Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigba avọ 78: Obọ nọ U bi Kere Ugbẹhẹ

Ikuigba avọ 78: Obọ nọ U bi Kere Ugbẹhẹ
Obọ nọ u bi kere ugbẹhẹ

EME ọ rẹ via etenẹ? Ahwo na a bi ru eha ilogbo. Ovie Babilọn o zizie odu erara ilogbo. A be rehọ igho oro gbe igho idọlọ efuafa gbe ido ero nọ a rehọ no tẹmple Jihova evaọ obọ Jerusalem ze rọ da idi. Rekọ, idudhe na, iziabọ ohwo e tẹ via, i te mu eme họ ekere fihọ ugbẹhẹ. Ozọ u te mu ohwo kpobi.

Bẹlsheza kugbe erara riẹ

Bẹlsheza, oruọmọ Nebukadneza, ọye ọ rọ ovie enẹna o te bo re a rehọ ahwo iwareghẹ riẹ rọ ze. ‘Kohwo kohwo nọ ọ sai se ekere ọnana jẹ fa otọ riẹ kẹ omẹ,’ ere ovie na ọ ta, ‘a re rue’i ọghọ eware buobu a ve je rue’i họ osu avesa nọ ọmai wo uzou evaọ uvie na.’ Rekọ ahwo iwareghẹ na ọvuọvo nọ ọ rẹ sai se ekere ugbẹhẹ na ọ rọ họ, hayo otọ riẹ ofa.

Oni ovie na o te yo edo na ọ tẹ nyaze ubruwou ulogbo nọ a jẹ re emu. Ọ tẹ ta kẹ ovie na nọ, ‘Iviena whọ nwane dhozọ ga te ere he. Ọzae jọ ọ rọ evaọ uvie ra na nọ ọ riẹ eghẹnẹ erẹri. Okenọ Nebukadneza ọsẹ ologbo ra ọ jọ ovie ọ tẹ rehiẹe ru ọnọ o wo uzou kẹ ahwo iwareghẹ riẹ kpobi. Odẹ riẹ họ Daniẹl. Jọ a sei ze, ọ rẹ te ta otọ onana kpobi kẹ owhẹ.’

Fikiere nọ a tẹme na a tẹ rehọ Daniẹl ze. Nọ ọ se okẹ kpobi ẹ rehọ no Daniẹl o te muhọ ẹ ta epanọ Jihova ọ rọ jọ oke jọ si Nebukadneza ọsẹ ologbo Bẹlsheza no ovie. ‘Ọ jẹ vioma gaga,’ ere Daniẹl ọ tae. ‘Jihova ọ tẹ kẹe uye.’

‘Rekọ whẹ,’ Daniẹl ọ ta kẹ Bẹlsheza, ‘ọ riẹ eware kpobi nọ evia kẹe, dede na whọ tẹ jẹ vioma wọhọ Nebukadneza. Whọ rehọ igho gbe ido ero no tẹmple Jihova ze, kọ e ye whọ rọ da. Who jiri eghẹnẹ nọ a rehọ ire gbe itho ru, whọ rehọ ọghọ kẹ Ọmemama Oride mai hi. Fiki oye Ọghẹnẹ o je vi obọ ze re ukere eme enana.

‘Onana họ oware nọ o kere,’ ere Daniẹl ọ tae: ‘MENE, MENE, TẸKẸL gbe PASIN.’

‘Otọ MENE họ Ọghẹnẹ okele edẹ uvie ra no jẹ rehiẹe te oba no. TẸKẸL họ a wawo owhẹ evaọ owawọ no a tẹ ruẹ nọ who woma ha. Otọ PASIN họ a rehọ uvie ra kẹ ahwo Midia gbe Pasia.’

Tubọ nọ Daniẹl ọ rọ ẹme ẹta na, yọ ahwo Midia gbe Pasia a muọ Babilọn họ ẹhọre no. A tẹ rehọ okpẹwho na a je kpe Bẹlsheza. Obọ nọ ukere fihọ ugbẹhẹ na u te ru gba evaọ aso ọyena! Rekọ eme ọ rẹ te via kẹ Ahwo-Izrẹl enẹna? Ma rẹ te gwọliẹ via obọna, rekọ orọ ọsosuọ ma ruẹ oware nọ ovia kẹ Daniẹl.

Daniẹl 5:1-31.



Enọ

  • Eme ọ via okenọ ovie Babilọn o se ehaa ilogbo jẹ rehọ igho gbe ido ero nọ a rehọ no etẹmpol Jihova ze evaọ Jerusalẹm jẹ da udi?
  • Eme Bẹlsheza ọ ta kẹ ahwo iwareghẹ riẹ, rekọ eme a sai ru hu?
  • Eme oni ovie na ọ ta kẹe inọ o ru?
  • Wọhọ epanọ Daniẹl ọ ta kẹ ovie na, fikieme Ọghẹnẹ o ro vi obọ na ze re u kere eme fihọ ugbẹhẹ na?
  • Ẹvẹ Daniẹl ọ fotọ eme nọ e rrọ ugbẹhẹ na?
  • Eme ọ via nọ Daniẹl ọ gbẹ be ta ẹme na?

Enọ efa

  • Se Daniẹl 5:1-31.

    Dhesẹ ohẹriẹ nọ o rrọ udevie ozodhẹ Ọghẹnẹ gbe oghẹrẹ ozọ nọ u mu Bẹlsheza okenọ ọ ruẹ obọ nọ u je kere eme fihọ ugbẹhẹ na. (Dan. 5:6, 7; Ol. 19:9; Rom 8:35-39)

    Ẹvẹ Daniẹl o ro dhesẹ aruọwha nọ ọ jẹ ta ẹme kẹ Bẹlsheza gbe ikpahwo riẹ na? (Dan. 5:17, 18, 22, 26-28; Iruẹru 4:29)

    Ẹvẹ Daniẹl uzou avọ 5 u ro fi ẹgba họ esuo ehrugbakpọ Jihova? (Dan. 4:17, 25; 5:21)