Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 87: Jesu Nọ Ọjọ Tẹmple Oke Emaha

Ikuigbe avọ 87: Jesu Nọ Ọjọ Tẹmple Oke Emaha

RRI ọmọzae ọmaha nọ ọ be ta ẹme kẹ ekpako ezae nana. A ye họ iwuhrẹ evaọ tẹmple Ọghẹnẹ obọ Jerusalem. Ọmọzae na yọ Jesu. Ọ rro gaga no. Enẹna ọkpako te ikpe 12 no.

U gbe iwuhrẹ na unu gaga nọ Jesu ọ rọ riẹ kpahe Ọghẹnẹ ga te ere je gbe eware nọ akere họ evaọ Ebaibol na. Rekọ eme jabọ nọ Josẹf avọ Meri a gbẹ rọ etenẹ re he? Bovẹ a rọ? J’oma kiẹ via.

Jeus ọmaha na nọ ọ be ta ẹme kẹ iwuhrẹ egagọ na

Kukpe kukpe Josẹf ọ rẹ rehọ ekru riẹ kpobọ Jerusalem fiki eha obọdẹ nọ a re se Ọnyavrẹ. Orọ onya uthabọ no Nazarẹt ri te Jerusalem. Ohwo ọvuọvo o wo omoto ho, ekọ otọ eriẹ hẹ. A wo rai evaọ edẹ eyena ha. Ahwo nọ a jẹ nya otọ amai bu, yọ ojẹ rehae ole edẹ esa re a te te Jerusalem.

Oke onana yọ Josẹf o wo ekru ologbo no. Fikiere inievo emezae emaha Jesu jọ te erọ emetẹ e riẹ nọ a rẹ rehọ ẹro te. Whaọ ukpe onana Josẹf avọ Meri gbe emọ rai a mu onya uthethei na họ no bi zihe kpobọ Nazarẹt. A roro nọ Jesu ọ rọ kugbe amọfa nọ a gbe bi kpo. Rekọ okenọ ẹdẹ ore no nọ a serihọ a gbẹ jẹ ruẹ Jesu hu. A te mue’i họ ẹgwọlọ udevie imoni rai gbe egbẹnyusu, rekọ ọ rọ kugbai hi! Fikiere a te zihe kpobọ Jerusalem re a jọ o be gwọliẹe.

Urere riẹ a tẹ jọ etenẹ ruẹ Jesu avọ iwuhrẹ na. Ọ be gaviezọ kae jẹbe nọ enọ. Epanọ Jesu o wo areghẹ te u te gbe ahwo na kpobi unu. Rekọ Meri ọ tẹ ta nọ: ‘Ọmọ, ẹvẹ who je ru omai onana? Ẹgwọlọ ra ọ kẹ omẹ avọ ọsẹ ra awa gaga.’

‘Fikieme wha jẹ gwọlọ omẹ?’ ere Jesu o yo. ‘Kọ wha gbẹ riẹ nọ mẹ rẹ jọ evaọ uwou Ọsẹ mẹ?’

Ẹhẹ, Jesu o you o ria nọ ọ rẹ jọ wuhrẹ kpahe Ọghẹnẹ. Kọ ogbẹrọ nọ ere ma re roro re? Nọ a te Nazarẹt no, kẹkpoka kẹkpoka Jesu o re kpohọ iwuhrẹ nọ a jẹ gọ. Fiki epanọ ọ rẹ gaviezọ ẹsikpobi, ọ tẹ riẹ eware buobu no Ebaibol ze. J’oma jọ wọhọ Jesu re ma lele oriruo riẹ.

Luk 2:41-52; Matiu 13:53-56.



Enọ

  • Evaọ uwoho na, ẹvẹ Jesu ọ kpako te no, kọ diẹse ọ rrọ na?
  • Eme Josẹf avọ uviuwou riẹ a re ru kukpe kukpe?
  • Nọ a nya okpẹdoke soso no evaọ ukpo rai, fikieme Josẹf avọ Meri a ro zihe kpohọ Jerusalẹm?
  • Diẹse Josẹf avọ Meri a jọ ruẹ Jesu, kọ fikieme akpọ o bi ro gbe ahwo nọ a rrọ etẹe unu?
  • Eme Jesu ọ ta kẹ oni riẹ, Meri?
  • Ẹvẹ ma sae rọ jọ wọhọ Jesu evaọ ewuhrẹ kpahe Ọghẹnẹ?

Enọ efa

  • Se Luk 2:41-52.

    Dede nọ Uzi na o gwọlọ nọ ezae ọvo a re kpohọ ehaa ẹgbukpe na, didi emamọ oriruo Josẹf avọ Meri a fihotọ kẹ esẹgbini nẹnẹ? (Luk 2:41; Izie. 16:16; 31:12; Itẹ 22:6)

    Ẹvẹ Jesu o ro fi emamọ oriruo hotọ kẹ emoha nẹnẹ re a roma kpotọ kẹ esẹgbini rai? (Luk 2:51; Izie. 5:16; Itẹ 23:22; Kọl. 3:20)

  • Se Matiu 13:53-56.

    Inievo emezae ene Jesu vẹ a jọ Ebaibol na fodẹ, kọ ẹvẹ a rọ rehọ ivẹ rai jọ ru iruo uwhremu na evaọ ukoko Ileleikristi na? (Mat. 13:55; Iruẹru 12:17; 15:6, 13; 21:18; Gal. 1:19; Jem. 1:1; Jud 1)