Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 106: Esino Uwou-odi

Ikuigbe avọ 106: Esino Uwou-odi

RRI ẹnjẹle nọ orovie ẹthẹ uwou-odi na. Ahwo nọ a bi siobọ no kpo na yọ ikọ Jesu. J’oma gwọlọ otọ oware nọ owha riẹ ze nọ a je fiae họ uwou-odi.

Enjẹle nọ o bi si ikọ na no uwou-odi

Whaọ oke kpẹkpẹ ọvo ovrẹ no nọ a ku ẹzi ofuafo ku ilele Jesu no na. Onana họ oware nọ ovia: Pita avọ Jọn a te bi kpohọ tẹmple obọ Jerusalem uvo ẹdẹjọ. Yọ ọzae jọ nọ ọko anwẹ nọ ọrọ uzuazọ ze ọrọ akotọ ẹthẹ etẹ. Kẹdẹ kẹdẹ ahwo a rẹ wọe fihọ etenẹ re ọ hẹ yare ahwo nọ a bi kpobọ tẹmple igho. Okenọ ọ ruerẹ Pita avọ Jọn, ọ tẹ yarae re a kẹe oware jọ. Ovẹ ikọ na i re ti ruẹ?

A tẹ doma ji bi riwi ọzae nọ ọ gwọlọ obufihọ na. Pita ọ tẹ ta nọ, ‘Me wo ugho ho, rekọ mẹ te k’owhẹ onọ me wo. Eva odẹ Jesu kparoma re whọ nya!’ Koyehọ Pita o te krei obọze, ọ tẹ nwani duola kpehru ẹsiẹvo o te muhọ ẹnya. Oke nọ ahwo a ruẹ onana, u te gbai unu a tẹ ghọghọ gaga kẹ oware urirẹ ugbunu onana.

‘Ogaga Ọghẹnẹ, ọnọ ọkpare Jesu no iwhowhu ze, ma ro ru oware ugbunu onana,’ ere Pita ọ tae. Epanọ ọye avọ Jọn a be rọ ta ẹme na, isu egagọ jọ etẹ nyaze. Eva etẹ dhae fiki nọ Pita avọ Jọn a bi wuhrẹ ahwo kpahe Jesu nọ akpare no iwhowhu ze. Fikiere a tẹ tabọ hae a te fiae họ uwou-odi.

Okiokiọ riẹ isu egagọ na a te kpo ẹgware ologbo. A tẹ rehọ Pita avọ Jọn, gbe ahwo nọ a siwi na, ze. Isu egagọ na etẹ nọ nnọ, ‘Ogaga ovẹ wha ro ru oware urirẹ onana?’

Pita ọ tẹ ta kae nọ ogaga Ọghẹnẹ, ọnọ ọkpare Jesu no iwhowhu ze. Izerẹ na a gbẹ riẹ onọ a re ruẹ hẹ keme a rẹ sae vro ho nọ oware ugbunu onana oghinẹ via ha. Fikiere a tẹ vẹvẹ ikọ na unu nnọ a gbẹ tẹme kpahe Jesu ofa ha, koyehọ a te siobọ nai kpo.

Epanọ edẹ ebe rọ vrẹ na ikọ na a tẹ ruẹrabọ họ evuavuẹ kpahe Jesu gbe esiwo enọ erẹ mọ. Usi eware igbunu enana o tẹ vaha. Fikiere ahwo buobu nọ ano ewho nọ ewariẹ Jerusalem họ ze a tẹ rehọ enọ ebe mọ se ikọ na re a siwi. Onana otẹ liẹliẹ isu egagọ na re ihri, fikiere a tẹ tabọ họ ikọ na a te fiai họ uwou-odi. Rekọ a ria etẹ kri hi.

Eva aso ẹnjẹle Ọghẹnẹ o te rovie ẹthẹ uwou-odi na, epanọ whọ ruẹ etenẹ na. Ẹnjẹle na ọ tẹ ta nọ: ‘Wha nya i dikihẹ eva tẹmple na, re wha mu ahwo họ ẹvuẹ.’ Ohiohiẹ riẹ okenọ isu egagọ na a vi ahwo kpobọ uwou-odi re a rehọ ikọ na ze akpo no. Uwhremu riẹ ahwo na a tẹ rue rae nọ a bi wuhrẹ evaọ tẹmple a tẹ rehae ze obọ ọgwa e Sanhidri.

Isu egagọ na etẹ ta nọ: ‘Ma je uzi ogaga kẹ owhai nọ wha gbe wuhrẹ kpahe Jesu ofa ha. Rekọ wha rehọ uwuhrẹ rai vọ Jerusalem no.’ Koyehọ ikọ na i te yo nọ: ‘Ma re yo ẹme Ọghẹnẹ nọ ọrọ osu vi ọrọ ahwo.’ Fikiere a tẹ ruẹrabọ họ evuavuẹ “usi uwoma” na. Kọ oye na ogbẹ rọ emamọ oriruo nọ ma re lele?

Iruẹru izou 3 ri te 5.



Enọ

  • Eme ọ via kẹ Pita avọ Jọn uvo ẹdẹjọ nọ a je kpohọ etẹmpol na?
  • Eme Pita ọ ta kẹ ọzae nọ ọ ko na, kọ eme Pita ọ kẹ riẹ nọ o ghare vi ugho?
  • Fikieme eva e rọ dha isu egagọ na, kọ eme a ru Pita avọ Jọn?
  • Eme Pita ọ ta kẹ isu egagọ na, kọ didi unuovẹvẹ a kẹ ikọ na?
  • Fikieme isu egagọ na a be rọ re-ihri, rekọ eme ọ via nọ a fi ikọ na họ uwou-odi orọ avọ isiava?
  • Didi uyo ikọ na a kẹ nọ a rehọ ae ziọ ọgwa Sanhẹdrin na?

Enọ efa

  • Se Iruẹru 3:1-10.

    Dede nọ a kẹ omai ẹgba nọ ma re ro ru eware igbunu nẹnẹ hẹ, ẹvẹ eme ọ Pita nọ e rrọ Iruẹru 3:6 i bi ro fi obọ họ kẹ omai wo ovuhumuo kẹ aghare ovuẹ Uvie na? (Jọn 17:3; 2 Kọr. 5:18-20; Fil. 3:8)

  • Se Iruẹru 4:1-31.

    Ma tẹ rẹriẹ ovao ku ọwọsuọ evaọ odibọgba na, edhere vẹ ma rẹ rọ raro kele inievo Ileleikristi mai erọ ikpe-udhusoi ọsosuọ? (Iruẹru 4:29, 31; Ẹf. 6:18-20; 1 Tẹs. 2:2)

  • Se Iruẹru 5:17-42.

    Ẹvẹ ahwo jọ nọ a rrọ Isẹri hi, te evaọ oke nọ o vrẹ gbe inẹnẹ, a ro dhesẹ uvi iroro no kpahe iruo usiuwoma ota mai na? (Iruẹru 5:34-39)