RRI ahwo nọ a be rehọ ọmoha ọnana se ẹkoko. Kọ whọ riẹ ohwo nọ ọ rọ? Ọnana họ Jerimaya. Ọ rọ ọruẹaro Ọghẹnẹ nọ o wo uzou gaga.

Ahwo nọ a be hwẹ Jerimaya

Nọ Josaya Ovie ọnwani mu edhọ na họ ẹraha no otọ na, Jihova ọ tẹ ta kẹ Jerimaya nọ ọ jọ ọruẹaro Riẹ. Dede na, Jerimaya o roro nnọ ọmaha hrọ kẹ ọruẹaro ọ jọ. Rekọ Jihova ọ ta nọ o re ti fiobọhọ kẹe.

Jerimaya ọ ta kẹ Ahwo-Izrẹl re a se eware iyoma ba eruo. ‘Eghẹnẹ nọ ahwo erẹwho na a be gọ erọ ọrue,’ ere ọ tae. Rekọ Ahwo-Izrẹl buobu edhọ egọ ewere rai viọ ukpenọ a gọ Jihova Ọghẹnẹ uzẹme na. Okenọ Jerimaya ọ ta kẹ ahwo na nnọ Ọghẹnẹ ọ rẹ te kae uye fiki eyoma rai, a vẹ hwẹe.

Ikpe etẹ vrẹ. Josaya o te whu, nọ evẹre esa evrẹ no Jehoakim ọmọzae riẹ ọ tẹ ze jọ ovie. Yọ Jerimaya ọ gbẹ be ta kẹ ahwo na: ‘A rẹ te raha Jerusalem otẹrọnọ wha gbe nwene idhere iyoma rai hi.’ Izerẹ na i te kru Jerimaya a te bo: ‘A re kpe owhẹ fiki eware nọ whọ rẹ ta na.’ Kẹsena a tẹ ta kẹ emọ-ivie Izrẹl: ‘A rẹ tehe Jerimaya kpe, keme ọ ta ẹme mukpahe okpẹwho mai.’

Eme Jerimaya o re ruẹ enẹna? Ozọ oriẹe emuoho! Ọ tẹ ta kẹ ai kpobi nọ: ‘Jihova o vi omẹ ze ta eware enana kẹ owhai. Otẹrọnọ wha gbe nwene idhere iyoma eyero rai hi, Jihova ọ rẹ te raha Jerusalem. Rekọ onana umu owhai ẹro: Otẹrọnọ wha kpe omẹ, yọ ohwo nọ o ru thọ họ wha kpe.’

Emọ-ivie na etẹ se Jerimaya ba uzuazọ, rekọ Ahwo-Izrẹl a nwene idhere iyoma rai hi. Uwhremuna Nebukadneza, ovie Babilọn, ọ tẹ nyaze re ọhọre wọsuọ Jerusalem. Ukuhọ riẹ Nebukadneza ọ tẹ rehọ Ahwo-Izrẹl ru idibo riẹ. Ọ rehọ idu ahwo buobu vrẹ kpohọ obọ Babilọn. Tubọ dai roro epanọ orẹ jọ kpere erara i mu owhẹ no uwou ra kpohọ otọ ọrara!

Jerimaya 1:1-8; 10:1-5; 26:1-16; 2 Ivie 24:1-17.



Enọ

  • Ono họ ọmoha nọ ọ rrọ uwoho na?
  • Ẹvẹ Jerimaya o rri oma riẹ nọ a ta kẹe inọ ọ jọ ọruẹaro, kọ eme Jihova ọ ta kẹe?
  • Didi ovuẹ Jerimaya ọ ruabọhọ jẹ vuẹ ahwo na?
  • Ẹvẹ izerẹ na a jẹ rọ daoma whaha Jerimaya, rekọ ẹvẹ o ro dhesẹ nnọ ọ be dhozọ họ?
  • Eme ọ via nọ emọ Izrẹl a rọwo nwene idhere iyoma rai hi?

Enọ efa

  • Se Jerimaya 1:1-8.

    Wọhọ epanọ oriruo Jerimaya o dhesẹ, eme o re ru ohwo te kẹ iruo Jihova? (2 Kọr. 3:5, 6)

    Didi uduotahawọ oriruo Jerimaya ọ kẹ izoge Ileleikristi nẹnẹ? (Ọtausi. 12:1; 1 Tim. 4:12)

  • Se Jerimaya 10:1-5.

    Didi ọtadhesẹ nọ o wo ẹgba ziezi Jerimaya o ro dhesẹ ugheghẹ nọ o rrọ eva nọ a re fihọ edhọ? (Jeri. 10:5; Aiz. 46:7; Hab. 2:19)

  • Se Jerimaya 26:1-16.

    Nọ a bi whowho ovuẹ unuovẹvẹ na nẹnẹ, ẹvẹ okiọkotọ nọ a wholo na a be rọ kareghẹhọ ujaje Jihova kẹ Jerimaya inọ ọ siọ “ẹme ọvo ba ha”? (Jeri. 26:2; Izie. 4:2; Iruẹru 20:27)

    Didi emamọ oriruo Jerimaya o fihotọ kẹ Isẹri Jihova nẹnẹ evaọ ewhowho unuovẹvẹ Jihova kẹ erẹwho na? (Jeri. 26:8, 12, 14, 15; 2 Tim. 4:1-5)

  • Se 2 Ivie 24:1-17.

    Oware uyoma vẹ u no rie ze nọ Juda o si ẹrọwọ no Jihova? (2 Iv. 24:2-4, 14)