Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 102: Jesu Ọ Rọ Uzuazọ

Ikuigbe avọ 102: Jesu Ọ Rọ Uzuazọ

KỌ WHỌ riẹ ohwo nọ aye na gbe ezae ivẹ na a rọ? Aye na họ Meri Magdalini, ogbẹnyusu Jesu. Ezae nọ iwu efuafo eroma na yọ enjẹle. Ukpẹ osese onana nọ Meri o bi riwi kpohọ na yọ oria nọ a fi ori Jesu họ okenọ owhu no. A re sei nọ uki. Rekọ enẹna ori na ọ gbẹ rọ họ! Ono ọ rehe riẹ? J’oma ruẹ.

Enjẹle nọ ọ be ta ẹme kẹ Mari Magdalini

Nọ Jesu owhu no, izerẹ na etẹ ta kẹ Pailet nọ: ‘Okenọ Jesu ọ jọ uzuazọ ọ ta nọ edesa evrẹ no a rẹ te kpariẹ tha. Fikiere juzi re aroro uki na. Otẹrọ ere ilele riẹ egbẹ sai tho ori riẹ hẹ re a ta nọ ọkparoma no iwhuowhu no!’ Pailet ọ tẹ ta kẹ izerẹ na re avi otu-ẹmo nyai roro uki na.

Rekọ nọ Jesu owhu no irioke frifri ẹdẹ avesa ẹnjẹle Jihova ọ tẹ nyaze idudhe. O te ghelie utho na no uki na no. Ozọ u te mu otu-ẹmo na ga te epanọ a ro dikihẹ wọhọ awho whuowhu. Ukuhọ riẹ nọ a riwi eva uki na, ori na ọgbẹrọ họ! Otu-ẹmo na jọ a te kpobọ okpẹwho na a tẹ ta kẹ izerẹ na. Kọ whọ riẹ oware nọ ikpehre izerẹ na i ru? Ahwa osa kẹ otu-ẹmo na re a ta ọrue. Izerẹ na etẹ ta kẹ otu-ẹmo na nọ, ‘Wha ta nnọ okenọ ma jọ owezẹ eva aso, ilele riẹ e nyaze i te tho ori na.’

Oke oyena eyae jọ nọ erọ egbẹnyusu Jesu a kpobọ uki na. Ẹvẹ u gbe rai unu te nọ a diei họ ufofe! Idudhe na enjẹle ivẹ avọ iwu enwranwra etẹ lahwe. Etẹ nọ inọ: ‘Fikieme wha jẹ rọ etenẹ gwọlọ Jesu? A kpare riẹ no. Ovẹrẹ wha nya e vuẹ ilele riẹ.’ Ẹvẹ eyae na edhẹ vẹrẹ te! Rekọ ohwo jọ ọ tẹ daiji evaọ edhere. Kọ whọ riẹ ohwo ọyena? Ọ yehọ Jesu! ‘Wha e vuẹ ilele mẹ,’ ere ọ ta.

Okenọ eyae na eta kẹ ilele na nnọ Jesu ọ rọ uzuazọ a tẹ jẹ rue riẹ, umu ilele na ẹro ho. Pita avọ Jọn a tẹ dhẹ kpobọ uki na re a ruẹ k’oma rae, rekọ uki na ufofe! Okenọ Pita avọ Jọn akpo no, yọ Meri Magdalini ọ gbẹ rọ emu. Oke oye họ okenọ oriri eva nọ ọ jẹ ruẹ enjẹle ivẹ na.

Kọ whọ riẹ oware nọ ovia kẹ ori Jesu? Ọghẹnẹ o ru riei rayẹ. Orọnikọ oma iwo nọ Jesu ọ rehọ whu na kọ oye Ọghẹnẹ ọ rọ kpariẹe ze uzuazọ họ. Ọ kẹ Jesu oma ẹzi okpokpọ, oghẹrẹ onọ enjẹle obọ odhiwu iwoi. Rekọ re odhesẹ kẹ ilele riẹ inọ ọ rọ uzuazọ, Jesu ọ tẹ rehọ oma nọ ahwo a rẹ ruẹ, wọhọ epanọ ma ti wuhrẹ.

Matiu 27:62-66; 28:1-15; Luk 24:1-12; Jọn 20:1-12.



Enọ

  • Ono họ aye nọ ọ rrọ uwoho na, amono họ ezae ivẹ na, kọ diẹse a rrọ na?
  • Fikieme Pailet ọ rọ ta kẹ izerẹ na inọ a vi isoja nyai rroro uki Jesu?
  • Eme ẹnjẹle jọ o ru evaọ ẹdẹ avọ esa nọ Jesu o whu no, rekọ eme izerẹ na a ru?
  • Fikieme akpọ o ro gbe eyae jọ unu nọ a kpohọ uki Jesu?
  • Fikieme Pita avọ Jọn a rọ dhẹ kpohọ uki Jesu, kọ eme a ruẹ?
  • Eme ọ via kẹ ugboma Jesu, rekọ eme o ru ro dhesẹ kẹ ilele na nnọ ọ rrọ uzuazọ?

Enọ efa

  • Se Matiu 27:62

    Eva oke ẹkparomatha Jesu, ẹvẹ ilori izerẹ na, otu Farisi na, gbe ekpako na a rọ thọ uzi mukpahe ẹzi ọfuafo na? (Mat. 12:24, 31, 32; 28:11

  • Se Luk 24:1

    Ẹvẹ ikuigbe ọrọ ẹkparomatha Jesu i ro dhesẹ nọ Jihova o rri eyae na wọhọ isisẹri evaifihọ? (Luk 24:4, 9, 10; Mat. 28:1

  • Se Jọn 20:1

    Ẹvẹ Jọn 20:8, 9 u ro fi obọ họ kẹ omai ruẹ ẹgwọlọ nọ ma re ro wo odiri otẹrọnọ orugba eruẹaruẹ Ebaibol jọ u vẹ omai ẹro ziezi hi? (Itẹ 4:18; Mat. 17:22, 23; Luk 24:5