ẸDẸJỌ Jesu ọ tẹ ta kẹ ohwo jọ nọ ufo re o you ọrivẹ riẹ. Ohwo na ọ tẹ nọ Jesu nọ: ‘Ono họ ọrivẹ mẹ?’ Jesu ọ riẹ epanọ ohwo ọnana o re roro. Ohwo na ororo nọ ahwo uyẹ obọ riẹ gbe egagọ riẹ ọvo họ erivẹ riẹ. Fikiere wha j’oma ruẹ epanọ Jesu ọ ta kẹe.

Ikuigbe Jesu o re ro wuhrẹ ẹsejọ. Yọ ona o re ruo na. O gbe iku kpahọ ohwo i Ju avọ ohwo Sameria. Ma wuhrẹ vrẹ no nọ ahwo Sameria a rẹ were ahwo i Ju buobu hu. Whaọ, ikuigbe Jesu na kọ ona:

Ẹdẹjọ ohwo i Ju jọ ọ tẹ be nya edhere ugbehru kpobọ Jeriko. Rekọ igbulegbu etẹ họrọ mue’i. A tẹ rehọ igho riẹ a te je kpei bẹse nọ ọrọ kẹle ewho.

Oke ofa, ozerẹ i Ju ọ tẹ nya edhere na ze. Ọ ruẹ ohwo nọ a kpe na. Eme who roro nọ oru? Emejọ, ọ nwane zare edhere na vrẹ ruọ abọdekọ o te muhọ ẹnya vrẹ. Koyehọ ohwo egagọ ọfa ọ tẹ nyaze. Ohwo Livai ọ rọ. Kọ ọ doma ji? Ijo, ọ doma ji re ofiobọhọ kẹ ohwo nọ a kpe na gbe he. Riri ozerẹ na gbe ohwo Livai na ae arọ obọ etugbo edhere o be be nya vrẹ na.

Rekọ riri ọnọ ọrọ etenẹ kugbe ohwo nọ a kpe na. Ọ ye yọ ohwo Sameria. O te bi fiobọhọ kẹ ohwo i Ju na. O te bi fi umu jọ họ emela riẹ. Uwhremu riẹ, ọ tẹ rehọ ohwo i Ju na kpohọ oria nọ o je serihọ re oma riẹ oga.

Ọrivẹ Ohwo-Sameria

Oke nọ Jesu oku ikuigbe riẹ họ no, ọ tẹ ta kẹ ohwo nọ ọnọ riẹ onọ na nnọ: ‘Imasa enana ọ vẹ who roro nọ o ru wọhọ ọrivẹ kẹ ohwo nọ a kpe na? Kọ ozerẹ na, ohwo Livai na hayo kọ ohwo Sameria na?’

Ohwo na o te yo nọ: ‘Ohwo Sameria na o wo uyoyou kẹ ohwo nọ a kpe na.’

Jesu ọ tẹ ta nọ: ‘Who yo gba. Fikiere kpo re who ru kẹ amọfa wọhọ epanọ o ru na.’

Edhere nọ Jesu o re ro wuhrẹ ọ gbẹ were owhẹ? Ma sai wuhrẹ eware nọ i wo uzou buobu, buobu otẹrọnọ ma kezọ kẹ epanọ Jesu ọ tae evaọ Ebaibol na, ma gbẹ sai ru ere?

Luk 10:25-37.



Enọ

  • Didi onọ ọzae jọ ọ nọ Jesu, kọ fikieme?
  • Didi eware Jesu o je ro wuhrẹ ẹsejọ, kọ eme ma wuhrẹ kpahe ahwo Ju gbe Sameria no vẹre?
  • Evaọ iku nọ Jesu o gbe na, eme ọ via kẹ ohwo Ju nọ o je kperẹ evaọ edhere Jeriko?
  • Eme ọ via nọ ozerẹ ahwo Ju gbe ohwo Livai a nya edhere na vrẹ?
  • Evaọ uwoho na ono o bi fi obọ họ kẹ ohwo Ju nọ a nwa oma na?
  • Nọ Jesu o kuọ iku na họ no, onọ vẹ ọ nọ, kọ ẹvẹ ọzae na ọ kuyo?

Enọ efa

  • Se Luk 10:25-37.

    Ukpenọ ọ kuyo na ovavo, ẹvẹ Jesu o ro fi obọ họ kẹ ọriẹ-izi jọ re o roro kpahe ẹme na? (Luk 10:26; Mat. 16:13-16)

    Ẹvẹ Jesu ọ rọ rehọ etadhesẹ fi iroro omagbẹre ọrọ ahwo nọ i bi yo eme riẹ kparobọ? (Luk 10:36, 37; 18:9-14; Tait. 1:9)