OKENỌ Jeroboam Ovie owhu no, kovie kovie nọ osu erua-10 ẹkpẹlobọre ahwo Izrẹl kọ oyoma. Ehab Ovie họ ovie nọ ọ mai yoma eva rai kpobi. Whọ riẹ onọ osoriẹ? Oware ulogbo jọ nọ osoriẹ họ aye riẹ, Jezibẹle Ovie-aye omuomu.

Jezibẹle yọ aye Izrẹl he. Ọmọtẹ ovie Saidon ọ rọ. Bal ọghẹnẹ ọrue na ọ jẹ gọ, ọ tẹ rẹriẹ Ehab gbe Ahwo-Izrẹl buobu efa nyae gọ Bal re. Jezibẹle omu kpahe Jihova o te kpe eruẹaro riẹ buobu. Ejọ i te dhere evaọ ighogho itho re a siae ba ekpe. Otẹrọnọ Jezibẹle ọ gwọlọ oware jọ, ọ rẹ sai kpe ohwo re ọruẹse woi.

Ẹdẹjọ Ehab Ovie o te je weri gaga. Fikiere Jezibẹle ọ tẹ nọe: ‘Ẹvẹ who je bi weri nẹnẹ?’

Ehab o te yo nọ, ‘Fiki oware nọ Nebọt ọ ta kẹ omẹ. Mẹ gwọlọ dẹ ọgbọ-evane riẹ. Rekọ ọ tẹ ta kẹ omẹ nọ mẹ rẹ sai woi hi.’

Jezibẹle ọ tẹ ta nọ: ‘Whọ ruawa ha. Meti rue’i kẹ owhẹ.’

Fikiere Jezibẹle o te kere ebe se ikpahwo jọ evaọ okpẹwho nọ ọzae ọnana Nebọt ọ be ria. ‘Wha gwọlọ ahwo yoma jọ re a ta nọ Nebọt ọla Ọghẹnẹ gbe ovie eka,’ ere ọ ta kae. ‘Kẹsena a ve si Nebọt no okpẹwho na a vẹ rọ itho fiei-kpe.’

Nọ Jezibẹle ọ nwane riẹ nọ Nebọt owhu no, ọ tẹ ta kẹ Ehab nọ: ‘Enẹna nyae rehọ ọgbọ-evane riẹ.’ Kọ whọ gbẹ rọwo nọ a rẹ kẹ Jezibẹle uye, fiki oware ugbunu utioye nọ oru?

Jezibẹle Ovie-Aye

Fikiere, eva oke jọ, Jihova o te vi Jehu ọzae na re ọ kẹe uye. Oke nọ Jezibẹle o yo nọ Jehu ọbe tha, o te si ibiaro riẹ ọ tẹ dao ruẹrẹ oma riẹ re owo erru. Rekọ nọ Jehu ọnya ze nọ ọ jẹ ruẹ Jezibẹle evaọ unwido, o te se ezae nọ erọ evaọ uwou ovie na: ‘Wha geliei fihọ otọ!’ Ezae na i te yo, wọhọ epanọ whọ rẹ ruẹ evaọ ifoto na. Ageli rie fihọ otọ o te whu. Onana họ ukuhọ Jezibẹle Ovie-aye omuomu na.

1 Ivie 16:29-33; 18:1-4; 21:1-16; 2 Ivie 9:30-37.



Enọ

  • Ono họ Jezibẹle?
  • Eme ọ lẹliẹ Ehab Ovie na jọ ọkora ẹdẹjọ?
  • Eme Jezibẹle o ru re ọgbọ-evaene Nebọt o te Ehab, ọzae riẹ obọ?
  • Ono Jihova o vi re ọ kẹ Jezibẹle uye?
  • Wọhọ epanọ whọ rẹ sae ruẹ evaọ uwoho na, eme ọ via nọ Jehu o te uwou-ovie Jezibẹle?

Enọ efa

  • Se 1 Ivie 16:29-33 gbe 18:3, 4.

    Ẹvẹ eware e jọ Izrẹl yoma te evaọ etoke Ehab Ovie na? (1 Iv. 14:9)

  • Se 1 Ivie 21:1-16.

    Ẹvẹ Nebọt o ro dhesẹ nọ o wo udu je dhesẹ nọ o wo omarokpotọ kẹ Jihova? (1 Iv. 21:1-3; Izerẹ 25:23-28)

    Rono oriruo Ehab ze, eme ma rẹ sai wuhrẹ kpahe oware nọ ma re ru otẹrọnọ irẹro mai i gbe te omai obọ họ? (1 Iv. 21:4; Rom 5:3-5)

  • Se 2 Ivie 9:30-37.

    Eme ma re wuhrẹ no ọwhọ Jehu evaọ eruo oreva Jihova ze? (2 Iv. 9:4-10; 2 Kọr. 9:1, 2; 2 Tim. 4:2)