Devidi nọ ọ be thọ ogodẹ riẹ

WHỌ sae ruẹ oware nọ ovia na? Ọmọzae na osiwi omogodẹ ọsese nana ro no obọ adaka na. Adaka na ọ nyaze o te mu omogodẹ na vrẹ re ọ nya’e riẹe. Rekọ ọmọzae na ọ tẹ dhẹ lelai, o te siwi omogodẹ na no unu adaka na. Okenọ adaka na ọkparoma kpehru, ọmọzae na o te mue’i rọ tehe otọ whu! Eva oke ofa osiwi ogodẹ no obọ okpohrokpo. Ọgbẹrọ ọmọzae ọhwaro? Kọ whọ riẹ ohwo nọ ọ rọ?

Ọnana họ ọmoha Devidi. Ọ jẹ ria eva ẹwho ọ Bẹtlẹhẹm. Ọsede riẹ ọ jọ Obẹd, ọmọzae Rut avọ Boaz. Kọ whẹ kareghẹ hae? Ọsẹ Devidi họ Jẹsi. Devidi ọ jẹ sẹro igodẹ ọsẹ riẹ. A yẹ Devidi ikpe 10 no re Jihova ọ tẹ ha Sọl ro mu ovie.

Oke u tete okenọ Jihova ọ rọ ta kẹ Samuẹle nọ: ‘Rehọ obọdẹ ewhri jọ re whọ nya kpohọ obọ uwou Jẹsi eva Bẹtlẹhẹm. Mẹ ha ọmọzae riẹ jọ nọ ọ te jọ ovie no.’ Okenọ Samuẹle ọ rọ ruẹ Eliab ọkpako emezae Jẹsi, ọ tẹ ta kẹ omobọ riẹ nọ: ‘Umuẹro nọ ọnana họ ọnọ Jihova ọ ha na.’ Rekọ Jihova ọ ta kẹe nọ: ‘Who rri epanọ otheri te gbe epanọ o wo erru te he. Mẹ ha riẹ ro mu ovie he.’

Fikiere Jẹsi o te se ọmọzae riẹ Abinadab ọ tẹ rehiẹ se Samuẹle. Rekọ Samuẹle ọ tẹ ta nọ: ‘Ijo, Jihova ọ ha riẹ gbehe.’ Ofariẹ ọ tẹ jẹ rehọ ọmọzae riẹ Shama rehọ ze. Samuẹle ọ tẹ jẹ ta nọ: ‘Ijo, Jihova ọ ha ọnana gbere he.’ Jẹsi ọ rehọ emezae ihrẹ riẹ rose Samuẹle, rekọ Jihova ọ ha ọvuọvo udevie rai hi. ‘Enana họ emezae ra kpobi?’ ere Samuẹle ọ nọ.

Jẹsi ọ tẹ ta nọ: ‘Ọ rọ ọmaha vievie okiọkọ. Rekọ ọ nya vrẹ be sẹro igodẹ.’ Okenọ a rọ rehọ Devidi ruọ eva, Samuẹle ọ sae rue riẹ nọ o re ziezi-ọmọzae. ‘Ọnana họ ọmọ na,’ ere Jihova ọ tae. ‘Ku ewhri kue’i.’ Yọ onana họ onọ Samuẹle o ru. Oke na o be te tha nọ Devidi ọ be te rọ ze ovie Izrẹl.

1 Samuẹle 17:34, 35; 16:1-13.



Enọ

  • Didi odẹ ọmọzae nọ ọ rrọ uwoho na, kọ ẹvẹ ma rọ riẹ nọ ọ wharo?
  • Diẹse Devidi ọ jẹ rria, kọ didi odẹ ọsẹ gbe ọsẹ-ode riẹ?
  • Fikieme Jihova ọ rọ ta kẹ Samuẹle inọ o kpohọ uwou Jẹsi evaọ Bẹtlẹhẹm?
  • Eme ọ via nọ Jẹsi ọ rehọ emezae ihrẹ riẹ bru Samuẹle ze?
  • Nọ a rehọ Devidi rueva, eme Jihova ọ ta kẹ Samuẹle?

Enọ efa

  • Se 1 Samuẹle 17:34, 35.

    Ẹvẹ eware nana nọ e via na i ro dhesẹ udu nọ Devidi o fihọ Jihova? (1 Sam. 17:37)

  • Se 1 Samuẹle 16:1-14.

    Ẹvẹ eme ọ Jihova eva 1 Samuẹle 16:7 i re ro fi obọ họ kẹ omai whaha ọriẹwẹ gbe oma nọ a rẹ gbẹre fiki eriwo okafe? (Iruẹru 10:34, 35; 1 Tim. 2:4)

    Ẹvẹ oriruo Sọl o ro dhesẹ nọ okenọ Jihova o te si ẹzi ọfuafo riẹ no ohwo oma no, ẹzi oyoma, hayo isiuru nọ a re ro ru eyoma, e sae rehọ ẹta riẹ evaọ oma ohwo na? (1 Sam. 16:14; Mat. 12:43-45; Gal. 5:16)