Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 101: A Kpe Jesu No

Ikuigbe avọ 101: A Kpe Jesu No

RRI oware ugbunu nọ obe via na! Jesu a bi kpe na. A fi rie họ ehru ure. A tehe ibubẹ fihọ abọ gbe awọ riẹ. Fikieme ohwo jọ ọ jẹ gwọlọ ru Jesu oware onana? Fikinọ ahwo jọ amukpahe Jesu. Kọ whọ riẹ ahwo na? Omọvo rai jọ họ ekpehre ẹnjẹle na Setan Ẹdhọ na. Ọ yehọ ọnọ o ru Adamu avọ Ivi nọ a rọ ghẹmeeyo kẹ Jihova. Yọ Setan họ ọ nọ ọkpọ iwegrẹ Jesu họ thọ uzi ulogbo onana.

Jesu nọ o bi whu

Tubọ tao re a tẹ tehe Jesu họ ehru ure etenẹ, iwegrẹ riẹ i je rue’i eware iyoma. Kareghẹhọ epanọ arọ nyaze obọ ogege Getsemane nọ arọ rehiẹe vrẹ? Amono họ iwegrẹ eyena? Ẹhẹ, ae họ ilori egagọ na. Whaọ, j’oma ruẹ oware nọ ovia leliei.

Okenọ ilori egagọ na a rehọ Jesu vrẹ no, ikọ riẹ etẹ dhẹ vrẹ. A dhẹ siọ Jesu avọ iwegrẹ riẹ ọvo ba, keme ozọ umu rai no. Rekọ Pita avọ Jọn ikọ na a dhẹ thabọ họ. Yọ a bi lelai re a ruẹ oware nọ o te via kẹ Jesu.

Izerẹ na etẹ rehọ Jesu se Anas ọkpako na, ọ nọ ọjọ ozerẹ ologbo na. Ogbotu na ọria etẹ kri hi. Unoye no a tẹ rehọ Jesu kpobọ uwou ọ Kayafas, ọ nọ ọrọ ozerẹ ologbo enẹna. Ilori egagọ buobu a te kokohọ uwou riẹ.

A tẹ jọ uwou Kayafas mu ẹdhọ họ eguo. A rehọ ahwo ze re a ta erue kpahe Jesu. Ilori egagọ na kpobi etẹ ta nọ: ‘Ekpe ọvo a re kpe Jesu.’ Kọ ẹsiẹe anwo eya kue’i ovao, a tẹ rehọ ebọgo rai bọyẹe.

Okenọ enana kpobi erẹ via, yọ Pita ọrọ obọ otafe evaọ ighẹ na. Aso ọyena ekpahe ijemu, fikiere ahwo a te koko errae họ. Epanọ a rọ wariẹ errae họ be ria na, odibo ọmọtẹ jọ o te rri Pita ọ tẹ ta nọ: ‘Ohwo ọnana ọ jọ kugbe Jesu re.’ ‘Ijo, mẹ jọ kugbei hi!’ ere Pita o yo.

Isiasa ahwo a ta kẹ Pita inọ ọ jọ kugbe Jesu. Rekọ ẹsikpobi Pita ọvẹ ta nọ uzẹme he. Nọ Pita ọ wariẹ ẹme na oravesa, Jesu o te kuoma rẹriẹ ri riei. Otẹ da Pita gaga fikiọ erue enana nọ ọ ta na, ọ tẹ nya vrẹ ọ tẹ be viẹ.

Epanọ ọre ọ be rọ vaze evaọ ohiohiẹ Edisoi ẹkpoka na, izerẹ na a tẹ rehọ Jesu ze oria ẹgwuare ologbo rai, ọgua Sanhidri na. Etenẹ a jẹ gba oware nọ a bi ti rue’i. A tẹ rehiẹe se Pọntiọs Pailet osu ubrotọ Judia.

Izerẹ na etẹ ta kẹ Pailet nọ, ‘Ọzae ọnana ekphre ohwo. A re kpei no.’ Nọ Pailet ọ nọ Jesu enọ no, ọ tẹ ta nọ: ‘Mẹ ruẹ oware ovuovo nọ oru thọ họ.’ Kẹsena Pailet o te vi Jesu se Herọd Antipas. Herọd họ osu Galili, rekọ evaọ Jerusalem ọ rẹ ria. Herọd ọ gbẹ jẹ ruẹ oware ovo nọ Jesu oru thọ gbe he, fikiere o te viei zihe se Pailet.

