Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 91: Jesu Owuhrẹ Evaọ Ugbehru

Ikuigbe avọ 91: Jesu Owuhrẹ Evaọ Ugbehru

RRI Jesu nọ ọkeria etenẹ. O bi wuhrẹ ahwo ọnana kpobi evaọ ehru ugbehru obọ Galili. Enọ emai keria kẹliẹe na yọ ilele riẹ. Ọ salọ 12 rai re ajọ ikọ. Ikọ na yọ ilele oghẹrẹsa Jesu. Kọ whọ riẹ edẹ rai?

Jesu nọ o bi wuhrẹ

Saimọn Pita yọ ọjọ gbe Andru oniọvo riẹ. Jemis avọ Jọn a riẹ enọ erọ oniọvo re. Ukọ ọfa jọ odẹ riẹ Jemis re, ọfa jọ a ve je sei Saimọn re. Ikọ ivẹ a re se nọ Judas. Ọvo jọ họ Judas Iskariọt, ọdekọ kọ Judas nọ a re se odẹ riẹ re nọ Tadiọs. Filip ọ tẹ jẹ riẹ gbe Nataniẹl (nọ a re se Batolomiu re) gbe Matiu avọ Tọmas.

Okenọ Jesu ozihe no Sameria ze, o te mu ovuẹ ọsosuọ họ: ‘Uvie odhiwu na okẹle no.’ Kọ whọ riẹ oware nọ uvie oye na orọ? Oye na họ uvi isuẹsu Ọghẹnẹ. Jesu họ ovie riẹ. O re ti su no obọ odhiwu tha ọ vẹ rehọ udhedhẹ ze otọakpọ na. Uvie Ọghẹnẹ u re ti ru otọakpọ na soso zihe ruọ aparadase owoma.

Jesu ọrọ etenẹ bi wuhrẹ ahwo kpahe uvie na. O te bi dhesiẹ vẹ nọ, ‘Enẹ wha rẹ lẹ. Ọsẹ mai nọ ọrọ obọ odhiwu, jọ a rehọ orro kẹ odẹ ra. Jọ uvie ra oze. Jọ a jọ akpọ na ru oreva ra, wọhọ epanọ arọ obọ odhiwu ruẹ.’ Ahwo buobu a re se onana nọ ‘Olẹ Ọnowo Na.’ Amọfa a ve sei nọ ‘Ọsẹ Mai Na.’ Kọ whọ sae se olẹ na soso?

Jesu o te je bi wuhrẹ ahwo epanọ a re ru kẹ ohwo hwo. Ọ tẹ ta nọ, ‘Epanọ whọ gwọlọ nọ a ru k’owhẹ ru ere kẹ amọfa re.’ O gbẹ were owhẹ nọ amọfa a tẹ riẹ owhẹ ru ziezi? Fikiere, Jesu ọ be ta nọ, ma re ru amọfa ziezi. Kọ u gbe ti gbunu evaọ aparadase otọakpọ na okenọ kohwo kohwo o re ti ru onana?

Matiu izou 5 ri te 7; 10:1-4.



Enọ

  • 1. Evaọ uwoho na, diẹse Jesu o bi jo wuhrẹ na, kọ amono a mae keria kẹle iẹe na?
  • 2. Didi odẹ ikọ 12 na?
  • 3. Eme họ Uvie nọ Jesu o bi wuhrẹ kpahe na?
  • 4. Eme Jesu o wuhrẹ ahwo na nọ a lẹ kẹ?
  • 5. Eme Jesu ọ ta kpahe epanọ ahwo a re yeri kugbe ohwohwo?

Enọ efa

  • Se Matiu 5:1-12.

    Idhere vẹ ma sai ro dhesẹ nọ ma wo ọdawẹ kpahe ẹgwọlọ abọ-ẹzi mai? (Mat. 5:3; Rom 10:13-15; 1 Tim. 4:13, 15, 16)

  • Se Matiu 5:21-26.

    Ẹvẹ Matiu 5:23, 24 u ro fi ẹgba họ nnọ usu mai kugbe inievo mai u re kpomahọ usu mai kugbe Jihova? (Mat. 6:14, 15; Ol. 133:1; Kọl. 3:13; 1 Jọn 4:20)

  • Se Matiu 6:1-8.

    Didi idhere jọ nọ ahwo a re ro dhesẹ oma via kẹ amọfa inọ a kiẹrẹe u fo nọ Ileleikristi a rẹ whaha? (Luk 18:11, 12; 1 Kọr. 4:6, 7; 2 Kọr. 9:7)

  • Se Matiu 6:25-34.

    Eme Jesu o wuhrẹ kpahe epanọ u ro wuzou re ma fi eva họ Jihova rọkẹ ẹgwọlọ iwo mai? (Ọny. 16:4; Ol. 37:25; Fil. 4:6)

  • Se Matiu 7:1-11.

    Eme ọtadhesẹ ovevẹ nọ ọ rrọ Matiu 7:5 o wuhrẹ omai? (Itẹ 26:12; Rom 2:1; 14:10; Jem. 4:11, 12)