Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 53: Eya Ọ Jẹfta

Ikuigbe avọ 53: Eya Ọ Jẹfta
Ọmọtẹ Jẹfta

WHỌ ya eya jọ nọ uwremuna nọ ọ bẹ owhẹ ekoko? Ọzae nọ ọ rọ eva uwoho onana o ru rie, fiki oye ja bọ nọ o romu ovao họ na. Ọzae na yọ obroziẹ ọwharo ọ rọ Izrẹl odẹ riẹ Jẹfta.

Jẹfta ọ jẹ ria eva oke nọ Ahwo-Izrẹl agbẹ jẹ gọ Jihova ha. A tẹ jẹ wariẹ ru eware nọ iyoma. Fikiere Jihova ọ tẹ se ahwo Amọn ba jẹ nwae oma. Onana u te ru Ahwo-Izrẹl bo se Jihova: ‘Ma thọ uzi mukpahe owhẹ. Ivie-olẹ, siwi omai!’

Jẹfta avọ ogbaẹmọ riẹ

Ahwo na oda rai kẹ eware iyoma nọ a ru. Adhesẹ nọ oda rai eva ẹwariẹ gọ Jihova. Fikiere Jihova ọ tẹ wariẹ je fiobọhọ kae.

Ahwo na a salọ Jẹfta re ọhọre Ahwo yoma Amọn na. Jẹfta ọ gwọlọ gaga nọ Jihova o re fiobọhọ kẹe eva ohọre na. Fikiere ọ tẹ y‛eya kẹ Jihova nọ: ‘Otẹrọnọ whọ rẹ kẹ omẹ obọfikparọ vi Ahwo-Amọn, ohwo ọsosuọ nọ ọ rẹ nya no eva uwou mẹ ti zere omẹ okenọ me ti zihe no obokparọ na ze mẹ rẹ rehiẹe k’owhẹ.’

Jihova ọ gaviezọ kẹ eya Jẹfta na, o te fiobọhọ kẹe wo obọkpare ẹmo na. Okenọ Jẹfta o zihe te uwou, whọ riẹ ohwo nọ ọ kake nyai zeriei? Ọ yena ọmọtẹ riẹ, ọnọ ọ rọ ọmọ ọvo ọvo nọ o wo. ‘O, ọmọtẹ mẹ!’ ere Jẹfta obo. ‘Didi oma ọkora whọ rehọ ro se omẹ enẹ. Whaọ mẹ yaeya kẹ Jihova no, yọ mẹ gbẹ sae rẹriẹe he.’

Okenọ ọmọtẹ Jẹfta ọ te rọ riẹ kpahe eya ọsẹ riẹ no, eva ọsosuọ riẹ omuovao họ re. Keme udhesẹ nọ ọ rẹ te se ọsẹ gbe egbẹnyusu riẹ ba. Rekọ ọ rẹ te rehọ oke riẹ nọ ukiọkọ eva uzuazọ riẹ ruiruo kẹ Jihova eva uwoudhu riẹ evaọ Shilo. Fikiere ọ tẹ ta kẹ ọsẹ riẹ nọ: ‘Otẹrọnọ whẹ yaeya kẹ Jihova, who re kru eya na hrọ.’

Fikiere ọmọtẹ Jẹfta o te kpobọ Shilo, ọ tẹ rehọ uzuazọ riẹ nọ ukiọkọ ro ru iruo kẹ Jihova eva uwoudhu riẹ. Kukpe kukpe eyae Izrẹl a rẹ nya bru rie ave lelie ria edẹ ene ghọghọ kugbei. Ahwo na a you ọmọtẹ Jẹfta fiki nọ ọ rọ omamọ odibo rọ kẹ Jihova.

Ibruoziẹ 10:6-18; 11:1-40.



Enọ

  • Ono họ Jẹfta, kọ etoke vẹ ọ rọ rria uzuazọ?
  • Didi eyaa Jẹfta ọ yaa kẹ Jihova?
  • Fikieme Jẹfta ọ rọ jọ ọkora nọ o zihe te uwou no ohọre nọ ọ jọ kparobọ vi ahwo Amọn ze?
  • Eme ọmọtẹ Jẹfta ọ ta nọ o yo kpahe eyaa ọsẹ riẹ?
  • Fikieme ahwo na a ro you ọmọtẹ Jẹfta?

Enọ efa

  • Se Ibruoziẹ 10:6-18.

    Eme ma rẹ jọ ababọ-ẹrọwọ nọ Izrẹl o fihọ Jihova wuhrẹ? (Ibr. 10:6, 15, 16; Rom 15:4; Evia. 2:10)

  • Se Ibruoziẹ 11:1-11, 29-40.

    Ẹvẹ ma rọ riẹ nnọ Jẹfta nọ ọ rehọ ọmọtẹ riẹ “dhidhe” na orọnikọ ọ rehọ erae mahe iẹe he? (Ibr. 11:31; Izerẹ 16:24; Izie. 18:10, 12)

    Edhere vẹ Jẹfta ọ rọ rehọ ọmọtẹ riẹ dheidhe?

    Eme ma rẹ jọ uruemu ọ Jẹfta kpahe eyaa riẹ kẹ Jihova wuhrẹ? (Ibr. 11:35, 39; Ọtausi. 5:4, 5; Mat. 16:24)

    Ẹvẹ ọmọtẹ Jẹfta ọ rọ rrọ emamọ oriruo kẹ emoha Ileleikristi evaọ ele ute iruo odibọgba oke-kpobi? (Ibr. 11:36; Mat. 6:33; Fil. 3:8)