Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 96: Jesu O Siwi Enọ Ebemọ

Ikuigbe avọ 96: Jesu O Siwi Enọ Ebemọ

EANỌ Jesu ọ be rọ nya otọ na kpobi, yọ o bi he siwi enọ ebemọ. Usi eware igbunu enana u te do ruọ iwhre gbe ewho nọ ewariẹ oye soso họ. Fikiere ahwo a tẹ rehọ otu nọ ọko gbe ituaro avọ idiezọ gbe amọfa buobu nọ arẹ mọ ro sei. Jesu o te siwai kpobi.

Enẹna ovrẹ ikpesa no nọ Jọn ọ rọ họ Jesu ame na. Jesu ọ tẹ be ta kẹ ikọ riẹ nọ obọ na ọye o re ti kpobọ Jerusalem, o bo nọ a te jọ kpei no, o ve je ti tovrẹ no iwhuowhu ze. Evaọ oke oye na, Jesu ọ tẹ ruẹ abọ họ enọ erẹ mọ esiwo.

Jesu nọ o bi siwi aye nọ ọ be mọ

Ẹdẹjọ Jesu o te bi wuhrẹ evaọ Ẹdijala. Ẹdijala na yọ ẹdẹ nọ ahwo Ju a je serihọ. Aye nọ whọ be ruẹ etenẹ na ọ be mọ gaga. Anwọ ikpe 18 ogulẹ na, ọ rẹ sai dikihẹ kpọvi hi. Fikiere Jesu ọ tẹ rehọ abọ riẹ kpahiẹe, o te muhọ edikihẹ kpọvi. Asiwi riei no!

Onana u te ru eva dha isu egagọ na. Omọvo rai jọ o te bo kẹ ogbotu na nọ: ‘Edẹ ezeza erọ nọ ma rẹ jọ ru iruo. Eyena họ edẹ nọ a rẹ jọ ze usiwo, orọnikọ Ẹdijala ha!’

Rekọ Jesu o te yo nọ: ‘Whai ikpehre ahwo. Whai kpobi na wha rẹ fere ọvuọ eketekete riẹ evaọ Ẹdijala wha ve sue’i nyae da ame. Kọ aye ọ nana nọ ọrọ owhrori na, nọ ọ be mọ anwọ ikpe 18 na a gbe siyei evaọ Ẹdijala?’ Uyo Jesu u te ru oma vuọ ahwo oyoma ọnana.

Uwhremuna Jesu avọ ikọ riẹ a tẹ nya kpobọ Jerusalem. Okenọ a nwane nya no ẹwho Jeriko na no, eyae ituaro ivẹ i te yo nọ Jesu ọ be nyavrẹ. Fikiere a te bo nọ: ‘Jesu, fiobọhọ k’omai!’

Jesu o te se ahwo ituaro na ze, ọ tẹ nọ ae nọ: ‘Eme wha gwọlọ nọ me ru kẹ owhai?’ A tẹ ta nọ: ‘Ọnowo, jọ ibiaro mai irovie.’ Jesu ọ tẹ rehọ obọ te ibiaro rai, okioke oyeha a tẹ ruẹ ude! Kọ whọ riẹ onọ osoriẹ nọ Jesu o je ro ru eka urirẹ enana kpobi? Fiki epanọ o you ahwo ọ tẹ jẹ gwọlae re afi orọwọ hiẹe. Fikiere umu omai ẹro inọ okenọ o re ti su wọhọ Ovie ohwo ọvuọvo ọ gbẹ te mọ evaọ otọakpọ na ofa ha.

Matiu 15:30,31; Luk 13:10-17; Matiu 20:29-34.



Enọ

  • Eme Jesu o ru nọ ọ jẹ nya ẹkwotọ na wariẹ?
  • Oware wọhọ ikpe esa nọ Jesu ọ họ-ame no, eme ọ ta kẹ ikọ riẹ?
  • Amono a rrọ uwoho na, kọ eme Jesu o ru kẹ aye na?
  • Fikieme uyo nọ Jesu ọ kpahe kẹ isu egagọ na u ro ru oma vo ai?
  • Nọ Jesu avọ ikọ riẹ a kẹle Jeriko no, eme Jesu o ru kẹ eyareware ivẹ nọ i tuaro?
  • Fikieme Jesu o ro ru eware igbunu?

Enọ efa

  • Se Matiu 15:30, 31.

    Eware igbunu vẹ Jesu ọ rehọ ogaga Jihova ru, kọ ẹvẹ u re kpomahọ otoriẹ mai orọ oware nọ Jihova ọ yeyaa riẹ kpahe akpọ ọkpokpọ na? (Ol. 37:29; Aiz. 33:24)

  • Se Luk 13:10-17.

    Ma te roro kpahe uzẹme na inọ Jesu o ru eware igbunu ilogbo buobu evaọ Ẹdijala, eme onana u dhesẹ kpahe oghẹrẹ omofọwẹ nọ ọ te wha se ahwo-akpọ evaọ etoke Esuo Odu-Ikpe riẹ na? (Luk 13:10-13; Ol. 46:9; Mat. 12:8; Kọl. 2:16, 17; Evia. 21:1-4)

  • Se Matiu 20:29-34.

    Ẹvẹ ikuigbe nana i ro dhesẹ nọ iruo i bu Jesu abọ hrọ te epanọ o gbe ro fi obọ họ kẹ ahwo ho, kọ eme ma rẹ sai wuhrẹ no onana ze? (Izie. 15:7; Jem. 2:15, 16; 1 Jọn 3:17)