Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 48: Ahwo Gibiọn Iwareghẹ Na

Ikuigbe avọ 48: Ahwo Gibiọn Iwareghẹ Na

IKPEWHO buobu eva Kenan ethoma vẹre re a họre Izrẹl. A roro nọ a te sae kparobọ. Rekọ ahwo nọ arọ eva Gibiọn okpẹwho nọ omae kẹ lae a roro ere he. Arọwo nọ Ọghẹnẹ obi fiobọhọ kẹ Ahwo-Izrẹl, yọ a gwọlọ nọ a rẹ họre Ọghẹnẹ hẹ. Fikiere whọ riẹ oware nọ Ahwo-Gibiọn a ru?

A te dhugbe ru re a rri rai wọhọ ahwo nọ a be ria obojọ nọ utherabọ vrẹusi. Fikiere ahwo rai jọ a te fi inwre iwu họ oma gbe eviawọ nọ ere-no. A rehọ inwrekpa rọ wha enyonya rai, a tẹ jẹ rehọ emedaka nọ imuitutu nọ eyafia. Koyehọ anya bru Joshua ta kẹe nọ: ‘Ma no ẹkwotọ nọ othabọ ze, keme ma yo kpahe Ọghẹnẹ ologbo rai, Jihova. Ma yo eware nọ o ru k’owhai eva Ijipti. Fikiere isu mai a tẹ ta kẹ omai nọ ma wọ emu jọ thọ oma kpahe kẹ onya re ma nyaze te ta kẹ owhẹ nọ: “Mai yọ idibo ra. Ya eya k’omai nọ who re lele omai fi ẹmo ho.” Whọ sae ruẹ nọ iwu mai ebẹre zagha no fiki etugbo thethei gbe emedaka mai nọ imuitutu jẹ yafia.’

Joshua gbe isu efa a tẹ rọwo fihọ ẹme Ahwo-Gibiọn na. Fikiere a tẹ ya eya nọ a rẹ te họrae he. Rekọ edẹ esa efa a tẹ ze riẹ nọ Ahwo-Gibiọn kpakọ a be ria kẹlae.

‘Fikieme wha jẹ ta kẹ omai nọ otọ nọ otheri abọ wha noze?’ Joshua ọnọ rae.

Ahwo-Gibiọn a tẹ za nọ: ‘Ma ru ere keme a ta kẹ omai vẹre nọ Jihova Ọghẹnẹ rai ọya eya nọ ọ rẹ rehọ otọ Kenan na kpobi rọ kẹ owhai. Fikiere ozọ u te je muomai nọ wha re ti kpe omai.’ Rekọ Ahwo-Izrẹl a kru eya rai, agbe kpe Ahwo-Gibiọn na ha. Ikpoyena kọ a rehai roru idibo rai.

Ovie Jerusalem eva e be dhae fiki nọ Ahwo-Gibiọn a ru udhedhẹ kugbe Ahwo-Izrẹl. Fikiere ọ tẹ ta kẹ ivie ene edekọ: ‘Wha nyaze te tho mẹ uke họre Gibiọn.’ Oyena họ onọ ivie isoi nana i ru. Kọ Ahwo-Gibiọn a wo areghẹ nọ a ro ru udhedhẹ kugbe Izrẹl, nọ olẹliẹ ivie nana nyaze te họrae na? Ma be te ruẹ.

Joshua 9:1-27; 10:1-5.

Joshua avọ Ahwo-Gibiọn


Enọ

  • Ẹvẹ ahwo Gibiọn a ro wo ohẹriẹ no ahwo Kenan nọ e rrọ ikpewho ekẹloma?
  • Wọhọ epanọ uwoho na u dhesẹ, eme ahwo Gibiọn a ru, kọ fikieme?
  • Didi eyaa Joshua avọ isu emọ Izrẹl a yaa kẹ ahwo Gibiọn, rekọ eme a kiẹ via edẹ esa nọ i lele i rie?
  • Eme ọ via nọ ivie ikpewho nọ i kiọkọ a yo nnọ ahwo Gibiọn a riọvọ udhedhẹ kugbe Izrẹl no?

Enọ efa

  • Se Joshua 9:1-27.

    Nọ o rọnọ Jihova ọ ta kẹ orẹwho Izrẹl inọ a “kpe ahwo nọ a be ria eva otọ na kpobi” no na, ekwakwa iwoma riẹ vẹ i dhesẹ oma via ẹkwoma ahwo Gibiọn nọ a seba na? (Josh. 9:22, 24; Mat. 9:13; Iruẹru 10:34, 35; 2 Pita 3:9)

    Ẹkwoma ekoko ọvọ nọ ọ re kugbe ahwo Gibiọn, ẹvẹ Joshua ọ rọ kẹ Ileleikristi inẹnẹ emamọ oriruo? (Josh. 9:18, 19; Mat. 5:37; Ẹf. 4:25)

  • Se Joshua 10:1-5.

    Ẹvẹ otu obuobu na nẹnẹ a rẹ rọ raro kele ahwo Gibiọn, kọ oware vẹ u bi te ai obọ fiki onana? (Josh. 10:4; Zek. 8:23; Mat. 25:35-40; Evia. 12:17)