ỌMỌTẸ nọ whọ rẹ ruẹ etenẹ na, ikpe 12 ọkpako te. Jesu o kru obọ riẹ, ọsẹ gbe oni riẹ ae a dikihẹ kẹle na. Kọ whọ riẹ onọ osoriẹ nọ a jẹ be ghọghọ tere? J’oma gwọlọ via.

Jesu nọ ọ be kpare ọmọtẹ Jairọs

Ọsẹ ọmọtẹ na ohwo ologbo odẹ riẹ họ Jairọs. Ẹdẹjọ ọmọtẹ riẹ ọ tẹ be mọ, a te fiei họ ehwa. Rekọ ọ sasa ghele he. Ẹmẹmọga ẹmẹmọga ọvo ọrọ. Jairọs avọ aye riẹ a tẹ be ruawa gaga, keme owọhọ nọ ọmọtẹ ọsese rai o bi ti whuẹ. Ọmọtẹ ọyena ọvo a woi. Fikiere Jairọs ọ tẹ be gwọlọ Jesu. O yo kpahe eware igbunu nọ Jesu o re ruo.

Okenọ Jairọs ọ ruẹ Jesu, yọ ogbotu buobu ọware riẹ họ. Rekọ Jairọs o te duwu uzou họ evie ogbotu na vrẹ o te kie fihọ awọ Jesu. Ọ tẹ ta nọ: ‘Ọmọtẹ mẹ ọ rẹ mọ gaga.’ Ọ tẹ lẹe nọ, ‘Iviena nyaze re who siyei.’ Jesu ọ tẹ ta nọ ọ be te nyaze.

Epanọ ogbotu na a be rọ nya na, a te muhọ ẹnwẹ re a kẹliẹe. Jesu ọ tẹ da oma ji idudhe. Ọ tẹ ta nọ, ‘Ono ọ rehọ obọ te omẹ na?’ Jesu ọ riẹ nọ ogaga uno rie oma, fikiere ọ tẹ riẹ nọ ohwo jọ ọ rehọ obọ tei. Kọ ono? Aye jọ nọ ọ be mọ gaga anwọ ikpe 12. Ọ nyaze ọ tẹ rehọ obọ te iwu Jesu a te siyei!

Onana otẹ liẹliẹ oma Jairọs sasa, keme ọ ruẹ epanọ ohwo osiwo ọlọhọ kẹ Jesu te. Rekọ udevie ere na ọnyaukọ ọ tẹ nyaze. Ọ tẹ vuẹ Jairọs nọ, ‘Who gbe kpokpo Jesu ofa ha, ọmọtẹ ra owhu no.’ Jesu o te yo onana ọ tẹ ta kẹ Jairọs nọ: ‘Whọ ruawa ha, ọ rẹ te sasa.’

Okenọ a ti te uwou Jairọs, yọ ahwo a be viẹ avọ uweri ulogbo. Rekọ Jesu ọ tẹ ta nọ: ‘Wha gbẹ viẹ hẹ. Ọmọ na owhu hu. Owezẹ ọvo ọrọ.’ Rekọ a tẹ hwẹ a te se Jesu ẹkoko, keme a riẹ nọ owhu no.

Koyehọ Jesu ọ tẹ rehọ ọsẹ ọmọtẹ na avọ oni riẹ gbe imasa ikọ riẹ kpobọ ukpẹ nọ ọmọ na ọrọ. O te kru ei obọ ọ tẹ ta nọ: ‘Kparoma!’ Ọ tẹ ze uzuazọ, wọhọ epanọ whọ rọ etenẹ ruẹ na. Ọ tẹ kparoma o te muhọ ẹnya kpenẹ avọ enẹ! Kọ oye osoriẹ nọ oni gbe ọsẹ riẹ a jẹ be ghọghọ gaga na.

Orọnikọ ọnana họ ohwo ọsosuọ nọ Jesu ọkpare no iwhuowhu ze he. Orọ ọsosuọ nọ Ebaibol igbiku kpahe họ ọmọzae aye uku nọ ọ be ria okpẹwhọ ọ Nein. Oke ofa, Jesu ọkpare Lazarọs oniọvo Meri gbe Mata, no iwhuowhu ze re. Okenọ Jesu o ti suẹ wọhọ ovie Ọghẹnẹ ọ te rehọ ahwo owhuowhu buobu buobu zihe ze uzuazọ. Kọ eva egbẹ were omai kpahe oyena?

Luk 8:40-56; 7:11-17; Jọn 11:17-44.



Enọ

  • Ono họ ọsẹ ọmọtẹ nọ ọ rrọ uwoho na, kọ fikieme ọsẹ na avọ aye riẹ a be rọ ruawa gaga?
  • Eme Jairọs o ru nọ ọ ruẹ Jesu?
  • Eme ọ via nọ Jesu o je kpohọ uwou Jairọs, didi ovuẹ u te Jairọs obọ evaọ edhere?
  • Fikieme ahwo nọ a jọ uwou Jairọs a jẹ rọ hwẹ Jesu?
  • Nọ ọ rehọ ilele esa gbe ọsẹgboni ọmọtẹ na ruọ ukpẹ ọmọtẹ na no, eme Jesu o ru?
  • Ono ọfa Jesu ọ kpare no uwhu ze, kọ eme onana u dhesẹ?

Enọ efa

  • Se Luk 8:40-56.

    Ẹvẹ Jesu o ro dhesẹ ohrọ gbe ororokẹ rọkẹ aye nọ o je hwẹ azẹ na, kọ eme ekpako Ileleikristi nẹnẹ a rẹ sai wuhrẹ no onana ze? (Luk 8:43, 44, 47, 48; Izerẹ 15:25-27; Mat. 9:12, 13; Kọl. 3:12-14)

  • Se Luk 7:11-17.

    Fikieme ahwo nọ iyoyou rai i whu a sae rọ ruẹ omosasọ ulogbo evaọ eme nọ Jesu ọ ta kẹ aye-uku obọ Nein na? (Luk 7:13; 2 Kọr. 1:3, 4; Hib. 4:15)

  • Se Jọn 11:17-44

    Ẹvẹ Jesu o ro dhesẹ nọ o thọ họ re a weri nọ ohwo nọ ma you o te whu? (Jọn 11:33-36, 38; 2 Sam. 18:33; 19:1-4)