Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 88: Jọn Ọ Họ Jesu Ame

Ikuigbe avọ 88: Jọn Ọ Họ Jesu Ame

RRI erueruẹ nọ o bi ti kie mu uzou ọzae na. Ọzae na yọ Jesu. Enẹna ọkpako te ole ikpe 30 no. Ọzae nọ ọ rọ kugbei na yọ Jọn. Ma wuhrẹ oware jọ kpahiẹe no. Kọ whọ kareghẹhọ okenọ Meri o weze bru Ẹlizabẹt omoni riẹ, nọ ọmọ nọ ọ jọ Ẹlizabẹt eva oduola fiki oghọghọ? Ọmọ ọyena nọ a ri yẹ hẹ na họ Jọn. Rekọ eme Jọn avọ Jesu a re ruo enẹna?

Ame-ọhọ Jesu

Jọn ọ nwani duwu Jesu họ ame Ethẹ Jọdan obọ nana. Ere a rẹ họ ohwo ame. A rẹ kake, nyẹe họ ame, kẹsena avẹ zoma kpariẹe ze. Fiki onana nọ Jọn o je ru kẹ ahwo, a je sei nọ ọhame na. Kọ fikieme Jọn ọ jẹ họ Jesu ame?

Whaọ, Jọn o ru rie keme Jesu ọ nyaze ta kẹ Jọn nọ ọhọe ame. Ahwo nọ a gwọlọ dhesẹ nọ ae a weri kẹ eware iyoma nọ a ru ae Jọn ọ jẹ họ ame. Rekọ Jesu o ru oware uyoma jọ nọ o re weri kẹ? Ijo, Jesu o ru hu, keme ọye họ Ọmọ obọ Ọghẹnẹ nọ ono odhiwu ze. Fikiere ọ tẹ ta kẹ Jọn nọ ọhọe ame fiki ẹjiroro ọfa. J’oma ruẹ oware nọ ẹjiroro ọyena ọ jọ.

Tao re Jesu o te bru Jọn ze obonẹ, ọwena ọjọ. Ọwena yọ ohwo nọ ọ rẹ rehọ ire ku eware, wọhọ emẹjẹ gbe egbara avọ ekpala. Josẹf ọzae Meri ọwena ọjọ, o te je wuhrẹ Jesu re ọ jọ ọvo jọ re. Rekọ Jihova o vi Ọmọ riẹ ze otọ akpọ na re ọze jọ ọwena ha. O wo iruo obọdẹ kẹe nọ o re ti ruẹ, oke u te je te no nọ Jesu o ro mua’i họ eruo. Rekọ re udhesẹ nọ enẹna ọ nyaze oreva Ọsẹ riẹ uruo no, Jesu ọ tẹ ta kẹ Jọn nọ ọhọe ame. Kọ onana owere Ọghẹnẹ?

E, owere riẹ, keme, okenọ Jesu ọva no ame ze no, urru o tẹ ta ẹme no odhiwu ze nọ: ‘Ọnana họ Ọmọ mẹ, ọnọ ọwere omẹ.’ Yọ, o tẹ jẹ wọhọ nọ odhiwu orovie erueruẹ ọnana o te kiemu ehru Jesu. Rekọ orọnikọ emamọ erueruẹ hẹ. Ọwọhọ ọ jọ ọvo. Uzẹme nọ ẹzi Ọghẹnẹ.

Enẹna Jesu o wo eware buobu nọ ọ rẹ jẹ iroro kpahe, fikiere o te kpo o ria ofọfọ edẹ 40. Setan ọ tẹ nya brei kpobei. Isiasa gbagba Setan ọdawo re ọ liẹliẹ Jesu ru oware jọ mukpahe izi Ọghẹnẹ. Rekọ Jesu ọ rẹ sai rue he.

Oyena ovrẹ no, Jesu o te zihe ze o te zere ahwo jọ enọ i zi he ruọ ilele ọsosuọ riẹ hayo emọ ewuhrẹ. Edẹ rai jọ họ Andru, Pita (nọ a re se Saimọn re), Filip gbe Nataniẹl (nọ a re se Batolomiu re). Jesu avọ ilele ekpokpọ enana a te kpobọ ubrotọ Galili. A tẹ doma ji Kena nọ ọrọ ẹwho Nataniẹl evaọ Galili. Etẹe Jesu o je kpohọ eha orọo ulogbo, o te ru oware ugbunu ọsosuọ riẹ. Kọ whọ riẹ oware na? O zihe ame họ udi.

Matiu 3:13-17; 4:1-11; 13:55; Mak 6:3; Jọn 1:29-51; 2:1-12.



Enọ

  • Amono họ ezae ivẹ nọ e rrọ uwoho na?
  • Ẹvẹ a rẹ rọ họ ohwo ame?
  • Amono Jọn ọ rẹ họ-ame vẹre?
  • Fiki ẹjiroro obọdẹ vẹ Jesu ọ rọ yare Jọn inọ ọ họe ame?
  • Ẹvẹ Ọghẹnẹ o ro dhesẹ nọ o were Riẹ eva inọ Jesu ọ họ-ame?
  • Eme ọ via nọ Jesu o kpohọ oria idhere jọ evaọ edẹ 40?
  • Amono jọ a rrọ usu ilele ọsosuọ Jesu, kọ eme họ oware igbunu ọsosuọ nọ o ru?

Enọ efa

  • Se Matiu 3:13-17.

    Didi oriruo ọrọ ame-ọhọ Jesu o fihotọ kẹ ilele riẹ? (Ol. 40:7, 8; Mat. 28:19, 20; Luk 3:21, 22)

  • Se Matiu 4:1-11.

    Ẹvẹ ona nọ Jesu ọ rọ rehọ Ikereakere na ruiruo o rọ ta udu họ omai awọ inọ u fo re ma wuhrẹ Ebaibol na ẹsikpobi? (Mat. 4:5-7; 2 Pita 3:17, 18; 1 Jọn 4:1)

  • Se Jọn 1:29-51.

    Ono Jọn Ọhọahwo-Ame na ọ kpọ ilele riẹ bru, kọ ẹvẹ ma sae rọ raro kele iei nẹnẹ? (Jọn 1:29, 35, 36; 3:30; Mat. 23:10)

  • Se Jọn 2:1-12.

    Ẹvẹ oware igbunu ọsosuọ nọ Jesu o ru u ro dhesẹ nọ Jihova ọ rẹ rehọ oware uwoma ọvuọvo gbọ idibo Riẹ ogbọ họ? (Jọn 2:9, 10; Ol. 84:11; Jem. 1:17)