Pailet ọ gwọlọ siobọ no Jesu kpo. Rekọ iwegrẹ Jesu a gwọlọ nọ ukpoye na a siobọ no omọfa nọ amu kpo. Ohwo ọnana họ Barabas oji na. U te oke uvo no nọ Pailet ọ rehọ Jesu ze otafe na. Ọ tẹ ta kẹ ahwo nọ: ‘Wha rri! Ovie rai!’ Rekọ ilori izerẹ i te bo nọ: ‘Rehiẹe vrẹ! Kpei no! Kpei no!’ Fikiere Pailet o te siobọ no Barabas kpo ọvọvẹ, a tẹ rehọ Jesu nyai kpe.

Abọ emuhọ uvo Edisoi ẹkpoka a rọ tehe Jesu họ ure. Whọ rẹ sae ruẹ rai evaọ ifoto na ha, rekọ tabọ tabọ Jesu a je bi kpe ogbulegbu evaọ ehru ure re. Ukiọkọ omojọ re Jesu owhu, ogbulegbu jọ ọ tẹ ta kẹe nọ: ‘Who ti kpobọ uvie ra roro mẹ.’ Jesu o te yo nọ: ‘Mẹ yaeya kẹ owhẹ inọ who ti lele omẹ jọ evaọ Aparadase.’

Kọ eya eyena i gbe gbunu? Kọ whọ riẹ aparadase nọ Jesu ọ be ta kpahe na? Aparadase nọ Ọghẹnẹ ọma evaọ emuhọ bovẹ ọjarọ? Ẹhẹ, evaọ otọakpọ. Okenọ Jesu o ti suẹ obọ odhiwu wọhọ ovie, o re ti zihe ohwo ọnana ze uzuazọ re ọ re awere Aparadase ọkpokpọ evaọ otọakpọ. Kọ ma gbẹ ghọghọ kpahe oyena?

Matiu 26:57-75; 27:1-50; Luk 22:54-71; 23:1-49; Jọn 18:12-40; 19:1-30.



Enọ

  • Ono ọ ghinẹ wha uwhu Jesu ze?
  • Eme ikọ na a ru nọ isu egagọ na a mu Jesu?
  • Eme ọ via evaọ uwou Kayafas, ozerẹ okpehru na?
  • Fikieme Pita ọ rọ ruọ otafe jẹ viẹ?
  • Nọ a zihe Jesu bru Pailet no, ubo eme ilori izerẹ na a bo?
  • Eme ọ via kẹ Jesu evaọ uvo Edisoi-Oka, kọ didi eyaa ọ yaa kẹ orumuomu nọ a kare kẹle iẹe?
  • Diẹse Aparadase nọ Jesu ọ ta ẹme kpahe na ọ te jọ?

Enọ efa

  • Se Matiu 26:57-75.

    Edhere vẹ ahwo okọto ukpehru ahwo Ju na a ro dhesẹ nọ a wo ubiudu uyoma? (Mat. 26:59, 67, 68)

  • Se Matiu 27:1-50.

    Fikieme ma jẹ sae ta nnọ ọkora nọ Judas ọ jọ na u no rie eva ze he? (Mat. 27:3, 4; Mak 3:29; 14:21; 2 Kọr. 7:10, 11)

  • Se Luk 22:54-71.

    Eme ma rẹ sai wuhrẹ evaọ ẹvro nọ Pita ọ vro Jesu evaọ aso nọ a ro vivi ei je mu ei na? (Luk 22:60-62; Mat. 26:31-35; 1 Kọr. 10:12)

  • Se Luk 23:1-49.

    Ẹvẹ Jesu ọ rehọ okienyẹ nọ a kienyẹe na, kọ eme ma rẹ sae jọ onana wuhrẹ? (Luk 23:33, 34; Rom 12:17-19; 1 Pita 2:23)

  • Se Jọn 18:12-40.

    Eme ma rẹ sai wuhrẹ no uzẹme na ze inọ, dede nọ ozodhẹ ohwo o lọhọ Pita oma evaọ ubroke, o dhidhi aro vi je zihe ruọ obọdẹ ukọ? (Jọn 18:25-27; 1 Kọr. 4:2; 1 Pita 3:14, 15; 5:8, 9)

  • Se Jọn 19:1-30.

    Didi eriwo owowa kpahe ekwakwa efe Jesu o wo? (Jọn 2:1, 2, 9, 10; 19:23, 24; Mat. 6:31, 32; 8:20)

    Ẹvẹ eme urere Jesu evaọ oke uwhu riẹ e rọ rrọ obọdẹ owhowhovia obokparọ inọ ọ kpare esuo ehrugbakpọ Jihova? (Jọn 16:33; 19:30; 2 Pita 3:14; 1 Jọn 5:4)