Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 86: Ahwo Nọ Esi Osu

Ikuigbe avọ 86: Ahwo Nọ Esi Osu
Ebuẹva-isi

KỌ WHỌ sae ruẹ esi ọnwranwra ọyena nọ omọvo ahwo na jọ ọ be riẹ obọ họ na? Okenọ a no Jerusalem no, esi na ọ tẹ vaze. Ahwo ọnana obọ Ovatha-ọre a noze, yọ a wuhrẹ isi na. A rọwo nọ esi ọkpokpọ ọnana o bi sua’i bru ohwo ologbo jọ.

Okenọ ahwo na a te Jerusalem, a tẹ nọ: ‘Diẹse ọmọ na ọ rọ ọnọ ọ te jọ ovie kẹ ahwo i Ju na?’ “Ahwo i Ju” yọ odẹ ofa Ahwo-Izrẹl. ‘Ma ruẹ esi ọmọ na okenọ ma jọ obọ Ovatha-ọre,’ ere ahwo na a tae, ‘kọ ma nyaze re ma gọe.’

Okenọ Herọd, ọnọ ọ rọ ovie Jerusalem, o yo onana o te muhọ ẹrova. Ọ gwọlọ nọ ovie ọfa ọ rehọ ẹta riẹ hẹ. Fikiere Herọd o te se ilori izerẹ ọ tẹ nọ: ‘Diẹse a je ti yẹ ovie nọ aya eya riẹ na?’ A te yo nọ: ‘Ebaibol e ta nọ evaọ Bẹtelẹhẹm.’

Fikiere Herọd o te se ahwo nọ a no obọ Ovatha-ọre ze na, ọ tẹ ta nọ: ‘Wha nya e gwọlọ ọmọfofa na. Okenọ wha rue riẹ, wha jọ omẹ riẹ. Mẹ gwọlọ nya re mẹ gọe re.’ Rekọ, uzẹme nọ, Herọd ọ gwọlọ ọmọ na re okpei!

Kẹsena esi na ọ tẹ karo kẹ ahwo na kpobọ Bẹtelẹhẹm, ọ tẹ daji ehru o ria nọ ọmọ na ọrọ. Okenọ ahwo na a nya ro uwou na, a tẹ ruẹ Meri gbe Jesu ọsese. A tẹ rehọ ekẹ ze a tẹ rehae kẹ Jesu. Rekọ uwhremu riẹ Jihova ọ tẹ vẹvẹ ahwo na unu evaọ ewezẹ nnọ a zihe bru Herọd ho. Fikiere a tẹ rehọ edhere ọfa zihe kpo obọ ẹwho rai.

Okenọ Herọd o yo nọ ahwo nọ a no obọ Ovatha-ọre ze na a zihe kpo no, eva etẹ dhae gaga. Fikiere o te je uzi re a kpe emezae efofa kpobi nọ erọ evaọ Bẹtelẹhẹm nọ ekpako te umuo ikpe ivẹ ri du otọ. Rekọ Jihova ọ tẹ kake vẹvẹ Josẹf unu evaọ ewezẹ, Josẹf avọ ekru riẹ a te kpobọ Ijipti. Uwhremuna, okenọ Josẹf o yo nọ Herọd owhu no, ọ tẹ rehọ Meri avọ Jesu zihe ze ẹwho Nazarẹt. Onana họ o ria nọ Jesu ọ jẹ whẹro.

Ono who roro nọ o ru esi ọkpokpọ ọyena lo? Kareghẹhọ, obọ Jerusalem ahwo na a kake nya oke nọ a ruẹ esi na no. Setan ukumuomu ọ gwọlọ nọ o re kpe Ọmọ Ọghẹnẹ, yọ ọ riẹ no nọ Herọd Ovie Jerusalem ọ rẹ te dao epanọ ọ rẹ rehọ kpei. Fikiere orẹ sae jọ nọ Setan họ ọnọ o ru esi ọyena lo na.

Matiu 2:1-23; Maeka 5:2.



Enọ

  • Amono họ ezae nọ e rrọ uwoho na, kọ fikieme omọvo rai jọ ọ be rọ riẹ obọ họ esi ọnwranwra jọ?
  • Fikieme eva e rọ dha Herọd Ovie na gaga, kọ eme o ru?
  • Diẹse esi ọnwranwra na o su ezae na kpohọ, kọ fikieme a rọ rehọ edhere ọfa zihe kpohọ ẹwho rai?
  • Didi ujaje Herọd ọ kẹ, kọ fikieme?
  • Eme Jihova ọ ta kẹ Josẹf nọ o ru?
  • Ono o ru esi ọkpokpọ na lo, kọ fikieme?

Onọ ofa

  • Se Matiu 2:1-23.

    Ẹvẹ Jesu ọ kpako te evaọ oke oyena, kọ diẹse ọ jẹ rria okenọ ebuẹva-isi na a bru ei ze? (Mat. 2:1, 11, 16)