita.

Pita o te nwotọ ze ọ tẹ ta nọ: ‘Mẹ họ ohwo nọ wha rẹ gwọlọ na. Fikieme wha jẹ nyaze?’ Okenọ ahwo na adhesẹ nọ ẹnjẹle ọ ta kẹ Kọniliọs nọ o zizie Pita kpobọ uwou riẹ, Pita ọ tẹ rọwo nọ ore lelai kpo. Okiokiọ riẹ, Pita avọ egbẹnyusu a tẹ nyae ruẹ Kọniliọs evaọ obọ Sisaria.

Kọniliọs o te koko egbẹnyusu ekpekpe gbe imoni riẹ họ. Okenọ Pita ọ nyaze, Kọniliọs o te zerie. O te kie fihọ otọ digwẹ evaọ awọ Pita, epanọ whọrẹ ruẹ na. Rekọ Pita ọ tẹ ta nọ: ‘Tovrẹ; mẹ oma mẹ ohwo ọvo mẹ rọ.’ Ẹhẹ, Ebaibol na i dhesẹ nọ ufore adigwẹ te otọ gọ ohwo ho. Jihova ọvo ma rẹ gọ.

Pita o te mu usi uwoma họ ẹta kẹ enọ ikoko họ na. ‘Mẹ ruẹ no nnọ Ọghẹnẹ ọ rẹ rehọ ahwo kpobi nọ a gwọlọ gọe,’ ere Pita ọ tae. Epanọ ọ gbẹ rọ ẹme ẹta na, Ọghẹnẹ o te vi ẹzi ọfuafo riẹ ze, ahwo na a te mu evẹrẹ efa sasa họ ẹta. Onana u te gbe ahwo i Ju nọ arọ ilele nọ avọ Pita a gbẹ nyaze unu, keme aroro nọ ahwo i Ju ọvo arẹ were Ọghẹnẹ. Fikiere onana u te wuhrai nọ orọnikọ Ọghẹnẹ o riwi ahwo orẹwho ovojọ woma hayo mae rro Ọghẹnẹ obọ vi ahwo erẹwho edekọ kpobi nọ ikiọkọ họ. Kọ oyena ogbẹrọ oware uwoma kẹ omai kpobi nọ ma rẹ kareghẹhọ?

Iruẹru 10:1-48; 11:1-18; Eviavia 19:10.



Enọ

  • Ono họ ọzae nọ o kigwẹ evaọ uwoho na?
  • Eme ẹnjẹle jọ ọ ta kẹ Kọniliọs?
  • Eme Ọghẹnẹ o dhesẹ kẹ Pita nọ ọ jọ ehru uwou Saimọn evaọ Jọpa?
  • Fikieme Pita ọ rọ ta kẹ Kọniliọs inọ o kigwẹ kẹe re ọ gọe he?
  • Fikieme akpọ o ro gbe ilele ahwo Ju nọ a jọ kugbe Pita unu?
  • Oware ulogbo vẹ ma rẹ jọ iweze nọ Pita o weze bru Kọniliọs na wuhrẹ?

Enọ efa

  • Se Iruẹru 10:1-48.

    Didi oware eme ọ Pita nọ e rrọ Iruẹru 10:42 i dhesẹ kpahe iruo ewhowho emamọ usi Uvie na? (Mat. 28:19; Mak 13:10; Iruẹru 1:8)

  • Se Iruẹru 11:1-18.

    Didi uruemu Pita o dhesẹ okenọ ẹjiroro nọ Jihova o wo kpahe ahwo orẹwho Egedhọ u vẹ no, kọ ẹvẹ ma sae rọ raro kele oriruo riẹ? (Iruẹru 11:17, 18; 2 Kọr. 10:5; Ẹf. 5:17)