Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 100: Jesu Evaọ Ogege Na

Ikuigbe avọ 100: Jesu Evaọ Ogege Na

OKENỌ Jesu avọ ikọ riẹ a nya no ubruwou egediege na no, a te kpobọ ogege Getsemane. A nyaze etenẹ ẹsi buobu vrẹ no anwẹdẹ. Jesu ọ tẹ be ta kae enẹna nọ aroro re alẹ. Kẹsena ọ tẹ nya haro omojọ, o te go uzou kpotọ o te muhọ ẹlẹ.

Uwhremuna Jesu o te zihe ze o ria nọ ikọ riẹ erọ. Eme who roro nọ a re ruo? A rọ owezẹ! Isiasa Jesu ọ ta kae nọ ufo re aroro, rekọ kẹse kẹse nọ o zihe ze o ve diae họ owezẹ. Nọ Jesu o zihe ze orọ urere ọ tẹ ta kae nọ, ‘Ẹvẹ wha jẹ be wezẹ evaọ oke utiona? Auwa nọ a te jọ siobọ no mẹ kẹ iwegrẹ mẹ u te no.’

Nwanọ evaọ oke oyena a te yo edo ogbotu obuobu. Rri! Ahwo na avọ egbọdọ gbe elọkọ a be tha! Yọ a wha ikpẹ re e kẹ ae elo. Nọ akẹle no, ohwo jọ o te no ogbotu na ze ọ tẹ nya viọviọ bru Jesu. Ọ tẹ viọliẹe, wọhọ epanọ whọ rẹ ruẹ etenẹ na. Ohwo na họ Judas Iskariọt! Fikieme ọ jẹ viọlọ Jesu?

Judas nọ o bi vivie Jesu

Jesu ọ tẹ nọ: ‘Judas, kọ unu-oviọlọ who ro vivie omẹ?’ Ẹhẹ, unu-oviọlọ na họ oka. Oye oliẹliẹ ahwo nọ alele Judas riẹ nnọ ọnana họ Jesu, ohwo nọ a gwọlọ na. Fikiere iwegrẹ Jesu etẹ nya lahwe re a krei. Rekọ Pita ọ be te kae uvẹ hẹ re a rehọ Jesu ababọ ohọre. O te hiolo ọgbọdọ nọ ọwha lele omaze ọ tẹ nyao ọzae nọ ọkẹle riẹ. Ọgbọdọ na o te kie ọzae na uzou thọ ọ tẹ nyao ozọ obọze riẹ fia no. Rekọ Jesu ọ tẹ rehọ obọ te ozọ ọzae na o te siwiei.

Jesu ọ tẹ ta kẹ Pita nọ: ‘Zihe ọgbọdọ ra kpo ẹta. Kọ who gbe roro nọ mẹrẹ sae ta kẹ Ọsẹ mẹ re ọ rehọ idu enjẹle ze re a siwi omẹ?’ Ẹhẹ, ọ hẹ sai rue’i! Rekọ Jesu ọ ta kẹ Ọghẹnẹ re o vi enjẹle ọvuọvo zehe, keme ọ riẹ nọ oke nọ iwegrẹ riẹ a te jọ rehiẹe u te no. Fikiere ọ tẹ kae uvẹ a te sue’i vrẹ. Enẹna j’oma ruẹ oware nọ ovia kẹ Jesu.

Matiu 26:36-56; Luk 22:39-53; Jọn 18:1-12.



Enọ

  • Diẹse Jesu avọ ikọ riẹ a nya nọ a no uwou egediege na no, kọ eme ọ ta kẹ ae nọ a ru?
  • Eme Jesu ọ ruẹ nọ o zihe ziọ oria nọ ikọ riẹ a jọ, kọ bro ẹse onana o via?
  • Amono a ruọ ogege na, kọ eme Judas Iskariọt o ru, wọhọ epanọ uwoho na u dhesẹ?
  • Fikieme Judas ọ jẹ viọlọ Jesu unu, kọ eme Pita o ru?
  • Eme Jesu ọ ta kẹ Pita, rekọ fikieme Jesu ọ gbẹ rọ yare Ọghẹnẹ re o vi uvumọ ijẹle sei hi?

Enọ efa

  • Se Matiu 26:36-56.

    Ẹvẹ edhere nọ Jesu ọ rọ hrẹ ilele riẹ o rọ rrọ emamọ oriruo kẹ ekpako Ileleikristi nẹnẹ? (Mat. 20:25-28; 26:40, 41; Gal. 5:17; Ẹf. 4:29, 31, 32)

    Ẹvẹ Jesu o rri ekwakwa nọ e rẹ nwa oma nọ ohwo ọ rẹ rọ họre omọfa? (Mat. 26:52; Luk 6:27, 28; Jọn 18:36)

  • Se Luk 22:39-53.

    Nọ ẹnjẹle jọ ọ roma via kẹ Jesu evaọ ogege Getsemane re ọ bọe ga, kọ onana u dhesẹ nọ ẹrọwọ Jesu ọ jọ deghe deghe? Ru ei vẹ. (Luk 22:41-43; Aiz. 49:8; Mat. 4:10, 11; Hib. 5:7)

  • Se Jọn 18:1-12.

    Ẹvẹ Jesu ọ rọ thọ ilele riẹ no obọ enọ e nyaze ti mu ei, kọ eme ma rẹ sae jọ oriruo nana wuhrẹ? (Jọn 10:11, 12; 18:1, 6-9; Hib. 13:6; Jem. 2:25)