Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 51: Rut Avọ Naomi

Ikuigbe avọ 51: Rut Avọ Naomi

EHAỌ Ebaibol whọ rẹ te ruẹ obe nọ a re se Rut. Yọ iku kpahe orua jọ nọ ojẹ ria eva evie okenọ ahwo Izrẹl a ro wo Ibroziẹ. Rut uvovaye ọ rọ otọ Moab onoze; ọ rọ ohwo Izrẹl Ọghẹnẹ hẹ. Rekọ nọ Rut owuhrẹ kpahe Jihova Ọghẹnẹ uzẹme, o te zi yoyei ziezi. Naomi yọ ọkpọkuaye nọ ofiobọhọ kẹ Rut wuhrẹ kpahe Jihova.

Naomi yọ aye Ohwo-Izrẹl. Ọye avọ ọzae riẹ gbe emezae ivẹ riẹ akpare kpobọ otọ Moab eva okenọ emuọrẹ ọ jọ kakao eva otọ Izrẹl nọ arẹ re. Koyehọ ẹdẹvo jọ ọzae Naomi o te whu. Uwremuna emezae ivẹ Naomi a tẹ rọo emetẹ ivẹ Ahwo-Moab nọ a re se Rut gbe Ọpa. Rekọ nọ wọhọ ikpe 10 evrẹno, emezae ivẹ Naomi na i te je whu no. Ẹvẹ ọkora nọ Naomi avọ emetẹ ivẹ na a re wo ọ rẹ jọ! Kọ eme Naomi o re ru enẹna?

Ẹdẹvo jọ Naomi ọ tẹ jiroro nọ ọ rẹ nya etugbo thethe na zihe bru ahwo riẹ. Rut avọ Ọpa a gwọlọ ria kugbei, fikiere a te lelie kpo re. Rekọ nọ a rọ rọ onya erẹ na nọ agbẹrọ edhere na, Naomi o te kuomarẹriẹ ta kẹ emetẹ na nọ: ‘Wha zihe re wha nyae ria kugbe ini rai.’

Naomi ọ tẹ viọlọ emetẹ na unu o te yerai nọ wha t’odẹ. Koyehọ a te muhọ ẹviẹ, keme a you Naomi vi ere. A tẹ ta nọ: ‘Ijo! Ma re lele owhẹ nya bru ahwo ra.’ Rekọ Naomi o te yo kae nọ: ‘Wha re zihe kpo hrọ, emetẹ mẹ. Obọ uwou rai o te mai woma kẹ owhai.’ Fikiere Ọpa o te muhọ ezihekpo. Rekọ Rut o zihe kpo ho.

Naomi okuoma rẹriẹ ọ tẹ ta kẹe nọ: ‘Ọpa o zihe kpo no. Whẹ oma ra leliei kpo re.’ Rekọ Rut o te yo kẹe nọ: ‘Whọ jọdẹ tẹzẹ omẹ re mẹ se owhẹ ba ha! J’o me lele owhẹ kpo. Obonọ whẹ nya mẹ rẹ nya, oria nọ whẹ rọ mẹ rẹ jọ. Ahwo ra a rẹ te jọ ahwo mẹ, gbe Ọghẹnẹ ra ọ rẹ te jọ Ọghẹnẹ mẹ. Oria nọ who je whu mẹ rẹ jọ whu, yọ etẹe a re ki omẹ fihọ re.’ Nọ Rut ọ ta onana no, Naomi ọ gbẹ jọdẹ tẹziẹe re ozihe kpo ofa vievie he.

Uwremuna eyae ivẹ na a tẹ nya te Izrẹl. Etenẹ a wohọ jẹ ria. Rut ọ tẹ nwani mu iruo họ eva obọ ẹwọ, keme yọ oke nọ a rẹ rọ kọrọ eka. Ọzae jọ nọ a re se Boaz ọ kẹ riẹe uvẹ re ọ hae jọ eva idhu riẹ kwa eka koko. Kọ whọ riẹ ohwo nọ ọ jọ oni Boaz? Ọye ọ jọ Rehab obọ okpẹwho Jeriko na.

Ẹdẹ jọ Boaz ọ tẹ ta kẹ Rut nọ: ‘Me yo epanọ whẹ rọ kpobi no, gbe epanọ who wou kẹ Naomi te. Mẹ riẹ epanọ whọ rọ se ọsẹ gbe oni ra gbe orẹwho obọ ra gbe epanọ whọ rọ nyaze te ria udevie ahwo nọ whọ re riẹ vẹre he. Jọ Jihova ọ rọvọ k’owhẹ!’

Rut o te yo nọ: ‘Who wou komẹ thesiwa, ọnowo mẹ. Who ruo mẹ oma sasa eva edhere ezi nọ whọ rọ ta ẹme kẹ omẹ.’ Rut ọ were Boaz thesiwa, yọ ugbe kri re a tẹ rọo ho. Epanọ onana uru e Naomi were eva te! Rekọ eva ewere Naomi vi ere okenọ Rut avọ Boaz a ro tube yẹ ọmọzae ọsosuọ rai, nọ a re se Obẹd. Uwremuna Obẹd ọ tẹ ze jọ ọsede Devidi, ọ yena ma ti wuhrẹ eware buobu kpahiẹ okiofa.

Rut avọ Naomi

Obe Ebaibol ọ rọ Rut.



Enọ

  • Ẹvẹ Naomi ọ rọ ziọ ẹkwotọ Moab?
  • Amono họ Rut avọ Ọpa?
  • Didi uyo Rut avọ Ọpa a kẹ nọ Naomi ọ ta kẹ ae inọ a zihe bru ahwo rai?
  • Ono họ Boaz, kọ ẹvẹ o ro fi obọ họ kẹ Rut avọ Naomi?
  • Didi odẹ ọmọ nọ Rut o yẹ kẹ Boaz, kọ fikieme ma jẹ kareghẹhọ iẹe?

Enọ efa

  • Se Rut 1:1-17.

    Didi emamọ eme ọrọ uyoyou omarokpotọ Rut ọ ta? (Rut 1:16, 17)

    Ẹvẹ uruemu ọ Rut u ro dhesẹ uruemu ọ “igodẹ efa” na rọkẹ enọ a wholo na nọ e rrọ otọakpọ nẹnẹ? (Jọn 10:16; Zek. 8:23)

  • Se Rut 2:1-23.

    Ẹvẹ Rut ọ rọ rrọ emamọ oriruo kẹ ivovo-eyae nẹnẹ? (Rut 2:17, 18; Itẹ 23:22; 31:15)

  • Se Rut 3:5-13.

    Ẹvẹ Boaz o rri unevaze nọ Rut ọ rọ ruọ orọo kugbei viukpenọ ọ rẹ rọo ọmoha?

    Eme oriruo Rut o ro wuhrẹ omai uyoyou omarokpotọ? (Rut 3:10; 1 Kọr. 13:4, 5)

  • Se Rut 4:7-17.

    Ẹvẹ ezae Ileleikristi nẹnẹ a sae rọ jọ wọhọ Boaz? (Rut 4:9, 10; 1 Tim. 3:1, 12, 13; 5:8)