Kpohọ eme nọ e riẹ eva

Kpohọ oria izoẹme

Ikuigbe avọ 41: Araomuomu Ọkpọ Na

Ikuigbe avọ 41: Araomuomu Ọkpọ Na
Mosis avọ ọkpọ araomuomu na

ỌYE nọ ọ whaliẹ ure wariẹ na, ọ ghinẹ wọhọ emamọ araomuomu? Ọ wọhọ ere he. Ọkpọna a rehọ ru araomuomu na. Jihova ọ ta kẹ Mosis nọ o fiei họ ehru ure na, re ahwo a sai riyei re a ruẹse zọ. Rekọ eraimuomu edekọ nọ erọ obọ otọ na yọ emamọ. Erowo ahwo na no, i te rua’e be mọ. Kọ whọ riẹ onosoriẹ?

Fiki epanọ Ahwo-Izrẹl a ta eme mukpahe Ọghẹnẹ avọ Mosis. A tẹ go nọ: ‘Fikieme whọ jẹ rehọ omai no obọ Ijipti ze ti whu evaọ ẹwọ ọnana? Emuore ọrọ etenẹ hẹ hayo ame. Yọ ma gbẹ sae re emana enana ofaha.’

Rekọ emana yọ emamọ emuore. Evaọ edhere igbunu Jihova ọ rọ rehiẹe kae. Yọ edhere igbunu ọ rehọ kae ame re. Rekọ ahwo na a riẹ uyere he, evaọ edhere nọ Ọghẹnẹ ọ rẹhọ sẹro rai. Fikioye Jihova o jevi eraimuomu enua re e kẹ Ahwo-Izrẹl uye. Eraimuomu na e tẹ rowae, ibuobu rai i te whu.

Ahwo-Izrẹl nọ eraomuomu e jẹ rowo

Ukuhọriẹ ahwo na a tẹ nyabru Mosis a tẹ ta nọ: ‘Ma raha uzi keme ma ta eme mukpahe Jihova gbe owhẹ. Enẹna lẹ se Jihova re o si eraimuomu enana no.’

Fikiere Mosis ọ tẹ lẹ kẹ ahwo na. Jihova ọ tẹ ta kẹ Mosis nọ ọ rehọ ọkpọna ru araomuomu ọnana. Ọ tẹ ta nọ afiei họ ehru ure, inọ ohwo kpobi nọ a rowo ove riyei. Mosis o te ru epanọ Ọghẹnẹ ọ tae. Ahwo nọ a rowo na a te riwi araomuomu ọ ọkpọna na, oma rai o tẹ wariẹ ruẹrẹhọ.

Ewuhrẹ ọ rọ nọ a re wuhrẹ no onana ze. Mai kpobi, a rehọ edhere jọ rọ, wọhọ Ahwo-Izrẹl nọ eraimuomu eyena erowo. Mai kpobi, a rọ evaọ uyer’akpọ uwhu. Rri wariẹ họ, whọ te ruẹ nọ ahwo a be kpako, jẹ mọ, a ve je whu. Onana orọ ere, keme ọzae ọsosuọ gbe aye ọsosuọ Adamu avọ Ivi, a sioma no Jihova, yọ mai kpobi emọ rai. Rekọ Jihova ọ ruẹrẹ edhere fihọ, re ma sae ria bẹdẹ bẹdẹ.

Jihova o vi Ọmọ riẹ, Jesu Kristi ze otọakpọ. A te he Jesu họ ehru ure, keme ahwo buobu aroro nọ oyoma. Rekọ Jihova o si obọ no Jesu re, osiwi omai. Ma tẹ rehọ ẹro suẹe, ma te leliei, ma ve te wo uzuazọ ebẹdẹ bẹdẹ. Rekọ ma re ti wuhrẹ vienẹ kpahe onana okiofa.

Ikelakele 21:4-9; Jọn 3:14, 15.



Enọ

  • Evaọ uwoho na, eme ọ whaliẹ ure na, kọ fikieme Jihova ọ jẹ ta kẹ Mosis nọ a fi ei họ etẹe?
  • Ẹvẹ ahwo na a rọ kare uyere kẹ eware nọ Ọghẹnẹ o ru kẹ ai no kpobi?
  • Eme ahwo na a ta kẹ Mosis nọ o ru nọ Jihova o vi eraomuomu iyoma ze rọ kẹ ae uye no?
  • Fikieme Jihova ọ rọ ta kẹ Mosis inọ o ru araomuomu ọkpọna?
  • Didi oware ma rẹ sae jọ ikuigbe nana wuhrẹ?

Enọ efa

  • Se Ikelakele 21:4-9.

    Didi unuovẹvẹ ma wo evaọ unoma nọ Izrẹl o gu kpahe eruẹrẹfihotọ nọ i no obọ Jihova ze? (Ikele. 21:5, 6; Rom 2:4)

    Ikpe-udhusoi buobu evaọ obaro, eme emọ Izrẹl a rehọ araomuomu ọkpọna na ru, kọ eme Hẹzikaya Ovie na o ru? (Ikele. 21:9; 2 Iv. 18:1-4)

  • Se Jọn 3:14, 15.

    Ẹvẹ araomuomu ọkpọna nọ a fihọ ure na o ro dikihẹ kẹ ẹkare nọ a kare Jesu Kristi? (Gal. 3:13; 1 Pita 2:24)