MOSIS ọ gwọlọ nọ o re lele Ahwo-Izrẹl kpobọ Kenan. Fikiere ọ tẹ yare nọ: ‘Jihova, jọ mẹ fa Ethẹ Jọdan vrẹ, re mẹ ruẹ otọ uwoma na.’ Rekọ Jihova ọ tẹ ta nọ: ‘Oyena u te! Whọ gbẹ wariẹe ofaha!’ Whọ riẹ onọ osoriẹ nọ Jihova ọ jẹ ta ere?

Fiki oware nọ o via eva okenọ Mosis ọ tehe utho na. Kareghẹhọ, ọ ye avọ Erọn a kẹ Jihova orro ho. A ta kẹ ahwo nọ Jihova họ ọnọ ọ rehọ ame no utho na ze he. Fiki onana Jihova ọ jẹ ta nọ ọbe te kae uvẹ hẹ re akpobọ Kenan.

Fikiere emera kakao nọ Erọn owhu no, Jihova ọ tẹ ta kẹ Mosis nọ: ‘Rehọ Joshua dikihẹ evaọ aro Ẹlieza ozerẹ na, gbe ahwo na. Re whọ jọ etẹ, evaọ iraro rai kpobi, ta kẹ kohwo kohwo nọ Joshua họ osu ọkpokpọ.’ Mosis o te ru epanọ Jihova ọ tae, wọhọ epanọ whọ be ruẹ evaọ ifoto na.

Mosis nọ o bi whowho joshua

Koyehọ Jihova ọ ta kẹ Joshua nọ: ‘Kru omaga, ozọ umu owhẹ hẹ. Who re ti su Ahwo-Izrẹl kpobọ otọ Kenan onọ mẹ ya kae na, yọ mẹ rẹ te jọ kugbe owhẹ.’

Uwhremuriẹ Jihova ọ tẹ ta kẹ Mosis nọ, ọ gadiẹ, kpobọ ehru ugbehru Nẹbo evaọ otọ Moab. Kọ ehru etẹ Mosis o je ti riwi Ethẹ Jọdan vrẹ kpohọ abọdekọ ọ vẹ ruẹ otọ Kenan uwoma na. Jihova ọ tẹ ta nọ: ‘Onana họ otọ nọ mẹ ya nọ, mẹ rẹ rehọ kẹ emọ Abraham, Aiziki gbe Jekọp. Mẹ kẹ owhẹ uvẹ rueriẹ no, rekọ mẹ te kẹ owhẹ uvẹ nya tei hi.’

Evaọ ehru ugbehru Nẹbo etẹ Mosis o je whu. Ikpe 120 ọkpako te. Yọ ọ gbẹ jọ gaga, yọ ibiaro riẹ egbẹ jọ wowoma. Ahwo na a weri gaga, a tẹ jẹ viẹ, fiki epanọ Mosis owhu. Rekọ aghọghọ fikinọ Joshua ọ rọ osu ọkpokpọ rai.

Ikelakele 27:12-23; Iziewariẹ 3:23-29; 31:1-8, 14-23; 32:45-52; 34:1-12.



Enọ

  • Evaọ uwoho na, amono họ ezae ivẹ nọ i dikihẹ gba Mosis na?
  • Eme Jihova ọ ta kẹ Joshua?
  • Fikieme Mosis ọ rọ gadiẹ kpohọ ehru Ugbehru ọ Nẹbo, kọ eme Jihova ọ ta kẹe?
  • Ẹvẹ Mosis ọ kpako te nọ o whu?
  • Fikieme ahwo na a rọ rrọ ọkora, rekọ didi ẹjiroro a wo nọ a rẹ rọ were eva?

Enọ efa

  • Se Ikelakele 27:12-23.

    Iruo ilogbo vẹ Jihova ọ rọ kẹ Joshua, kọ ẹvẹ ẹruọsa Jihova kẹ ahwo Riẹ u bi ro dhesẹ oma via nẹnẹ? (Ikele. 27:15-19; Iruẹru 20:28; Hib. 13:7)

  • Se Iziewariẹ 3:23-29.

    Fikieme Jihova ọ gbẹ rọ kẹ Mosis avọ Erọn uvẹ re a fa vrẹ kpohọ ẹkwotọ eyaa na ha, kọ eme ma rẹ sae jọ onana wuhrẹ? (Izie. 3:25-27; Ikele. 20:12, 13)

  • 3. Se Iziewariẹ 31:1-8, 14-23.

    Ẹvẹ eme akodẹ erọ Mosis kẹ Izrẹl i ro dhesẹ nnọ ọ rehọ omarokpotọ jẹ ọwhọkuo Jihova rehọ? (Izie. 31:6-8, 23)

  • Se Iziewariẹ 32:45-52.

    Ẹvẹ u fo nọ Ẹme Ọghẹnẹ o re duobọhọ uzuazọ mai? (Izie. 32:47; Izerẹ 18:5; Hib. 4:12)

  • Se Iziewariẹ 34:1-12.

    Dede nọ Mosis ọ ghinẹ ruẹ Jihova dẹẹ hẹ, eme Iziewariẹ 34:10 u dhesẹ kpahe usu riẹ kugbe Jihova? (Ọny. 33:11, 20; Ikele. 12:8)