Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 113: Pọl evaọ Rom

Ikuigbe avọ 113: Pọl evaọ Rom

RRI egbregba nọ erọ Pọl, who je ri ofiẹmo Rom nọ o bi rorie. Pọl yọ ọnọ amuimu evaọ Rom. Ọ be hẹrẹ bẹsenọ Siza Rom ọ rẹ ta onọ a re rue’i. Okenọ ọ gbẹ rọ ọnọ amuimu na, a kẹ ahwo uvẹ re a weze bru ei.

Nọ Pọl o te Rom edesa vrẹ no ọ tẹ vuẹ uwou se isu i Ju jọ re a nyaze te rueriẹ. Fikiere ahwo i Ju buobu nọ arọ Rom a tẹ nyaze. Pọl ọ tẹ vua’e ovuẹ kpahe Jesu gbe uvie Ọghẹnẹ. Ejọ erọwo a te zihe ruọ Ahwo-Kristi, rekọ ejọ erọwo ho.

Pọl nọ ọ rrọ uwou-odi

Pọl ọvuẹ-ovuẹ kẹ oghoghẹrẹ ifiẹmo re, enọ i je ru iruo eroro riẹ. Ikpe ivẹ nọ adariẹ ji etenẹ wọhọ ọnọ amuimu Pọl ọvuẹ-ovuẹ kẹ ahwo kpobi nọ ọ rẹ sae vuẹ. Onọ unorie ze họ makọ uviuwou Siza dede ayo kpahe emamọ usi Uvie na, ejọ rai i te zihe ruọ Ahwo-Kristi.

Rekọ ono họ ọrara nana, nọ ọrọ emẹjẹ bi kere na? Whọ sai mufa? Ẹhẹ, ọye họ Timoti. Timoti ọjọ uwou-odi re fiki evuavuẹ kpahọ Uvie na, rekọ a wariẹ siobọ noi no. Kọ ọ nyaze obonẹ re ofiobọhọ kẹ Pọl. Kọ whọ riẹ oware nọ Timoti o re kere na? J’oma ruẹ.

Kọ whọ kareghẹhọ ikpewho Filipai gbe Ẹfẹsọs evaọ Ikuigbe Avọ 110? Pọl ofiobọhọ rehọ ikoko Ahwo-Kristi mu evaọ ikpewho eyena. Whaọ, okenọ Pọl ọrọ jọ uwou-odi, o te kere ebe-ovuẹ se Ahwo-Kristi enana. Ebe-ovuẹ na erọ evaọ Ebaibol na, a re sai nọ Ahwo Ẹfẹsọs gbe Ahwo Filipai. Enẹna Pọl ọ be ta kẹ Timoti oware nọ o re kere se egbẹnyusu Kristi rai obọ Filipai.

Ahwo-Filipai a you Pọl gaga. A kpeze okẹ sei evaọ uwou-odi obonẹ, oye jabọ nọ Pọl o je bi yerai fiki riẹ. Epafroditọs họ ohwo nọ ọwha okẹ na ze. Rekọ ọ jẹ mọ gaga o je ti whuno. Enẹna ọ wariẹ sasa no ọ tẹ jẹ wọ owọ ukpo no. Ọ rẹ te wha obe-ovuẹ onana n’obọ Pọl avọ Timoti lele oma okenọ o ti zihe kpobọ Filipai.

Okenọ Pọl ọjọ uwou-odi okere obe-ovuẹ ivẹ efa nọ ma wo evaọ Ebaibol na. Ojọ ro se Ahwo-Kristi nọ arọ evaọ okpẹwho ọ Kọlọsi. Kọ whọ riẹ epanọ a re sei? Ahwo-Kọlọsi. Ofa kọ obe-ovuẹ omọvo ro se ogbẹnyusu ọkpekpe nọ a re se Filimọn nọ ọ be ria evaọ Kọlọsi re. Obe-ovuẹ na rọ kpahọ Onisimọs odibo Filimọn.

Onisimọs ọdhẹ se Filimọn ba o te kpobọ Rom. Onisimọs ọ tẹ rehọ edhere jọ riẹ epanọ Pọl ọrọ rọ uwou-odi obonẹ. O te weze brei, Pọl ọ tẹ vuẹ Onisimọs ovuẹ na. Ukrihi Onisimọs o te zihe ruọ Ohwo-Kristi re. Enẹna Onisimọs o te weri fiki epanọ ọ rọ dhẹ. Kọ whọ riẹ oware nọ Pọl okere họ obe-ovuẹ onana se Filimọn?

