Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 59: Onosoriẹ Nọ Devidi Ọ Jẹ Dhẹ

Ikuigbe avọ 59: Onosoriẹ Nọ Devidi Ọ Jẹ Dhẹ

NỌ DEVIDI okpe Goliat no, oletu ẹmo Izrẹl Abna ọ tẹ rehiẹe se Sọl. Eva Devidi e tẹ were Sọl gaga. O je ruei họ oletu ẹmo evaọ ogbaẹmo riẹ ọ jẹ rehiẹe kpohọ uwou ovie nyae ria.

Uwhremuna, nọ otu ẹmo o no ohọre Ahwo-Filistia ze no, eyae na e tẹ so: ‘Sọl o ghine kpe idu ahwo, rekọ Devidi idu ahwo ikpe.’ Onana o tẹ lẹliẹ Sọl reihri, keme a kẹ Devidi oruaro vi Sọl. Rekọ Jonatan ọmọzae Sọl ọ re ihrihi. O you Devidi gaga, jẹ ruere Devidi o you Jonatan re. Fikiere ai mava na a tẹ ya eya kẹ ohwohwo nnọ ẹsikpobi a rẹ jọ ogbẹnyusu.

Sọl ovie na nọ o bi fi ozuẹ

Devidi yọ ọnọ ọ riẹ akpata ekporo gaga, yọ ikporoakporo riẹ na e be hae were Sọl oma. Rekọ ẹdẹjọ ihrieriọ Sọl e tẹ wọe ru oware ugbunu. Epanọ Devidi o bi ro kporo akpata na, Sọl o te gbobọhọ ozuẹ riẹ o te fiei, ta nọ: ‘Me re duwu Devidi yao ugbẹhẹ na!’ Rekọ Devidi ọ tẹ kẹnoma, ozuẹ na o te kiei thọ. Okiofa Sọl ọ zoma rehọ ozuẹ riẹ fi Devidi o te fiei thọ. Fikiere Devidi ọ tẹ riẹ nọ enẹna ọ rẹ sẹro oma riẹ gaga.

Kọ whọ kareghẹhọ eya nọ Sọl ọya? Ọ ta nọ ọ rẹ rehọ ọmọtẹ riẹ kẹ ọzae kpobi nọ okpe Goliat re ọ jọ aye riẹ. Uwhremu riẹ Sọl ọ tẹ ta kẹ Devidi nọ ọ rẹ rehọ Makal ọmọtẹ riẹ, rekọ o re kpe Ahwo 100 Filistia ọwegrẹ na tao. Who roro oyena! Eva uzẹme Sọl o rẹro nnọ Ahwo-Filistia a re ti kpe Devidi no. Rekọ a sai kpei hi, fikiere Sọl ọ tẹ rehọ ọmọtẹ riẹ kẹ Devidi re ọ jọ aye riẹ.

Ẹdẹjọ Sọl ọ tẹ ta kẹ Jonatan gbe idibo riẹ kpobi nọ ọye ọ gwọlọ kpe Devidi. Rekọ Jonatan ọ tẹ ta kẹ ọsẹ riẹ nọ: ‘Whọ nwa Devidi hi. O ri ru owhẹ oware uyoma ovo ho. Ukpoye, oware kpobi nọ o ru obufihọ ulogbo orọ kẹ owhẹ. Ọ rehọ uzuazọ riẹ kpahe ẹrobọ okenọ okpe Goliat, yọ nọ whọ ruẹ onana eva e tẹ were owhẹ.’

Devidi nọ ọ be dhẹ no ozuẹ na

Sọl o te yo ẹme ọmọzae riẹ, ọ tẹ ya nọ ọ gbẹ nwa Devidi hi. A te zihe Devidi ze, ọ tẹ wariẹ mu odibo họ ẹgba kẹ Sọl eva uwou riẹ wọhọ epanọ o ru okenọ ukpemu. Dede na ẹdẹjọ epanọ Devidi o bi ro kporo ile na, Sọl ọ tẹ wariẹ rehọ ozuẹ riẹ fi Devidi. Devidi ọ tẹ kẹnoma ozuẹ na o te kie ugbẹhẹ. Onana vọ isiasa! Devidi ọ tẹ riẹ nọ enẹna ọye ọ rẹ dhẹ hrọ!

Aso ọyena Devidi o te kpobọ uwou obọ riẹ. Rekọ Sọl o te vi ezae jọ re anyai kpei. Makal ọ riẹ oware nọ ọsẹ riẹ ọjiroro nọ o bi ti ru. Fikiere ọ tẹ ta kẹ ọzae riẹ: ‘Otẹrọnọ whọ gbẹ dhẹ aso ọnana ha, odẹnotha ori wọ rẹ te jọ.’ Aso ọyena Makal o te fiobọhọ kẹ Devidi rehọ unwido dhẹ vrẹ. Oware wọhọ ikpe ihrẹ Devidi o je dhere oghoghẹrẹ oria re Sọl ọ siẹba ẹruẹ.

1 Samuẹle 18:1-30; 19:1-18.



Enọ

  • Fikieme Sọl ọ be rọ re Devidi ihri, rekọ ẹvẹ Jonatan ọmọzae Sọl o ro wo ẹhẹriẹ?
  • Eme ọ via ẹdẹjọ nọ Devidi o je kporo akpata kẹ Sọl?
  • Eme Sọl ọ ta inọ Devidi o re ru hrọ tao re ọ tẹ te rehọ Makal ọmọtẹ Sọl wọhọ aye, kọ fikieme Sọl ọ jẹ ta ere?
  • Nọ Devidi o je kporo akpata kẹ Sọl, eme ọ via orọ avọ isiasa, wọhọ epanọ uwoho na u dhesẹ na?
  • Ẹvẹ Makal o ro fi obọ họ siwi uzuazọ Devidi, kọ eme Devidi o ru no umuo oke yena vrẹ evaọ ikpe ihrẹ?

Enọ efa

  • Se 1 Samuẹle 18:1-30.

    Ẹvẹ uyoyou ogaga nọ Jonatan o wo kẹ Devidi u ro dhesẹ uyoyou ọgbakugbe nọ o rrọ udevie “igodẹ efa” na gbe “uthuru okakao” na? (1 Sam. 18:1; Jọn 10:16; Luk 12:32; Zek. 8:23)

    Dede nọ Jonatan ọ hae jọ ọriuku ọ Sọl, ẹvẹ 1 Samuẹle 18:4 u ro dhesẹ obọdẹ omarokpotọ nọ Jonatan o wo kẹ ọnọ Ọghẹnẹ ọ salọ re ọ jọ ovie?

    Ẹvẹ oriruo Sọl o ro dhesẹ nọ ihrieriọ e sai su kpohọ uzioraha ulogbo, kọ didi unuovẹvẹ onana o rrọ kẹ omai? (1 Sam. 18:7-9, 25; Jem. 3:14-16)

  • Se 1 Samuẹle 19:1-17.

    Ẹvẹ Jonatan o ro fi uzuazọ riẹ họ ọza okenọ ọ ta eme nọ e rrọ 1 Samuẹle 19:4, 5 na? (1 Sam. 19:1, 6)