WHỌ riẹ ahwo nọ ezae nana erọ gbe oware nọ a re ruo? Abi kpohọ ẹmo, yọ ezae nọ erọ obaro na abe so ole. Rekọ whọ rẹ sae nọ: ‘Eme jabọ nọ eso-ile na a gbe wo egbọdọ gbe izuẹ nọ a rẹ rọ họre he?’ J’oma ruẹ.

Ahwo-Izrẹl nọ a be nyonya ẹmo

Jehoshafat họ ovie uvie erua-ivẹ ahwo Izrẹl. Ọ jẹ ria evaọ oke ovona wọhọ Ehab Ovie gbe Jezibẹle obọ uvie erua-10 ẹkpẹlobọre. Rekọ Jehoshafat yọ emamọ ovie, yọ ọsẹ riẹ Asa ọ jọ emamọ ovie re. Fikiere kọ ikpe buobu ahwo uvie erua-ivẹ obọze-ọre ayeri emamọ uzuazọ.

Rekọ enẹna oware jọ o tẹ via nọ u re ru ozọ mu ahwo. Enyuwou enẹ iyẹrẹ kẹ Jehoshafat: ‘Ogbaẹmo ruaro nọ uno ẹwho ọ Moab, Amọn gbe Ugbehru Seia a be wọ ohọre bru owhẹ tha.’ Ahwo-Izrẹl buobu a te kuku Jerusalem re a gwọlọ obọ ufihọ Jihova. A te kpo obọ tẹmple, kọ etẹe Jehoshafat ọ jẹ lẹ: ‘O Jihova Ọghẹnẹ mai, ma riẹ onọ ma re ruẹ hẹ. Ma rẹ sai lele ogbaẹmo ulogbo onana họre he. Whẹ ma rehọ ẹro so.’

Jihova o yoi, ọ tẹ rehọ odibo riẹ jọ ta kẹ ahwo na nọ: ‘Ẹmo na wha worie he rekọ ọr’Ọghẹnẹ. Wha rẹ te họre he. Thakpiri re wha ruẹ epanọ Jihova obi ti ro siwi owhai.’

Fikiere okiokiọ riẹ Jehoshafat ọ tẹ ta kẹ ahwo na: ‘Wha fi eva họ Jihova!’ Kẹsiẹe o te fi esuọile họ aro otu-ẹmo riẹ, nọ a be nya yọ a be so jiri Jihova. Kọ whọ riẹ oware nọ ovia okenọ akẹle ẹmo na no? Jihova o te ru otu-ẹmo ewegrẹ na re a họre omoma rai. Okenọ Ahwo-Izrẹl a te etẹe, omomọvo otu-ẹmo ọwegrẹ na owhu no!

Kọ Jehoshafat o gbe wo areghẹ nọ o ro fievahọ Jihova? Ma re ti wo areghẹ otẹrọnọ ma fi eva Hiẹ re.

1 Ivie 22:41-53; 2 Iruẹru-Ivie 20:1-30.


Enọ

  • Ono họ Jehoshafat, kọ oke vẹ ọ rọ rria uzuazọ?
  • Fikieme ozọ u je ro mu emọ Izrẹl, kọ eme ibuobu rai a ru?
  • Didi uyo Jihova ọ kẹ kpahe olẹ Jehoshafat?
  • Eme Jihova o ru taure ohọre na u te muhọ?
  • Didi oware ma rẹ sai wuhrẹ mi Jehoshafat?

Enọ efa

  • Se 2 Iruẹru-Ivie 20:1-30.

    Ẹvẹ Jehoshafat o ro dhesẹ oware nọ idibo ẹrọwọ Ọghẹnẹ a re ru okenọ a tẹ rẹriẹ ovao ku iyero imuozọ? (2 Irv. 20:12; Ol. 25:15; 62:1)

    Nọ orọnọ Jihova o wo ugogo edhere nọ ọ rẹ rọ ta ẹme kẹ ahwo riẹ na, edhere vẹ ọ be rọ ta ẹme kẹ omai nẹnẹ? (2 Irv. 20:14, 15; Mat. 24:45-47; Jọn 15:15)

    Okenọ Ọghẹnẹ ọ te rọ rehọ “ẹdẹ ẹmo ologbo Ọghẹnẹ Erumeru na” ze, ẹvẹ uyero mai o te rọ jọ wọhọ orọ Jehoshafat? (2 Irv. 20:15, 17; 32:8; Evia. 16:14, 16)

    Evaọ aruorokele ahwo Livai, abọ vẹ ekobaro gbe imishọnare a bi ru gba evaọ iruo usiuwoma ota akpọ-soso na nẹnẹ? (2 Irv. 20:19; Rom 10:13-15; 2 Tim. 4:2)