OH, OH! Owọhọ ẹsenọ Daniẹl ọ rọ evaọ uye ruaro. Rekọ ikpohrokpo na e be nwae oma ha! Kọ whọ riẹ onọ osoriẹ? Ono o fi Daniẹl họ evaọ etenẹ kugbe ikphrokpo enana kpobi? J’oma kiẹ via.

Enẹna ovie Babilọn họ ọzae nọ odẹ riẹ orọ Dariọs. Daniẹl ọwere riẹ gaga keme Daniẹl owolẹ gaga je wo areghẹ. Dariọs ọ salọ Daniẹl re ọ jọ osu ologbo evaọ uvie riẹ. Onana u te ru ahwo nọ akiọkọ evaọ uvie na re ihri họ Daniẹl, fikiere kọ ona họ oware nọ a ru.

Dariọs

Anya bru Dariọs a tẹ ta nọ: ‘Ma rọwo kugbe, O ovie, nnọ who re je uzi nọ eva edẹ 30 ohwo ọvuọvo ọ rẹ lẹ se ọghẹnẹ ọvuọvo ho hayo ohwo ho rekọ whẹ ọvo, O ovie. Otẹrọnọ ohwo jọ ọghọẹmeeyo, kọ a re fiei họ eva ọgọdọ kugbe ikpohrokpo.’ Dariọs ọ riẹ onọ osoriẹ nọ ahwo ọnana a jẹ gwọlọ nọ a ru uzi onana ha. Rekọ ororo nọ ẹjiroro na o re wowoma, fikiere o te kere uzi na. Enẹna a rẹ sai nwene uzi na ha.

Okenọ Daniẹl ọ riẹ kpahe uzi na, o te kpobọ uwou ọ tẹ lẹ, wọhọ epanọ o re ruẹ kẹse kẹse. Ahwo oyoma na a riẹ nọ Daniẹl ọ rẹ te siọ Jihova ba ẹlẹ se he. Eva e tẹ werae, keme orọ wọhọ nnọ oma nọ ama nọ a re si Daniẹl no orọ iruo eruo.

Okenọ Dariọs Ovie ọze riẹ onọ osoriẹ nọ ahwo ọnana a jẹ gwọlọ nọ a ru uzi onana, o te weri gaga. Rekọ ọ rẹ sai nwene uzi na ha, fikiere ọ tẹ kẹ uzi re a gbolo Daniẹl fihọ ọgọdọ ikpohrokpo. Rekọ ovie na ọ tẹ be ta kẹ Daniẹl: ‘Me rẹro nọ, Ọghẹnẹ ra nọ whọ rẹ gọ, o re ti siwi owhẹ.’

Dariọs ọrova gaga ọ sae wezẹ aso ọyena ha. Ohiohiẹ riẹ ọ tẹ dhẹ kpobọ ọgọdọ ikpohrokpo na. Whọ sae rue riẹ etẹe. O te bo via: ‘Daniẹl, odibo Ọghẹnẹ uzuazọ na! Kọ Ọghẹnẹ nọ whọ be gọ na ọ sai siwi owhẹ no ikpohrokpo na?’

Daniẹl nọ ọ rrọ ọgọdọ ikpohrokpo

‘Ọghẹnẹ o vi ukọ odhiwu riẹ ze,’ Daniẹl o yo na, ‘ọ tẹ gba enu ikpohrokpo na fikiere egbẹ nwa omẹ oma ha.’

Ovie na ọ tẹ ghọghọ gaga ọ tẹ kẹ uzi re a wọ Daniẹl no ọgọdọ na. Kẹsena ahwo oyoma nọ a jẹ dao re a si Daniẹl no na, o te fiai kẹ ikpohrokpo na. Tubọ tao re a te zi te obotọ ọgọdọ na, ikpohrokpo na i te vo mua’i i te wiri igbenwa rai kpobi.

Kẹsena Dariọs Ovie o te kere se ahwo kpobi nọ arọ evaọ otọ isuẹsu riẹ: ‘Me fi uzi họ nọ kohwo kohwo ọ rẹ kẹ Ọghẹnẹ Daniẹl adhẹwẹ. O re ru eware igbunu eruaro. Osiwi Daniẹl nọ ikpohrokpo ejẹ siẹe ba ẹre no.

Daniẹl 6:1-28.



Enọ

  • Ono họ Dariọs, kọ ẹvẹ o rri Daniẹl?
  • Eme ahwo ihrieriọ jọ a gele Dariọs ru?
  • Eme Daniẹl o ru nọ o yo kpahe uzi okpokpọ na?
  • Fikieme Dariọs ọ jẹ rọ rova te epanọ ọ sae rọ wezẹ hẹ, kọ eme o ru okiokiọ riẹ?
  • Didi eme Daniẹl ọ kpahe kẹ Dariọs?
  • Eme ọ via kẹ ikpehre ezae nọ e gwọlọ kpe Daniẹl na, kọ eme Dariọs o kere se ahwo kpobi nọ a rrọ otọ esuo riẹ?

Enọ efa

  • Se Daniẹl 6:1-28.

    Eme ẹgwae oyoma nọ a gba kpahe Daniẹl o kareghẹhọ omai kpahe oware nọ ewegrẹ a ru no re a whaha iruo Isẹri Jihova evaọ oke mai na? (Dan. 6:7; Ol. 94:20; Aiz. 10:1; Rom 8:31)

    Ẹvẹ idibo Ọghẹnẹ a sae rọ raro kele Daniẹl evaọ omarokpotọ kẹ “enọ a kẹ udu” na? (Dan. 6:5, 10; Rom 13:1; Iruẹru 5:29)

    Ẹvẹ ma sae rọ raro kele oriruo Daniẹl evaọ Jihova nọ ma rẹ gọ “kẹse kẹse”? (Dan. 6:16, 20; Fil. 3:16; Evia. 7:15)