Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 42: Eketekete Ọ Tẹme

Ikuigbe avọ 42: Eketekete Ọ Tẹme

WHO yo ẹdẹjọ nọ eketekete ọ rẹ tẹme? ‘Ijo,’ ere whọ rẹ ta. ‘Erao erẹ sae ta ẹme he.’ Rekọ Ebaibol e ta kpahọ eketekete nọ o ru ere. J’oma ruẹ epanọ ovia rri.

Ẹnjẹle

Ahwo-Izrẹl a joma ruẹ-omahọ no, re a nya ruọ otọ Kenan. Belak ovie Moab ọ tẹ be dhozọ Ahwo-Izrẹl. Fikiere ọ tẹ vuẹ se Belam ohwo owareghẹ re o ti duwu Ahwo-Izrẹl iyei. Belak ọ tẹ yeya nọ, ọ rẹ kẹ Belam igho buobu, fikiere Belam ọ tẹ ruọ ehru eketekete riẹ, o te muhọ ẹnya re ọ ruerẹ Belak.

Jihova ọ gwọlọ nọ Belam oduwu ahwo riẹ iyei hi. Fikiere o te vi ẹnjẹle avọ ọgbọdọ ogrogro re odikihẹ evaọ edhere na, re ọ whaha Belam. Belam ọbe ruẹ ẹnjẹle na ha, rekọ eketekete riẹ ọ rueriẹ. Fikiere eketekete na ọ tẹ be daoma re o sioma rehọ siọ ẹnjẹle na ba, ukuhọriẹ ọ tẹ sioma fihọ otọ evaọ edhere na. Eva e tẹ dha Belam gaga, ọ tẹ rehọ ọkpọ be fa eketekete riẹ.

Koyehọ Jihova o te ru Belam re oyo ẹme nọ eketekete riẹ ọbe ta kẹe. Eketekete na, ọ tẹ nọe nọ. ‘Eme me ru owhẹ nọ whọ jẹbe fa omẹ?’

Belam evaọ ehru eketekete

Belam ọ tẹ ta nọ, ‘Who ru omẹ wọhọ ohwo ogheghẹ, ohẹ jọnọ me wo ọgbọdọ nwanọ me kpe owhẹ no!’

Eketekete na ọ tẹ nọe nọ, ‘Me ru owhẹ enẹ ẹdẹjọ no?’

Belam o te yo nọ, ‘Ijo.’

Koyehọ Jihova o ru re Belam ọ ruẹ ẹnjẹle nọ odikihẹ edhere na, avọ ọgbọdọ na. Ẹnjẹle na ọ tẹ ta nọ: ‘Fikieme whọ jẹ be fa eketekete ra? Mẹ nyaze ti gbere edhere ra, keme whọ rẹ nya re who duwu Izrẹl iyei hi. Ohẹjọnọ eketekete ra, ogbehe sioma rehọ no omẹ hẹ, nwanọ mẹ tehe owhẹ kpe no, yọ mẹ hẹ nwa eketekete ra oma ha.’

Belam ọ tẹ ta nọ: ‘Mẹ rahauzi no. Mẹ riẹ nọ who dikihẹ edhere he.’ Ẹnjẹle na o te siobọno Belam nyawa, Belam ọ tẹ nya re ọ ruẹ Belak. Ọ gbẹ be daoma re oduwu Izrẹl iyei, rekọ ukpoyena, Jihova o te ruei ghale Izrẹl isiasa.

Ikelakele 21:21-35; 22:1-40; 23:1-30; 24:1-25.



Enọ

  • Ono họ Belak, kọ fikieme ọ jẹ vuẹ se Belam inọ o bru ei ze?
  • Fikieme eketekete Belam o ro kiẹzẹ edhere?
  • Eme Belam o yo nọ eketekete na ọ be ta?
  • Eme ẹnjẹle jọ ọ ta kẹ Belam?
  • Eme ọ via nọ Belam ọ jẹ daoma re ọ la Izrẹl eka?

Enọ efa

  • Se Ikelakele 21:21-35.

    Fikieme Izrẹl o ro fi Saehọn ovie ahwo Amọ gbe Ọg ovie ahwo Beshan kparobọ? (Ikele. 21:21, 23, 33, 34)

  • Se Ikelakele 22:1-40.

    Eme ọ jọ Belam udu nọ ọ jẹ rọ gwọlọ la Izrẹl eka, kọ eme ma rẹ sae jọ onana wuhrẹ? (Ikele. 22:16, 17; Itẹ 6:16, 18; 2 Pita 2:15; Jud 11)

  • Se Ikelakele 23:1-30.

    Dede nọ Belam ọ ta ẹme epaọ ẹsenọ ọ rrọ ọgegagọ Jihova, ẹvẹ owojẹ riẹ u ro dhesẹ iẹe fihọ oghẹrẹ ofa? (Ikele. 23:3, 11-14; 1 Sam. 15:22)

  • Se Ikelakele 24:1-25.

    Ẹvẹ ikuigbe Ebaibol nana e rọ bọ ẹrọwọ mai ga fihọ orugba ẹjiroro Jihova? (Ikele. 24:10; Aiz. 54:17)