Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 64: Solomọn Ọbọ Tẹmple Na

Ikuigbe avọ 64: Solomọn Ọbọ Tẹmple Na

TAORE Devidi o te whu, ọ rehọ oma-ebabọ nọ uno obọ Ọghẹnẹ ze kẹ Solomọn re a rọbọ tẹmple Jihova. Evaọ ukpe avene esuo riẹ, Solomọn o te mu tẹmple na họ ẹbọ, yọ ikpe ihrẹ gbe ubro o rehọ a tẹ bọi re. Idu ahwo ẹko ikpe buobu rai iru iruo tẹmple na, yọ igho nọ a raha bọ uwou na i re buobu gaga. Onọ o jẹ rọ ere họ oro gbe idọlọ-efuafo nọ a raha fihiẹe ibu gaga.

Tẹmple na o wo ibriwou ilogbo ivẹ, wọhọ epanọ uwoudhu-egagọ uwoi. Rekọ ibriwou enana e rro te enọ ejọ evaọ uwoudhu-egagọ na isiava. Solomọn ọ tẹ rehọ etehe-ọvọ na fihọ evaọ ubruwou obọ eva tẹmple na, yọ eware efa nọ ejọ evaọ uwoudhu-egagọ na a fi rai họ evaọ ubruwou odekọ.

Okenọ tẹmple na o re no, eha ilogbo etẹ jọ. Solomọn o te kigwẹ evaọ aro tẹmple na ọ tẹ lẹ, wọhọ epanọ whọ rẹ ruẹ evaọ ifoto na. ‘Tubọ makọ odhiwu na kpobi dede ọ rro te epanọ ọ sae rọ gba owhẹ hẹ,’ ere Solomọn ọ ta kẹ Jihova, ‘kabikọ tẹmple nana nọ e mae kawo na ha. Rekọ, O Ọghẹnẹ mẹ, ivie yokẹ ahwo ra okenọ a lẹ riri etenẹ.’

Solomọn ovie na nọ ọ be lẹ

Okenọ Solomọn o ku olẹ riẹ họ no, erae i te no obọ odhiwu ze. Etẹ mahe erao nọ arehọ dhe idhe. Elo ọnwranwra nọ o no obọ Jihova ze ọ tẹ vọ tẹmple na. Onana ute dhesẹ nọ Jihova o bi yo, jegbe nọ tẹmple na gbe olẹ Solomọn ewere riẹ. Enẹna ukpenọ akpobọ uwoudhu-egagọ kọ tẹmple ozihe ro oria nọ ahwo a be nya tha jọ gọ.

Oke krẹkri Solomọn osu evaọ edhere areghẹ, yọ ahwo a be ghọghọ. Rekọ Solomọn ọ rehọ eyae buobu no erẹwho efa ze enọ e be gọ Jihova ha. Kọ whọ sae ruẹ ọvo rae jọ nọ ọ be gọ evaọ aro ẹdhọ na? Ukuhọriẹ eyae Solomọn i te rue’i gọ eghẹnẹ efa re. Kọ whọ riẹ oware nọ ovia okenọ Solomọn oru onana? Ogbe je ru ahwo yoyou ofa ha. Ọ tẹ ze ga eva, eva egbẹ were ahwo na ofa ha.

Solomọn ovie na nọ ọ be gọ ẹdhọ

Onana u te ru Jihova muofu kẹ Solomọn, ọ tẹ ta kẹe nọ: ‘Me re ti mi owhẹ uvie na mẹ vẹ rehiẹe kẹ omọfa. Me re ti ru onana eva oke uzuazọ ra ha, rekọ evaọ oke esuo ọmọzae ra. Yọ orọnikọ ahwo uvie na kpobi me re ti mi ọmọzae ra ha.’ Jọ ma ruẹ epanọ onana ovia rri.

1 Iruẹru-Ivie 28:9-21; 29:1-9; 1 Ivie 5:1-18; 2 Iruẹru-Ivie 6:12-42; 7:1-5; 1 Ivie 11:9-13.



Enọ

  • Bro ikpe Solomọn ọ rọ bọ etẹmpol ọ Jihova, kọ fikieme ebabọ na e jẹ rehọ ugho bu tere?
  • Bro ibruwou ilogbo e rrọ etẹmpol na, kọ eme a fihọ ubruwou obeva na?
  • Eme Solomọn ọ ta evaọ olẹ riẹ nọ a bọ etẹmpol na re no?
  • Ẹvẹ Jihova o ro dhesẹ nọ olẹ Solomọn o were riẹ?
  • Eme eyae Solomọn e lẹle riẹ ru, kọ eme ọ via kẹ Solomọn?
  • Fikieme Jihova ọ rọ dheva kẹ Solomọn, kọ eme Jihova ọ ta kẹe?

Enọ efa

  • 1. Se 1 Iruẹru-Ivie 28:9, 10.

    Ma te roro kpahe eme ọ Devidi nọ a kere fihọ 1 Iruẹru-Ivie 28:9, 10, eme ma rẹ daoma ru evaọ uzuazọ ikẹdẹ kẹdẹ mai? (Ol. 19:14; Fil. 4:8, 9)

  • Se 2 Iruẹru-Ivie 6:12-21, 32-42.

    Ẹvẹ Solomọn o ro dhesẹ nọ uvumọ uwou nọ ohwo-akpọ ọ bọ o rẹ gba Ọghẹnẹ Oride na ha? (2 Irv. 6:18; Iruẹru 17:24, 25)

    Didi oware eme ọ Solomọn nọ e rrọ 2 Iruẹru-Ivie 6:32, 33 i dhesẹ kpahe Jihova? (Iruẹru 10:34, 35; Gal. 2:6)

  • Se 2 Iruẹru-Ivie 7:1-5.

    Wọhọ epanọ oma o wọ emọ Izrẹl jiri Jihova nọ a ruẹ oruaro riẹ na, ẹvẹ oma u re ru omai nẹnẹ nọ ma te roro epanọ Jihova ọ be ghale ahwo riẹ? (2 Irv. 7:3; Ol. 22:22; 34:1; 96:2)

  • Se 1 Ivie 11:9-13.

    Ẹvẹ uzuazọ Solomọn u ro dhesẹ epanọ u wuzou te re ma kru ẹrọwọ rite urere? (1 Iv. 11:4, 9; Mat. 10:22; Evia. 2:10)