Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 45: Ẹfavrẹ Ethẹ Jọdan Na

Ikuigbe avọ 45: Ẹfavrẹ Ethẹ Jọdan Na

RRI! Ahwo-Izrẹl a be fa Ethẹ Jọdan na vrẹ! Rekọ bovẹ ame na ọ rọ? Keme yọ okenọ iso i re dhe ẹrẹrọ eva ukpe, ethẹ na ọvọmuakọ evaọ emaharo kakao nọ o nwane vrẹ. Rekọ enẹna ame na kpobi ọnya vrẹ no! Yọ Ahwo-Izrẹl a be nya otọ yaya favrẹ nwane wọhọ epanọ a ru evaọ Abade Owawae na! Bovẹ ame na kpobi ọ nya? J’oma ruẹ.

Ahwo-Izrẹl nọ e fa Ethẹ Jọdan vrẹ

Nọ okenọ Ahwo-Izrẹl a rẹrọ fa Ethẹ Jọdan na vrẹ o zino, onana họ onọ Jihova ọ rehọ Joshua ta kẹ ahwo na: ‘Izerẹ na e rehọ etehe-ọvọ na re a nya karo kẹ omai. Nọ a te dhe awọ rai họ ame ọrọ Ethẹ Jọdan na no, kẹsena ẹdhẹ ame na ọ vẹ te daji.’

Koyehọ izerẹ na awọ etehe-ọvọ na a tẹ whae karo kẹ ahwo na. Nọ a ti te Jọdan no, izerẹ na a tẹ nwane nya ovaọvo ruọ eva ame na. Ame na o re didi yọ ọ be dhẹ vẹrẹ gaga. Rekọ epanọ awọ rai erọ nwani te ame na, ẹdhẹ ame na ọ tẹ nwani muhọ ẹdaji! Igbunu o rọ! Jihova ọ tẹ jọ obọ ehru ọ ẹkẹre na za ame na dhe. Fikiere, ame ọgbẹ nwane rọ ethẹ na ha!

Izerẹ nọ ewha etehe-ọvọ na a tẹ nya ovaọvo kpohọ udevie ethẹ nọ ọya no na. Whọ sae rue rai eva uwoho na? Epanọ a ro dikihẹ e tẹe na, Ahwo-Izrẹl na kpobi a rọ nya ovaọvo fa Ethẹ Jọdan na vrẹ eva otọ oyaya!

Okenọ ahwo kpobi a rọ nya favrẹ no, Jihova ọ tẹ rehọ Joshua ta kẹ ezae 12 nọ e rẹ gaga nnọ: ‘Anya ruọ eva ethẹ na kpohọ oria nọ Izerẹ avọ etehe-ọvọ na adikihẹ. Rehọ itho 12, re a rehai dhe uhiehọ o ria nọ a rẹ te jọ eva aso ọyena. Kẹsena, eva obaro, okenọ emọ rai a tẹ nọ owhai kpahọ oware nọ itho nana e rọ kẹ, wha vẹ ta kae nọ ame na brudhe eva okenọ etehe-ọvọ Jihova o rọ fa Jọdan vrẹ. Itho na e rẹ te kareghẹhọ owhai igbunu nana!’ Joshua ọ tẹ rehọ itho 12 ro vi oria nọ izerẹ na idikihẹ eva udevie ethẹ na re.

Joshua

Ukuhọ riẹ Joshua ọ tẹ ta kẹ izerẹ nọ e wha etehe-ọvọ na nọ: ‘Nya ruọ okpa no Jọdan no.’ Nọ anwani ru ere, ethẹ na ọ tẹ nwani muhọ ẹdhẹ.

Joshua 3:1-17; 4:1-18.



Enọ

  • Didi oware igbunu Jihova o ru re emọ Izrẹl a sae fa Ethẹ Jọdan na vrẹ?
  • Oware vẹ nọ u dhesẹ ẹrọwọ via emọ Izrẹl a re ru hrọ re a sae fa Ethẹ Jọdan na vrẹ?
  • Fikieme Jihova ọ rọ ta kẹ Joshua nọ ọ wọ itho ilogbo 12 no otọ ethẹ na ze?
  • Eme ọ via nọ izerẹ na a nwani siawọ no Jọdan na no?

Enọ efa

  • Se Joshua 3:1-17.

    Wọhọ epanọ ikuigbe nana i dhesẹ, eme u fo nọ ma re ru re ma ruẹsi wo obufihọ gbe oghale Jihova? (Josh. 3:13, 15; Itẹ 3:5; Jem. 2:22, 26)

    Ẹvẹ Ethẹ Jọdan na ọ jọ okenọ emọ Izrẹl a fa vrẹ kpohọ Ẹkwotọ Eyaa na, kọ ẹvẹ onana u ro ru odẹ Jihova rro? (Josh. 3:15; 4:18; Ol. 66:5-7)

  • Se Joshua 4:1-18.

    Ẹjiroro vẹ itho 12 nọ a wọ no Jọdan fihọ Gilgal na i dikihẹ kẹ? (Josh. 4:4-7)