OKENỌ Devidi omuhọ esuo no evaọ Jerusalem, Jihova ọ tẹ kẹ ogbaẹmo riẹ obokparọ vi ewegrẹ rai ẹsi buobu. Jihova ọya eya nọ ọ te rehọ otọ Kenan kẹ Awho-Izrẹl. Whaọ enẹna, fiki obufihọ Jihova, omaotọ na kpobi nọ ayaeya riẹ kae na u te zihe ruọ orai uwhremuna. Devidi yọ emamọ osu. O you Jihova. Fikiere oware ọsosuọ jọ nọ ọkaki ru okenọ ọ rehọ Jerusalem no họ etehe ọvọ Jihova nọ ọ rehọ ze etẹe. Ọ tẹ jẹ gwọlọ bọ tẹmple nọ a re fie họ.

Okenọ Devidi ọkpako no, o te ru oruthọ oyoma. Devidi ọ riẹ nọ othọ re a rehọ oware nọ omọfa owoi. Rekọ owọwọ jọ, nọ ọ jọ ehru uwou uvie riẹ, o te riri obotọ ọ tẹ ruẹ aye jọ nọ owo erru gaga. Odẹ riẹ họ Batshẹba, ọzae riẹ yọ omọvo elakpa-ẹmo riẹ nọ odẹ riẹ orọ Uraya.

Devidi ọ gwọlọ Batshẹba ga te epanọ o ro rue’i ze obọ uwou uvie riẹ. Yọ ọzae riẹ okpobọ ohọre. Koyehọ, Devidi o ru uyoyou kẹe uwhremu riẹ aye na ọ tẹ ruẹ no nọ o ti wo ọmọ. U te kpokpo Devidi gaga ọ tẹ vuẹ uwou se Joab oletu ogbaẹmo riẹ re afi Uraya họ evaọ edhẹmo aro oria nọ a je kpei no. Okenọ Uraya owhu no, Devidi ọ tẹ rọo Batshẹba.

Jihova o te muofu kẹ Devidi gaga. Koyehọ o te vi Netan odibo riẹ re ọ nya’e ta iruthọ riẹ rọ kẹe. Whọ sae ruẹ Netan etẹe nọbe ta kẹ Devidi. Devidi oweri gaga kẹ oware nọ o ru, fikiere Jihova ọ gbẹ tehiẹe kpe he. Rekọ Jihova ọ tẹ ta nọ: ‘Fiki epanọ who ru eware iyoma enana, who re tiwo ukpokpoma ruaro evaọ uwou ra.’ Who ri ukpokpoma nọ Devidi owoi!

Orọ-sosuọ, ọmọzae Batshẹba owhu. Kẹsena Amnọn ọmọzae ọtuyẹ Devidi o te kru Tama ọmọtẹ ọsẹ riẹ nọ otọ ofọ ọ jẹ gba uyoyou riẹ hiẹe. Ofu o te mu Absalom ọmọzae Devidi gaga kpahe onana o te kpe Amnọn. Okeofa Absalom o te mu ahwo buobu họ ẹwere ọ jẹ rehọ oma riẹ ru ovie. Ukuhọriẹ, Devidi họ ọ nọ ọkparobọ ẹmo wọsuọ Absalom, ọ nọ akpe no na. Ẹhẹ, Devidi o wo ukpokpoma ruaro.

Netan nọ ọ be kẹ Devidi ohrẹ

Evaọ udevie onana kpobi, Batshẹba o je yẹ ọmọzae nọ a se nọ Solomọn. Nọ Devidi ọkpako no jẹbe mọ, Adonija ọmọzae riẹ ọ jẹ dao ru omariẹ họ ovie. Oye jabọ Devidi o je ru ozerẹ nọ a re se Zadọk su ewhri họ uzou Solomọn re udhesẹ nọ Solomọn ọ te jọ ovie. Onana ovrẹ no ukrihi Devidi o te whu yọ ọkpako te ikpe 70. Ikpe 40 osu, rekọ enẹna Solomọn họ ọ nọ ọ rọ ovie Izrẹl.

2 Samuẹle 11:1-27; 12:1-18; 1 Ivie 1:1-48.



Enọ

  • Avọ obufihọ Jihova, eme ọ via kẹ ẹkwotọ Kenan uwhremu na?
  • Eme ọ via owọwọ ẹdẹjọ nọ Devidi ọ jọ ehru uwou-ovie riẹ?
  • Fikieme eva e rọ dha Jihova gaga kpahe Devidi?
  • Evaọ uwoho na, ono Jihova o vi bru Devidi re ọ vuẹe kpahe izieraha riẹ, kọ eme ọzae na ọ ta nọ o te via kẹ Devidi?
  • Didi ukpokpoma u te Devidi?
  • U no Devidi no, ono o zihe ro ovie Izrẹl?

Enọ efa

  • Se 2 Samuẹle 11:1-27.

    Fikieme iruo Jihova nọ ma rẹ jọ wobọ ẹsikpobi o jẹ rọ ọthọwẹ kẹ omai?

    Ẹvẹ Devidi o ro kie ruọ uzioraha, kọ didi unuovẹvẹ onana o rrọ kẹ idibo Jihova nẹnẹ? (2 Sam. 11:2; Mat. 5:27-29; 1 Kọr. 10:12; Jem. 1:14, 15)

  • Se 2 Samuẹle 12:1-18.

    Eme ekpako gbe esẹgbini a rẹ sai wuhrẹ no oghẹrẹ nọ Netan ọ rọ kẹ Devidi ohrẹ ze? (2 Sam. 12:1-4; Itẹ 12:18; Mat. 13:34)

    Fikieme Jihova ọ rọ riohrọ Devidi? (2 Sam. 12:13; Ol. 32:5; 2 Kọr. 7:9, 10)