Pọl ọ ta kẹ Filimọn nọ ọrọ vrẹ Onisimọs. ‘Me bi viei zihe bru owhẹ tha,’ ere Pọl okere. ‘Whaọ enẹna orọnikọ odibo ra ọ gbẹ rọ họ. Rekọ ọ rọ uvi oniọvo Kristi no re.’ Okenọ Onisimọs o zihe kpobọ Kọlọsi ọwha ebe-ovuẹ ivẹ nana lele oma, ovo jọ rọ kẹ Ahwo-Kọlọsi, odekọ rọ kẹ Filimọn. Ma rẹ sae wawo epanọ Filimọn ọghọghọ te okenọ ọ riẹ nọ odibo riẹ o zihe ruọ Ohwo-Kristi no.

Okenọ Pọl okere se Ahwo-Filipai je gbe Filimọn, o wo obọdẹ emamọ usi. ‘Me bi vi Timoti bru owhai tha,’ ere Pọl ọ ta kẹ Ahwo-Filipai. ‘Yọ me re ti bru owhai tha kẹle na re.’ O te, kere se, Filimọn nọ: ‘Ruẹrẹ o ria họ kẹ omẹ nọ mẹ te jọ eva obei.’

Okenọ a siobọ no Pọl no ọ tẹ e ruẹ inievo emezae gbe emetẹ i Kristi riẹ evaọ eria buobu. Rekọ uwhremuna a tẹ wariẹ Pọl mu evaọ Rom. Ọ riẹ nọ ọkpọ na a re ti kpei no. Fikiere o te kere se Timoti ta kẹe nọ ọ nyaze vẹrẹ vẹrẹ. ‘Me wo orọwọ kẹ Ọghẹnẹ, yọ Ọghẹnẹ ọ rẹ te hwa osa kẹ omẹ,’ ere Pọl okere. Nọ a kpe Pọl ikpe kakao vrẹ no, a tẹ wariẹ raha Jerusalem, ọkpọ na kọ Ahwo-Rom.

Rekọ eware egbẹ vọ evaọ Ebaibol na. Jihova Ọghẹnẹ ọ rehọ Jọn ukọ na kere ebe ọ ekuhọ riẹ, te obe Eviavia na te. Obe Ebaibol onana ota ẹme kpahe obaro. J’oma jọ enẹna wuhrẹ kpahọ oware nọ orọ obaro.

Iruẹru 28:16-31; Ahwo Filipai 1:13; 2:19-30; 4:18-23; Ahwo Hibru 13:23; Filimọn 1-25; Ahwo Kọlọsi 4:7-9; 2 Timoti 4:7-9.



Enọ

  • Ono Pọl ọ ta usiuwoma kẹ okenọ ọ jọ uwou-odi evaọ Rom?
  • Evaọ uwoho na, ono họ ọrara nọ ọ rrọ emẹjẹ bi kere na, kọ eme o bi ru kẹ Pọl?
  • Ono ho Epafroditọs, kọ eme ọ wha lele oma nọ o je zihe kpohọ Filipai?
  • Fikieme Pọl o ro kere ileta se ogbẹnyusu ọkpekpe riẹ Filimọn?
  • Eme Pọl o ru nọ a si obọ noi no, kọ eme ọ via kẹe uwhremu na?
  • Ono Jihova o ro kere ebe urere Ebaibol na, kọ eme obe Eviavia o ta kpahe?

Enọ efa

  • Se Iruẹru 28:16-31 gbe Ahwo Filipai 1:13.

    Ẹvẹ Pọl ọ rehọ oke riẹ ru iruo nọ ọ jọ uwou-odi evaọ Rom, kọ ẹvẹ ẹrọwọ ọgaga riẹ u kpomahọ ukoko Ileleikristi na? (Iruẹru 28:23, 30; Fil. 1:14)

  • Se Ahwo Filipai 2:19-30.

    Eme ọ ovuhumuo vẹ Pọl ọ ta kpahe Timoti gbe Epafroditọs, kọ ẹvẹ ma sae rọ raro kele oriruo Pọl? (Fil. 2:20, 22, 25, 29, 30; 1 Kọr. 16:18; 1 Tẹs. 5:12, 13)

  • Se Filimọn 1-25.

    Eme Pọl ọ riobọhọ rọ ta udu họ Filimọn awọ inọ o ru oware nọ u fo, kọ ẹvẹ onana o rọ rrọ oriruo kẹ ekpako nẹnẹ? (Filim. 9; 2 Kọr. 8:8; Gal. 5:13)

    Ẹvẹ eme ọ Pọl nọ e rrọ Filimọn 13, 14 i ro dhesẹ nọ o wo adhẹẹ kẹ obroziẹ iroro amọfa evaọ ukoko na? (1 Kọr. 8:7, 13; 10:31-33)

  • Se 2 Timoti 4:7-9.

    Wọhọ Pọl ukọ na, ẹvẹ ma sai ro wo udu inọ Jihova ọ te hwa omai osa nọ ma te kru ẹrọwọ rite urere? (Mat. 24:13; Hib. 6:10)