Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 70: Jona Avọ Eri Ologbo Na

Ikuigbe avọ 70: Jona Avọ Eri Ologbo Na

RRI ọzae nọ ọ rọ evaọ ame na. Ọ rọ evaọ uye ruaro, ogbẹrọ ere? Eri ọyena ọbe te lọe! Whọ riẹ ohwo nọ ọzae ọnana ọ rọ? Odẹ riẹ họ Jona. Jo ma ruẹ epanọ o ro kie ruọ uye ulogbo utioye.

Jona yọ ọruẹaro Jihova. Nọ Elaesha ọruẹaro na owhu no ukri hi nọ Jihova ọ rọ ta kẹ Jona nọ: ‘Kpobọ okpẹwho ologbo Nanive. Umuomu ahwo nọ arọ o be orro hrọ, mẹ gwọlọ re whọ nya e ta kae kpahiẹe.’

Jona avọ eri ologbo na

Rekọ Jona ọ gwọlọ nọ ọ rẹ nya ha. Fikiere ọ tẹ ro okọ nọ ubi kpo obọfa siọ Nanive ba. Eva Jona egbẹ were Jihova ha fiki ẹdhẹ vrẹ na. Koyehọ o te fou ọwhibo ologbo. Ọ ga gaga te epanọ okọ na uje ro dhe idhe ezue. Enọ i bi bi okọ na ozọ u te mua’i gaga. A te bose eghẹnẹ rai re ethọ ae uke.

Ukuhọ riẹ Jona ọ tẹ ta kae: ‘Jihova mẹ rẹ gọ, Ọghẹnẹ nọ ọma odhiwu gbe akpọ na. Mẹ tẹ be dhẹ siọ oware nọ Jihova ọ ta kẹ omẹ nọ me ru ba.’ Enọ i bi bi okọ na a tẹ nọ: ‘Ovẹ ma re ru owhẹ re ọwhibo na ọfọ?’

‘Wha gbolo omẹ fihọ abade na, abade na ọ rẹ te wariẹ dhẹ,’ ere Jona ọ tae. Enọ i bi bi okọ na a gwọlọ ru o ye na ha, rekọ epanọ ọwhibo na o bi dhẹgẹga a te gbolo Jona no okọ na no uwhremu riẹ. Ọwhibo na ọ tẹ nwane fọ, abade na ọ tẹ wariẹ dhẹ.

Epanọ Jona o bi ro diwi kpobọ otọ ame na, eri ologbo na ọ tẹ lọe. Rekọ owhu hu. Edẹ esa gbe eso esa yọ ọ rọ evaọ eri ọyena. Jona o te weri gaga epanọ o ro yo ẹme Jihova ha re okpobọ Nanive. Kọ whọ riẹ oware nọ o zi ru?

Jona ọ lẹ se Jihova kpahe uke-otha. Kẹsena Jihova o te ru eri na kpa Jona fihọ otọ oyaya. Oyena ovrẹno Jona o te kpobọ Nanive. Kọ onana u gbe wuhrẹ omai epanọ orro te re ma ru oware kpobi nọ Jihova ọ tae?

Obe Jona Ebaibol na.



Enọ

  • Ono họ Jona, kọ eme Jihova ọ ta kẹe nọ o ru?
  • Fikinọ ọ gwọlọ kpohọ obonọ Jihova ọ ta kẹe he, eme Jona o ru?
  • Eme Jona ọ ta kẹ ibiokọ na inọ a ru re ẹkporo na o serihọ?
  • Wọhọ epanọ whọ be jọ uwoho na ruẹ na, eme ọ via nọ Jona o kie diwi evaọ ame na?
  • Ẹvẹ Jona ọ jọ eva eri ologbo na kri te, kọ eme ọ jọ etẹe ru?
  • Bovẹ Jona ọ nya nọ o no eva eri ologbo na ze, kọ eme onana u wuhrẹ omai?

Enọ efa

  • Se Jona 1:1-17.

    Ẹvẹ o jọ Jona oma nọ a vi ei inọ ọ nyae ta usiuwoma kẹ ahwo Nanive? (Jona 1:2, 3; Itẹ 3:7; Ọtausi. 8:12)

  • Se Jona 2:1, 2, 10.

    Ẹvẹ oriruo Jona ọ rọ kẹ omai udufihọ inọ Jihova o ti yo elẹ mai? (Ol. 22:24; 34:6; 1 Jọn 5:14)

  • Se Jona 3:1-10.

    Inọ Jihova ọ gbẹ rehọ Jona ru iruo ghele, dedenọ oke ọsosuọ ọ dhẹ no iruo riẹ, uduotahawọ vẹ onana o kẹ omai? (Ol. 103:14; 1 Pita 5:10)

    Eme oware nọ o via kẹ Jona avọ ahwo Nanive na u wuhrẹ omai kpahe ẹdhọ nọ ma re gu ahwo nọ a rrọ ẹkwotọ mai? (Jona 3:6-9; Ọtausi. 11:6; Iruẹru 13:48)