IKPE eree ọvo Josaya ọkpako te nọ ọ rọ jọ ovie erua ivẹ obọze-ọre Izrẹl. Onana omaha hrọ kẹ ohwo re ọ jọ ovie. Fikiere kọ ekpako jọ i fiobọhọ kẹe su orẹwho na evaọ emuhọ.

Nọ Josaya ọ jọ ovie ikpe ihrẹ no o te mu Jihova họ ẹgwọlọ. Olele oriruo emamọ ivie wọhọ Devidi, Jehoshafat, gbe Hẹzikaya. Fikiere Josaya ọ tẹ jọ oke nọ ọ gbẹ jọ ọmaha ru oware aruọwha.

Josaya ovie na kugbe ezae riẹ nọ a be raha emedhọ

Evaọ oke krẹkri Ahwo-Izrẹl buobu a rọ jọ yoyoma gaga. A gọ eghẹnẹ erue. A kigwẹ kẹ edhọ. Fikiere Josaya avọ ahwo riẹ a tẹ nya mu egagọ ọrue họ esino otọ na. Enana erọ iruo ilogbo keme ahwo nọ arọ eghẹnẹ erue ẹgọ a bu vi ere. Whọ sae ruerẹ Josaya gbe ahwo riẹ etenẹ nọ a bi kporo edhọ na.

Oke ofa, Josaya o te fi ezae esa họ ẹro ọsa ọ ẹruẹrẹ tẹmple Jihova. A tẹ zọhọ igho mi ahwo no avẹ rehae kẹ ezae enana re arọ hwa osa iruo nọ a bi ti ru. Epanọ a bi ro ru iruo tẹmple na, Hilkaya ozerẹ okpehru na ọ tẹ ruẹ oware ulogbo jọ. Oye na họ obe uzi nọ Jihova ọ rehọ Mosis kere anwọ oke dibi dibi nọ ovrẹ no. Yọ uvru no ikpe buobu.

A tẹ rehọ obe na se Josaya, ọ tẹ ta nọ a sei kẹe. Epanọ o bi ro yo na, Josaya ọ tẹ ruẹ no nọ ahwo arọ uzi Jihova ekoko anwẹdẹ ze he. O te weri gaga fiki onana, fikiere ọ tẹ bẹre iwu riẹ, wọhọ epanọ whọ rẹ ruẹ etenẹ na. Ọ tẹ ta nọ: ‘Jihova o bi mu ofu kẹ omai, keme esẹ mai ikoko izi nọ a kere họ evaọ obe onana ha.’

Shefan avọ Josaya ovie na

Josaya ọ tẹ ta kẹ Hilkaya ozerẹ okpehru nnọ ọ gwọlọ oware nọ Jihova o bi ti rua’e via. Hilkaya ọ tẹ nya bru Họlda aye na, ọnọ ọ rọ ọruearo-aye, ọ tẹ nọe. Ọ tẹ kẹe ovuẹ onana no obọ Jihova ze re ọwha zihe bru Josaya: ‘A rẹ te kẹ Jerusalem gbe ahwo na kpobi uye keme a gọ eghẹnẹ erue, otọ na o tẹ vọ avọ eyoma. Rekọ fiki epanọ whẹ, Josaya, o ru oware uwoma na, uye onana orẹ tha ha bẹse nọ uwhu ra orẹ vrẹ no.’

2 Iruẹru Ivie 34:1-28.



Enọ

  • Ẹvẹ Josaya ọ kpako te nọ o zihe ruọ ovie, kọ eme o muhọ eru nọ ọ jọ ovie te ikpe ihrẹ no?
  • Eme whọ ruẹ Josaya nọ o bi ru evaọ uwoho ọsosuọ na?
  • Eme ozerẹ okpehru na ọ ruẹ evaọ okenọ ezae na a jẹ ruẹrẹ etẹmpol na?
  • Fikieme Josaya ọ rọ bẹre iwu riẹ?
  • Didi ovuẹ nọ u no obọ Jihova ze Họlda ọruẹaro-aye na ọ rọ kẹ Josaya?

Enọ efa

  • Se 2 Iruẹru-Ivie 34:1-28.

    Didi oriruo Josaya o fihotọ kẹ ahwo nọ emamọ esẹgbini a yọrọ no emaha ze he? (2 Irv. 33:21-25; 34:1, 2; Ol. 27:10)

    Obọdẹ owọ vẹ Josaya ọ jẹ rọ wha egagọ uzẹme haro evaọ ukpe avọ 8, ukpe avọ 12, gbe ukpe avọ 18 orọ esuo riẹ? (2 Irv. 34:3, 8)

    Didi oware kpahe ẹruorote eria egagọ mai ma re wuhrẹ no iriruo ọ Josaya Ovie na gbe Hilkaya Ozerẹ Okpehru na ze? (2 Irv. 34:9-13; Itẹ 11:14; 1 Kọr. 10:31)