Kpohọ eme nọ e riẹ eva

Kpohọ oria izoẹme

Ikuigbe avọ 98: Evaọ Ehru Ugbehru Olivi

Ikuigbe avọ 98: Evaọ Ehru Ugbehru Olivi

ỌNANA na họ Jesu nọ ọ rọ evaọ ehru Ugbehru Olivi na. Imane nọ erọ kugbei na yọ ikọ riẹ. Andru avọ Pita inievo, gbe Jemis avọ Jọn inievo na re. Yọ tẹmple Ọghẹnẹ obọ Jerusalem o ye whọbe kparo ruẹ evaọ ugbobei na.

Anwọ edẹ ivẹ evrẹ no na nọ Jesu ọ rọ dhẹ upelẹ eketekete ruọ evaọ Jerusalem. Edẹ ivẹ ẹkpoka. Evaọ ohiohiẹ ẹdẹ ọyena Jesu ọ jọ evaọ tẹmple. Etẹe izerẹ na a jọ dao re a kru Jesu re a kpei. Rekọ ozọ onana uruo u te mua’i keme na Jesu ọ were ahwo na.

Jesu gbe ilele riẹ

‘Whai erao imuomu gbe emọ erao imuomu!’ ere Jesu o se ilori egagọ eyena. Kẹsena Jesu ọ tẹ ta nọ Ọghẹnẹ ọ rẹ te kae uye fiki eware iyoma kpobi nọ a ru. Nọ oyena ovrẹ no Jesu ọ tẹ ze obọ Ugbehru Olivi, kọ ẹsiẹe ikọ ene enana a mu rie enọ họ ẹnọ. Kọ whọ riẹ eware nọ a be nọ Jesu na?

Ikọ na a be nọ kpahe eware nọ erọ obaro. A riẹ nọ Jesu ọ te rehọ eyoma kpobi nọ ọ rọ otọakpọ na te oba. Rekọ a gwọlọ riẹ oke nọ onana o rẹ te via. Oke ovẹ Jesu ọ te wariẹ tha re osu wọhọ Ovie?

Jesu ọ riẹ nọ ilele riẹ nọ erọ obọ akpọ obonẹ a rẹ te sae rue riẹ hẹ oke nọ ọ wariẹ zihe ze. Keme na obọ odhiwu ọ rẹ te jọ, yọ a rẹ sae jọ obei rue riẹ hẹ. Fikiere Jesu ọ tẹ ta eware jọ nọ erẹ te via evaọ otọakpọ kẹ ikọ riẹ okenọ ọ jọ obọ odhiwu muhọ esuo no wọhọ Ovie. Eme họ eware enana jọ?

Jesu ọ ta nọ emo ilogbo erẹ te jọ, ahwo buobu a rẹ te mọ gbe ohọwo u re ti kpai, umuomu orẹ te ga vrẹ ẹta, etọ inuho ruaro erẹ te jọ. Jesu ọ tẹ jẹ ta re nọ emamọ usi kpahe uvie Ọghẹnẹ na a rẹ te vuẹe evaọ koria koria otọakpọ na. Kọ ma ruẹ eware enana nọ erẹ via evaọ oke mai na? E! Fikiere enẹna orẹ sai mu omai ẹro inọ Jesu o muhọ esuo no evaọ obọ odhiwu. Kẹle na ọ te rehọ emuemu kpobi nọ ọ rọ otọakpọ na te oba.

Matiu 21:46; 23:l-39; 24:1-14; Mak 13:3-10.



Enọ

  • Evaọ uwoho na, ọzae vẹ họ Jesu, kọ amono a rrọ kugbei na?
  • Eme izerẹ na a gwọlọ ru Jesu evaọ etẹmpol na, kọ eme ọ ta kẹ ae?
  • Eme ikọ na a nọ Jesu?
  • Fikieme Jesu ọ rọ vuẹ ikọ riẹ eware jọ nọ e te via evaọ otọakpọ nọ o te muhọ esu no wọhọ Ovie evaọ obọ odhiwu?
  • Eme Jesu ọ ta nọ ọ te via taure o te ti si emuemu kpobi no otọakpọ?

Enọ efa

  • Se Matiu 23:1-39.

    Dede nọ Ikereakere na i dhesẹ nọ edẹ-ovao nọ a re ro se ahwo nọ a rrọ ọkwa-udu akpọ na e rẹ sai fo, didi oware eme ọ Jesu eva Matiu 23:8-11 i dhesẹ kpahe eroruiruo edẹ-ovao omorro evaọ ukoko Ileleikristi na? (Iruẹru 26:25; Rom 13:7; 1 Pita 2:13, 14)

    Eme otu Farisi na a ro ru iruo re a daoma whaha ahwo ẹjọ Ileleikristi, kọ ẹvẹ isu egagọ a be rọ rehọ edhere ọvona ru iruo nẹnẹ? (Mat. 23:13; Luk 11:52; Jọn 9:22; 12:42; 1 Tẹs. 2:16)

  • Se Matiu 24:1-14.

    Ẹvẹ a ro fi ẹgba họ epanọ ithihakọ i wuzou te eva Matiu 24:13?

    Eme họ otofa ẹme na “urere” eva Matiu 24:13? (Mat. 16:27; Rom 14:10-12; 2 Kọr. 5:10)

  • Se Mak 13:3-10.

    Ẹme vẹ eva Mak 13:10 o dhesẹ epanọ usiuwoma ota na o kpata te, kọ ẹvẹ eme ọ Jesu na i re kpomahọ omai? (Rom 13:11, 12; 1 Kọr. 7:29-31; 2 Tim. 4:2)