Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 107: A Rehọ Itho Fi Stivin

Ikuigbe avọ 107: A Rehọ Itho Fi Stivin

ỌZAE nọ okigwẹ na họ Stivin. Ọye yọ olele owẹrọwọ Jesu. Rekọ ri oware nọ o be via kẹe enẹna! Ahwo ọnana a be rehọ itho ilogbo fiei. Ẹvẹ a je mukpahe Stivin ga te epanọ a bi ro ru oware ugbunu onana? J’oma ruẹ.

Stivin nọ a be rọ itho fi

Ọghẹnẹ o bi he fiobọhọ kẹ Stivin ru eware urirẹ ilogbo. Onana owere ahwo ọnana ha, fikiere a te bi leliei vravro kpahe uzẹme nọ o bi ro wuhrẹ ahwo. Rekọ Ọghẹnẹ ọ tẹ kẹ Stivin areghẹ ologbo, Stivin o te dhesẹ nọ ahwo ọnana eware ọrue a re wuhrẹ. Onana o tẹ liẹliẹ ae muofu ga viere. Fikiere a tẹ tabọ hiẹe, a te se ahwo ze re a wọ ọrue hiẹe uzou.

Olori ozerẹ na ọ tẹ nọ Stivin nọ: ‘Eware enana ghinọ uzẹme?’ Stivin ọ tẹ ta ẹme owoma no Ebaibol ze rọ kẹ uyo. Urere riẹ ọ tẹ ta epanọ ahwo omuomu aro mukpahe eruẹaro Jihova oke anwae. Koyehọ ọ tẹ ta nọ: ‘Ahwo ọyena wha nwane wọhọ. Wha kpe Jesu odibo Ọghẹnẹ, wha gbe je yo ẹme kẹ izi Ọghẹnẹ hẹ.’

Onana o tẹ liẹliẹ ofu mu isu egagọ na vrẹta! A tẹ riakọ rai eva ofu. Rekọ Stivin ọ tẹ kpare uzou riẹ kpo ehru, ọ tẹ ta nọ: ‘Ri! Mẹ ruẹ Jesu nọ odikihẹ obọze Ọghẹnẹ evaọ obọ odhiwu.’ Nọ ahwo ọnana ayo onana, a tẹ rehọ abọ rai za ezọ rai a tẹ họrọ mu Stivin a tẹ tabọ hiẹe a te siei ototọ no okpẹwho na.

A tẹ jọ etenẹ ba iwu rai n’oma a tẹ rehai kẹ Sọl ọmoha na riri. K’owhọ ruẹ Sọl? Koyehọ ahwo na jọ a mu itho họ erofi Stivin. Stivin o te kigwẹ te otọ, epanọ whọ rẹ ruẹ na, ọ tẹ lẹ se Ọghẹnẹ: ‘Jihova whọ kae uye fiki oware uyoma onana ha.’ Ọ riẹ nọ isu egagọ e viẹ ejọ rai họ. Oyena ovrẹ no Stivin o te whu.

Okenọ ohwo jọ o te ru owhẹ oware uyoma jọ, whọ rẹ dao re whọ nwae oma kele, hayo ta kẹ Ọghẹnẹ re ọ nwae oma? Oye họ onọ Stivin hayo Jesu oru hu. A tube you otu nọ oyou rai hi. J’oma daoma rọ aro kele oriruo rai.

Iruẹru 6:8-15; 7:1-60.



Enọ

  • Ono họ Stivin, kọ eme Ọghẹnẹ o bi fi obọ họ kẹe ru?
  • Eme Stivin ọ ta nọ o lẹliẹ eva dha isu egagọ na gaga?
  • Nọ ezae na a si Stivin kpohọ otafe okpẹwho na, eme a ru rie?
  • Evaọ uwoho na, ono họ ọmoha nọ o dikihẹ kẹle iwu na?
  • Taure o te ti whu, didi olẹ Stivin ọ lẹ se Jihova?
  • Evaọ aruorokele Stivin, eme ma re ru otẹrọnọ ohwo jọ o ru omai thọ?

Enọ efa

  • Se Iruẹru 6:8-15.

    Iruemu ẹghẹ vẹ isu egagọ a ro ru iruo no re a daoma whaha iruo usiuwoma ota orọ Isẹri Jihova? (Iruẹru 6:9, 11, 13)

  • Se Iruẹru 7:1-60.

    Eme o fi obọ họ kẹ Stivin wo ona evaọ ẹthọ emamọ usi na evaọ iraro Sanhẹdrin na, kọ eme ma rẹ sai wuhrẹ no oriruo riẹ ze? (Iruẹru 7:51-53; Rom 15:4; 2 Tim. 3:14-17; 1 Pita 3:15)

    Didi uruemu ma re wo kpahe enọ e be wọso iruo mai? (Iruẹru 7:58-60; Mat. 5:44; Luk 23:33, 34)