Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 61: Arehọ Devidi Mu Ovie

Ikuigbe avọ 61: Arehọ Devidi Mu Ovie

SỌL ọ wariẹ dao re omu Devidi. Ọ rehọ 3,000 otuẹmo riẹ nọ emae riẹ efio a tẹ nyae gwọliẹe. Nọ Devidi ọ riẹ onana no, o te vi izuẹ nyae gwọlọ oria nọ Sọl avọ ahwo riẹ afa evuẹ họ aso ọyena. Koyehọ Devidi ọ tẹ nọ imava riẹ nnọ: ‘Whai ọ vẹ o ti lele omẹ kpobọ evuẹ Sọl?’

Devidi nọ o bi se Sọl ovie na

Abishai o te yo nọ, ‘Mẹ rẹ nya.’ Abishai yọ ọmọzae Zeruaya nọrọ oniọvo ọmọtẹ Devidi. Okenọ Sọl avọ ahwo riẹ a jọ owezẹ, Devidi avọ Abishai a tẹ lẹlẹ siruọ evuẹ na. A tẹ tọlọ ozuẹ Sọl gbe omototo-ame riẹ, nọ ojọ obọ uzou Sọl. Ohwo ọvo ọ rue rai hayo yo edo rai hi keme yọ ai kpobi awezẹ diwi no.

Rri Devidi avọ Abishai enẹna. A nya vrẹ no, yọ a rọ omavrẹrẹ obọ ehru ugbehru. Devidi o te bo se oletu ẹmo Izrẹl: ‘Abna, ẹvẹ whọ gbẹ be sẹro olori raha, ovie na? Riri! Diẹse ozuẹ riẹ je gbe omototo-ame riẹ e rọ?’

Sọl ọ tẹ rọwo. O te vuhu urru Devidi, ọ tẹ nọ: ‘Kọ whẹ, Devidi?’ Kọ whọ sae jọ obe ruẹ Sọl avọ Abna?

Devidi o te yo kẹ Sọl nọ, ‘E, olori mẹ ovie na.’ Devidi ọ tẹ nọ: ‘Ẹvẹ whọ jẹ be gwọlọ omẹ muẹ? Didi oware uyoma me ru? Ozuẹ ra ọna, O ovie. Jọ omọvo rai ọ nyaze te rehiẹe.’

Sọl ovie na avọ Abna

Sọl ọ tẹ rọwo nọ, ‘Me ru thọ. Me ru oware ugheghẹ.’ Kọ e tẹ Devidi ọ jẹ nyawa, Sọl o te zihe kpo. Rekọ Devidi ọ tẹ ta kẹ omariẹ nọ: ‘Ẹdẹjọ evaọ edẹ enana, Sọl o re ti kpe omẹ. Mẹ rẹ dhẹ kpohọ otọ Ahwo-Filistia.’ Ere họ onọ o ru. Devidi ọ sae viẹ Ahwo-Filistia họ o te rua’e rọwo nọ abọ rai ọrọ.

Evaọ oke ofa Ahwo-Filistia a tẹ nya kpehru wọ ohọre bru Izrẹl. Evaọ ẹmo na, a je kpe Sọl gbe Jonatan. Onana o tẹ kẹ Devidi uweri gaga, o je kere olezi, ọnọ ọ jẹ so nọ: ‘Me weri kẹ owhẹ, Jonatan oniọvo mẹ. Whọ ghare kẹ omẹ kẹhẹ!’

Onana ovrẹ no Devidi o te zihe bru Izrẹl obọ okpẹwho ologbo Hibrọn. Ẹmo o te kie kẹ ahwo nọ asalọ Ishboshẹt ọmọzae Sọl nọ ọjọ ovie gbe ahwo nọ a gwọlọ nọ Devidi ọ jọ ovie. Rekọ ukuhọ riẹ ahwo Devidi a tẹ kparobọ. Devidi ikpe 30 ọkpako te nọ a rehiẹe mu ovie. O te su egbukpe ihrẹ gbe ubro evaọ Hibrọn. Emezae jọ nọ a jọ etẹ yẹ kẹe edẹ rai họ Amnọn, Absalọm gbe Adonija.

Oke u tete nọ Devidi avọ ahwo riẹ a rọ nya kpobọ ehru re a rehọ okpẹwho ezi nọ a re se Jerusalem. Joab ọmọzae ọfa Zeruaya, oniọvo ọmọtẹ Devidi ọye ọkaro ẹmo na. Fikiere Devidi ọ tẹ hwosa kẹ Joab nọ oro rue’i họ oletu ogbaẹmo riẹ. Enẹna Devidi o te muhọ e suo evaọ Jerusalem okpẹwho na.

1 Samuẹle 26:1-25; 27:1-7; 31:1-6; 2 Samuẹle 1:26; 3:1-21; 5:1-10; 1 Iruẹru-Ivie 11:1-9.



Enọ

  • Eme Devidi avọ Abishai a ru nọ Sọl ọ jẹ wezẹ evaọ evuẹ riẹ?
  • Didi enọ Devidi ọ nọ Sọl?
  • Nọ ọ nya siọ Sọl ba no, diẹse Devidi o kpohọ?
  • Eme ọ wha ọkora se Devidi, nọ o ro kere emamọ ole jọ?
  • Ẹvẹ Devidi ọ kpako te nọ a rehọ iẹe mu ovie evaọ Hibrọn, kọ didi odẹ emezae riẹ jọ? 6. Diẹse Devidi ọ jọ su wọhọ ovie uwhremu na?

Enọ efa

  • Se 1 Samuẹle 26:1-25.

    Didi oware eme ọ Devidi nọ a kere fihọ 1 Samuẹle 26:11 i dhesẹ via kpahe ọruẹrẹfihotọ Ọghẹnẹ? (Ol. 37:7; Rom 13:2)

    Ma tẹ be daoma gaga dhesẹ uyoyou-ẹwo kẹ amọfa nọ a kare uyere, ẹvẹ eme ọ Devidi nọ e rrọ 1 Samuẹle 26:23 e sai ro fi obọ họ kẹ omai wo emamọ eriwo? (1 Iv. 8:32; Ol. 18:20)

  • Se 2 Samuẹle 1:26.

    Ẹvẹ Ileleikristi nẹnẹ a sai ro wo oghẹrẹ “uyoyou nọ o rẹ hiẹ hẹ” onọ Devidi avọ Jonatan a wo na kẹ ohwohwo? (1 Pita 4:8; Kọl. 3:14; 1 Jọn 4:12)

  • Se 2 Samuẹle 5:1-10.

    Bro ikpe Devidi o su wọhọ ovie, kọ ẹvẹ a ghale etoke nana kpohọ? (2 Sam. 5:4, 5)

    Eme ọ lẹliẹ Devidi jọ ruaro, kọ ẹvẹ onana o rọ rrọ ekareghẹhọ kẹ omai nẹnẹ? (2 Sam. 5:10; 1 Sam. 16:13; 1 Kọr. 1:31; Fil. 4:13)